ཨོ་ལིམ་པིག་རྩེད་འགྲན་དཔལ་འབར་བོད་ནང་བསྐོར་བསྐྱོད་བྱེད་འཆར།

༄༅༎ཨོ་ལིམ་པིག་གི་དཔལ་འབར་ཉིན་ཤས་ནང་བོད་ནང་བསྐོར་བསྐྱོད་བྱ་རྒྱུའི་འཆར་གཞི་ཡོད་པར་ བཙན་བྱོལ་ནང་ཡོད་པའི་བོད་མི་ཚོས་བོད་མི་ཚོར་དྲང་བདེན་གྱི་རྒྱབ་སྐྱོར་དགོས་པ་ལས་ མཛེས་ཆའི་འགྲེམ་སྟོན་དགོས་ཀྱི་མེད་པ་བརྗོད་སྟེ་ རེས་གཟའ་མིག་དམར་ཉིན་ངོ་རྒོལ་ཁྲོམ་བསྐོར་གྱི་ལས་འགུལ་སྤེལ་ཡོད་པ་རེད་

དེ་བཞིན་གཟའ་མིག་དམར་ཉིན་ རྒྱ་གར་ནས་བོད་བར་གོམ་བགྲོད་བྱེད་མཁན་གྱི་བོད་མི་ལྔ་བཅུ་ཐམ་པ་དང་ གོམ་བགྲོད་ག་སྒྲིག་གནང་མཁན་གྱི་གཞུང་འབྲེལ་མ་ཡིན་པའི་ཚོགས་པའི་ཚོགས་གཙོ་ཁག་གཅིག་བོད་དང་རྒྱ་གར་གྱི་ས་མཚམས་སུ་འབྱོར་སྐབས་རྒྱ་གར་ཉེན་རྟོག་པས་འཛིན་བཟུང་དོ་དམ་བྱས་འདུག་

བཞུགས་སྒར་རྡ་རམ་ས་ལའི་ཁུལ་དུ་ངོ་རྒོལ་བྱེད་མཁན་གྱི་བོད་མི་ཚོས་ བོད་ལ་རང་དབང་དང་དྲང་བདེན་དགོས་ཞེས་སོགས་ཀྱི་འབོད་ཚིགས་སྒྲགས་པ་དང་ རྒྱ་མིའི་དམག་མིའི་ཆས་གོས་སྤྲས་པ་དང་ལག་ཏུ་རྩེ་ཆས་མེ་མདའ་འཁྱེར་སྟེ་ དགེ་འདུན་པ་ཚོའི་ཐོག་ཉེས་རྡུང་དྲག་རྩུབ་བྱེད་སྟངས་ཀྱི་སྟོན་པའི་འཁྲབ་སྟོན་གྱི་ལས་འགུལ་ཡང་སྤེལ་འདུག་

བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཚེ་དབང་རིག་འཛིན་ལགས་ཀྱིས་རོཡེ་ཀྲརསི་གསར་སྤེལ་ལས་ཁང་ལ་ རྒྱ་ནག་གཞུང་གིས་ཨོ་ལིམ་པིག་གི་དཔལ་འབར་བོད་དུ་བསྐོར་བསྐྱོད་བྱ་རྒྱུ་དེ་ནི་ ཕྱི་ཕྱོགས་སུ་བོད་རྒྱ་ནག་གི་ཆ་ཤས་ཡིན་པ་སྟོན་ཐབས་ཀྱི་བྱ་སྤྱོད་ཞིག་ཡིན་སྟབས་ བོད་མི་ཚོས་དེ་རིང་ངོ་རྒོལ་བྱེད་ཀྱི་ཡོད་པ་རེད་ཅེས་དང་ དོན་དངོས་བོད་ཀྱི་ད་ལྟའི་གནས་སྟངས་ནི་ བོད་མི་སྟོང་ཚོ་མང་པོས་ད་དུང་མྱ་ངན་བྱེད་བཞིན་པའི་དུས་ཚོད་ཅིག་རེད་ཅེས་གསུངས་འདུག་ལ་ ལྷག་པར་དུ་ཁོང་གིས་ དཔལ་འབར་བོད་ཀྱི་རྒྱལ་ས་ལྷ་ས་བརྒྱུད་བསྐོར་བསྐྱོད་བྱེད་མིན་གྱི་ཐག་གཅོད་བྱེད་པའི་ཐོབ་ཐང་དེ་བོད་མི་ཚོར་ཡོད་དགོས་པ་ལས་ རྒྱ་ནག་གཞུང་ལ་མེད་པ་དེར་ང་ཚོས་ཡིད་ཆེས་ཆེན་པོ་བྱེད་ཀྱི་ཡོད་པ་འགྲེལ་བརྗོད་གནང་འདུག་