༸གོང་ས་མཆོག་གིས་བོད་རྒྱའི་གྲོས་མོལ་གནང་གལ་ཆེ་བཀའ་སྩལ་བ།

༄༅༎བོད་མིའི་བླ་ན་མེད་པའི་དབུ་ཁྲིད་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་བོད་རྒྱ་གཉིས་དབར་ཛ་དྲག་གི་གྲོས་མོལ་གནང་ གལ་ཆེ་བའི་སྐོར་བཀའ་གནང་འདུག དེ་ཡང་༧གོང་ས་མཆོག་བཞུགས་སྒར་རྡ་རམ་ས་ལར་༧ཞབས་སོར་འཁོད་སྐབས་གསར་འགོད་པས་བཀའ་འདྲི་ཞུས་པའི་ལན་དུ་ གལ་ཏེ་འདི་ལོ་སྥྱི་ཟླ་བརྒྱད་པའི་ནང་ཚུགས་རྒྱུའི་ཨོ་ལིམ་ཕིག་རྩེད་འགྲན་མ་ཚར་བར་རྒྱལ་སྤྱིའི་ཐུགས་འཚབ་དང་གནོན་ཤུགས་ཞི་ཐབས་ ཁོ་ནར་དམིགས་པ་ཡིན་ན་དོན་སྙིང་ལྡན་པ་མེད་སྐོར་༧གོང་ས་མཆོག་གིས་བཀའ་གནང་ཡོད་ཅིང་ བོད་རྒྱའི་དཀའ་རྙོག་གི་རྒྱུ་རྐྱེན་ཇི་ཡིན་དང་ དཀའ་རྙོག་སེལ་བའི་ཐབས་ལམ་ཇི་ཡོད་ལ་གྲོས་མོལ་མཐིལ་ཕྱིན་པ་གནང་གལ་ཆེ་ལུགས་༧གོང་ས་མཆོག་གིས་མུ་མཐུད་བཀའ་གནང་འདུག ༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་༢༠༠༨ལོའི་ཕྱི་ཟླ་༤པའི་ཚེས་༩ཉིན་ཨ་རིར་ཆིབས་བསྒྱུར་བསྐྱངས་ཏེ་ མཛད་འཆར་ཁག་ལེགས་པར་གྲུབ་སྟེ་ཕྱི་ཟླ་༤པའི་ཚེས་༢༦ཉིན་བཞུགས་སྒར་དུ་ཞབས་སོར་འཁོད་ཡོད་པ་རེད་ ཡང་ཕྱི་ལོ་༢༠༠༨ལོར་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་གསུམ་བཅུའི་དུས་དྲན་ཐེངས་༤༩པའི་ཐོག་སྩལ་བའི་ཡོངས་ཁྱབ་ གསུང་འཕྲིན་ནང་ བོད་ཀྱི་དཀའ་རྙོག་ནི་ཆབ་སྲིད་དང་སྤྱི་ཚོགས་ ཁྲིམས་དོན་ འགྲོ་བ་མིའི་ཐོབ་ཐང་ ཆོས་དང་ལེགས་བྱང་ མི་རགས་ཀྱི་ངོས་འཛིན་ དཔལ་འབྱོར་ རང་བྱུང་ཁོར་ཡུག་སོགས་དོན་གནད་སྣ་མང་དང་འབྲེལ་བ་གཏིང་ཟབ་ཡོད་པའི་རྙོག་འཛིང་ཆེ་བ་ཞིག་ཡིན་སྟབས་དེ་སེལ་བའི་ཐབས་ལམ་ཡང་ ཕྱོགས་གཅིག་གི་ཁེ་ཕན་ཁོ་ནར་མ་བལྟས་པར་ཀུན་ཕན་ཡོངས་ཁྱབ་ཀྱི་ཐབས་ལམ་ཞིག་འཚོལ་དགོས་པར་བརྟེན་གཉིས་སྨན་དབུ་མའི་ལམ་གྱི་ སྲིད་བྱུས་དམ་འཛིན་གྱི་ཐོག་ནས་ལྷག་བསམ་རྣམ་དག་དང་ ཁ་ཞེ་གཉིས་མེད་ཀྱིས་འབད་རྩོལ་རྒྱུན་འཁྱོངས་གནང་ཡོད་པ་དང་ དབུ་མའི་ལམ་གྱི་སྲིད་བྱུས་དང་ བོད་རྒྱའི་འབྲེལ་མོལ་མུ་མཐུད་བྱ་རྒྱུར་འགྱུར་བ་མེད་ཅེས་༧གོང་ས་མཆོག་གིས་གསུང་འཕྲིན་བསྩལ་གནང་ཡོད་པ་རེད་༎