སྤྱི་འཐུས་ཚོགས་གཞོན་གྱིས་བོད་དོན་འགྲེལ་བཤད།

༄༅༎བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་ལགས་ཀྱིས་ ཁ་ས་ཨ་རིའི་ཀྲེ་ནེ་སི་མངའ་སྡེའི་ནང་ཡོད་པའི་ པདྨ་དཀར་པོ་སྒོམ་གྲུབ་བསྟི་གནས་ཁང་དུ་ནང་ཆོས་སྦྱོང་མཁན་གྱི་སློབ་མ་༡༥ཙམ་ལ་བོད་དོན་འགྲེལ་བཤད་གནང་འདུག།
སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་ལགས་ཀྱིས་ ད་ལྟའི་སྐབས་འདིར་རྒྱ་ནག་དམར་པོའི་གཞུང་གིས་བོད་ཀྱི་དགོན་སྡེ་ཁག་ནང་གཞུང་འབྲེལ་ལས་བྱེད་མངགས་གཏོང་གིས་གྲྭ་བཙུན་ཚོའི་ཐོག་དྲག་གནོན་བྱས་ཏེ་བོད་ཀྱི་ཆོས་དང་རིག་གཞུང་རྩ་མེད་བཟོ་བཞིན་ཡོད་པ་དང༌། རྒྱ་ནག་དམར་པོའི་གཞུང་གིས་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་ཡོད་སྟབས། བོད་ནང་གི་གཞིས་ལུས་བོད་མི་ཚོར་སྨྲ་བརྗོད་དང་ཆོས་དད་རང་དབང༌། གསར་འགོད་རང་དབང་སོགས་གང་ཡང་མེད་སྐོར་འགྲེལ་བརྗོད་གནང་བཞག།
སྤྱི་འཐུས་ཚོགས་གཞོན་ཉེ་ཆར་ ཀེ་ཎེ་ཌའི་རྒྱལ་ས་ ཨོ་ཊ་བའི་ནང་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་ཚོགས་ཆེན་ནང་ལྷན་ཞུགས་གནང་བའི་རྗེས་མེམ་ཕིསི་ཁུལ་དུ་ཕེབས་ཡོད་པ་དང༌།  ནང་ཆོས་སྦྱོང་མཁན་ཕྱི་རྒྱལ་སློབ་ཕྲུག་ཚོར་ བོད་ནང་དབང་ཚད་ཡོད་པའི་མཐོ་རིམ་དཔོན་པོ་ཕལ་ཆེ་བ་རྒྱ་རིགས་ཡིན་པ་དང༌། བོད་པའི་སློབ་གྲ་ཁག་ནང་བཙན་ཤེད་སྒོ་ནས་རྒྱ་སྐད་སློབ་འཁྲིད་བྱེད་དུ་བཅུགས་ཀྱི་ཡོད་པ་མ་ཚད། ལས་ཀ་འཚོལ་སྐབས་རྒྱ་སྐད་ངེས་པར་ཤེས་དགོས་ཀྱི་ཡོད་པའི་བོད་ནང་གི་ཛ་དྲག་གནང་སྟངས་འགྲེལ་བརྗོད་དང་འབྲེལ། སྤྱི་འཐུས་ཚོགས་གཞོན་གྱིས་ བོད་པ་ཚོས་ད་ལྟའི་སྐབས་འདིེར་བོད་ལ་མིང་དོན་མཚུངས་བའི་རང་སྲིད་རང་སྐྱོང་འཐོབ་རྒྱུའི་འབད་བརྩོན་བྱེད་ཀྱི་ཡོད་པ་ལས་ རང་བཙན་རྩོད་ལེན་བྱེད་ཀྱི་མེད་པའི་སྐོར་གསུངས་བཞག།