རྒྱ་གར་སྲུང་སྐྱོབ་བློན་ཆེན་ནས་པ་ཀི་སི་ཐན་ལ་སྐྱོན་བརྗོད།

༄༅༎ད་རེས་པ་ཀི་སི་ཐན་གྱི་སྲིད་བློན་རྒྱ་ནག་ནང་འཚམས་གཟིགས་སུ་ཕེབས་ནས་རྒྱ་ནག་གིས་པ་ཀི་སི་ཐན་ལ་མཁའ་ཐོག་དམག་གི་གནམ་གྲུ་ལྔ་བཅུ་ཙམ་གྱི་རོགས་སྐྱོར་སྤྲད་ནས། ཡུལ་གཉིས་དབར་དམག་དོན་དང་དཔལ་འབྱོར་སོགས་ཀྱི་འབྲེལ་ལམ་དེ་བཞིན་ཧ་ཅང་ཟབ་པོ་ཡོད་པའི་སྐོར་གསལ་སྟོན་བྱས་ཡོད་པའི་གནད་དོན་ཐོག་གསར་འགོད་པས་རྒྱ་གར་གྱི་སྲུང་སྐྱོབ་བློན་ཆེན་མཆོག་ལ་དེའི་ཐོག་དགོངས་ཚུལ་བཀའ་འདྲི་ཞུས་པར། དེ་རིང་རྒྱ་གར་སྲུང་སྐྱོབ་བློན་ཆེན་ཨེ་ཀེ་ཨེན་ཏོ་ནི་(A.K. Antony)མཆོག་ནས། པ་ཀི་སི་ཐན་དང་རྒྱ་ནག་དབར་གྱི་དམག་དོན་འབྲེལ་ལམ་ཐོག་རྒྱ་གར་གཞུང་གིས་ཐུགས་འཚབ་གནང་དགོས་པ་ཞིག་ཆགས་ཡོད་པ་གསུངས་འདུག 

རྒྱ་གར་གྱི་སྲུང་སྐྱོབ་བློན་ཆེན་མཆོག་ནས་ད་དུང་པ་ཀི་སི་ཐན་ནང་དྲག་པོའི་ཚོགས་པ་མང་པོ་ཞིག་ཡོད་པ་དེ་ཚོ་ཡང་རྒྱ་གར་གྱིས་ཐུགས་འཚབ་གནང་སའི་གནད་དོན་གཞན་ཞིག་ཡིན་པ་དང་། གལ་སྲིད་པ་ཀི་སི་ཐན་གཞུང་གིས་རྒྱ་གར་དང་འབྲེལ་ལམ་བཟང་དུ་གཏང་རྒྱུའི་འདུན་པ་ཡོད་ན། གྱེན་ལོག་ཤོག་ཁག་འམ་དྲག་སྤྱོད་ཚོགས་པ་དེ་ཚོ་མེད་པ་བཟོ་རྒྱུ་དེ་གལ་འགངས་ཆེན་པོ་ཆགས་ཀྱི་ཡོད་པའི་སྐོར་གསུངས་འདུག རྒྱ་གར་གཞུང་གིས་དུས་ཡུན་རིང་པོའི་ནང་པ་ཀི་སི་ཐན་གྱིས་ཡུལ་དེའི་ནང་ཡོད་པའི་འཇིགས་སྐུལ་དྲག་སྤྱོད་པ་ཚོར་གནས་སྡོད་བྱེད་ས་སོགས་མཁོ་འདོན་བྱས་ནས། རྒྱ་གར་དང་ཨ་རི་གཙོས་པའི་རྒྱལ་སྤྱིའི་ཐོག་འཇིགས་སྐུལ་དྲག་སྤྱོད་ཀྱི་གཏོར་རྒོལ་གྱི་བྱ་སྤྱོད་སྤེལ་གྱི་ཡོད་པའི་སྐོར་སྐྱོན་བཙུགས་གནང་ཡོད་པ་རེད༎