རྒྱ་ནག་གི་འགྲོ་བ་མིའི་ཐོབ་ཐང་གནས་སྟངས་ཡར་རྒྱས་དགོས།

༄༅༎འགྲོ་བ་མིའི་ཐོབ་ཐང་གནད་དོན་ཐོག་གི་ཉམས་ཞིབ་པ་ཚོས་རྒྱ་ནག་གཞུང་གིས་ཕྱི་ལོ་ཉིས་སྟོང་བརྒྱད་ལོ་ནས་བཟུང་གྲངས་ཉུང་མི་རིགས་དང་ ལྷག་པར་དུ་རྒྱ་ནག་གཞུང་ཕྱོགས་ཀྱི་ཆབ་སྲིད་ལྟ་སྤྱོད་ལ་སྐྱོན་བརྗོད་བྱེད་མཁན་ཚོར་རྡུང་རྡེག་གཏོང་ཤུགས་ཆེ་རུ་གཏོང་བཞིན་པའི་གནས་སྟངས་ཐོག་ཨ་རི་གཞུང་གིས་རྒྱ་ནག་ཐོག་གནོན་ཤུགས་སྤྲད་ནས་རྒྱ་ནག་གི་འགྲོ་བ་མིའི་ཐོབ་ཐང་གནས་སྟངས་ཡར་རྒྱས་འགྲོ་ཐབས་གནང་དགོས་པའི་བསམ་ཚུལ་བཏོན་ཡོད་པ་རེད་

དེ་ཡང་ཕྱི་ཟླ་བརྒྱད་པའི་ཚེས་༣ཉིན་ཨ་རིའི་གྲོས་ཚོགས་ཀྱི་རྒྱ་ནག་གནད་དོན་ཐོག་ལྟ་ཞིབ་གནང་མཁན་གྱི་འཛིན་སྐྱོང་ཚོགས་ཆུང་ནས་  རྒྱ་ནག་གི་འགྲོ་བ་མིའི་ཐོབ་ཐང་གནས་སྟངས་ཐོག་གི་ཉན་ཞིབ་ལྷན་ཚོགས་ཤིག་སྐོངས་ཚོགས་གནང་ཡོད་པ་དང་ དེའི་ཐོག་ཨ་རི་གཞུང་གིས་རྒྱལ་སྤྱིའི་དངུལ་རྩའི་དཔལ་འབྱོར་གནས་སྟངས་ཉམས་ཉེས་ཕྱིན་པ་དང་ དེ་བཞིན་བྱང་ཀུ་རི་ཡ་དང་ཨི་རན་གྱི་གནད་དོན་སོགས་ཀྱི་ཐད་རྒྱ་ནག་གི་རྒྱབ་སྐྱོར་དང་མཉམ་ལས་ཡོང་རྒྱུའི་ཆེད་རྒྱ་ནག་གི་འགྲོ་བ་མིའི་ཐོབ་ཐང་གནས་སྟངས་ཐག་གཅོད་བྱ་རྒྱུར་གཡོལ་ཐབས་གནང་གི་ཡོད་པའི་གནད་དོན་ཨ་རིའི་འགྲོ་བ་མིའི་ཐོབ་ཐང་དང་ཁྲིམས་འཛིན་གནད་དོན་ཐོག་གི་མཁས་དབང་དང་ཉམས་ཞིབ་པ་ཚོས་གསལ་སྟོན་བྱས་ཡོད་པ་དང་ རྒྱ་ནག་གཞུང་གིས་རྒྱལ་ཁབ་ཀྱི་བདེ་འཇགས་ལ་གནོད་ཚབས་བཟོ་གིན་ཡོད་ལུགས་ཀྱི་ཉེས་བཙུགས་ཐོག་ནས་རྒྱ་ནག་གཞུང་ཕྱོགས་ཀྱི་ཆབ་སྲིད་ལྟ་ཚུལ་དང་གཅིག་མཚུངས་མིན་པའི་རྩོམ་པ་པོ་དང་ ཁྲིམས་རྩོད་པ་ དེ་བཞིན་བོད་དང་ཤིན་ཅང་གི་གྲངས་ཉུང་མི་རིགས་མི་སྣ་མང་པོ་ཞིག་ལ་ཉེས་བཙུགས་བྱེད་ཀྱི་ཡོད་པའི་སྐོར་བཏོན་ཡོད་པ་རེད་ ཏུད་ཧཨའ་ཞེས་པའི་ རྒྱ་ནག་དང་ཨ་རིའི་གྲོས་མོལ་ཐེབས་རྩ་ཁང་གི་ཉམས་ཞིབ་པ་ཇོ་ཤུ་ལྦ་རོ་སེན་ལྦའེག་ཡིས་གསུང་ན་ ཕྱི་ལོ་ཉིས་སྟོང་བརྒྱད་ཙམ་ནས་འགོ་ཚུགས་སྟེ་རྒྱ་ནག་གཞུང་གིས་ཁྲིམས་མཐུན་སྤྱི་ཚོགས་ཐོག་གོམ་སྟབས་མདུན་སྐྱོན་མ་བྱས་པ་དང་ ཐ་ན་དེ་ནས་ཕྱིར་བཤོལ་བྱེད་ཀྱི་ཡོད་པའི་རྣམ་པ་མཐོང་རྒྱུ་ཡོད་ཅིང་  དཔང་རྟགས་མང་པོ་ཞིག་གི་ཐོག་ནས་  རྒྱ་ནག་གཞུང་གིས་རང་ཉིད་དང་ཆབ་སྲིད་ཀྱི་ལྟ་སྤྱོད་མི་མཐུན་མཁན་དང་ ལྷག་པར་དུ་གྲངས་ཉུང་མི་རིགས་ཀྱི་ཐོག་དྲག་གནོན་བྱེད་ཀྱི་ཡོད་པའི་སྐོར་ཉན་ཞིབ་ལྷན་ཚོགས་ཐོག་གསུངས་ཡོད་པ་རེད་