བོད་ལ་རང་བཙན་མ་ཡིན་པའི་དེ་མིན་གང་ཡིན་གླེང་ཆོག་སྐོར།

༄༅༎རྒྱ་ནག་གི་འགོ་འཁྲིད་འདས་པོ་ཏེང་ཞའོ་ཕིང་གིས་བོད་རྒྱའི་དཀའ་རྙོག་སེལ་ཕྱོགས་ཐད་བོད་ལ་རང་བཙན་མ་ཡིན་པའི་དེ་མིན་བོད་ཀྱི་གནད་དོན་ག་འདྲ་ཞིག་ཡིན་རུང་གྲོས་མོལ་བྱེད་ཆོག་ཅེས་འདོད་ཚུལ་གསལ་འདོན་གནང་པ་དེ་བཙན་བྱོལ་བོད་གཞུང་གི་བཀའ་བློན་ཁྲི་ཟུར་སྐུའི་གཅེན་པོ་རྒྱལ་ལོ་དོན་གྲུབ་མཆོག་ནས་ཁ་ས་སླར་ཡང་དག་བུད་ར་སྤྲོད་གནང་འདུག

ཉེ་ལམ་བཙན་བྱོལ་བོད་གཞུང་གི་བོད་རྒྱ་འབྲེལ་མོལ་སྐུ་ཚབ་རྣམ་ནས་རྒྱ་ནག་ནང་འབྲེལ་མོལ་ཐེངས་བརྒྱད་པ་གནང་ནས་རྒྱ་གར་རུ་ཕྱིར་ལོག་ཕེབས་རྗེས་རྒྱ་ནག་གི་འཐབ་ཕྱོགས་གཅིག་གྱུར་ལས་ཁང་གི་གཙོ་འཛིན་གཞོན་པ་ཀྲུའུ་ལྦེ་ཆིན་ནས་ཕྱི་ཚེས་བཅུ་ཉིན་རྒྱ་ནག་གི་རྒྱལ་ས་པེ་ཅིང་དུ་གསར་འགོད་ལྷན་ཚོགས་ཤིག་གི་སར་རྒྱ་ནག་གི་འགོ་འཁྲིད་འདས་པོ་ཏེང་ཞའོ་ཕིང་གིས་རང་བཙན་མ་ཡིན་པའི་བོད་ཀྱི་གནད་དོན་ག་འདྲ་ཞིག་ལ་གྲོས་མོལ་བྱེད་ཆོག་སྐོར་གཏམ་བཤད་ཅི་ནས་བྱས་མེད་ལུགས་བརྗོད་ཡོད་པ་རེད། ཁ་ས་ཚེས་བཅུ་དགུ་ཉིན་བཞུགས་སྒར་རྡ་རམ་ས་ལར་བོད་ཀྱི་གནད་དོན་ཐད་བོད་གཞུང་གི་དམིགས་བསལ་ཚོགས་འདུ་དང་སྟབས་བསྟུན་སྟེ་བཙན་བྱོལ་བོད་གཞུང་གི་བཀའ་ཁྲི་ཟུར་པ་སྐུའི་གཅེན་པོ་སྐུ་ངོ་རྒྱལ་ལོ་དོན་གྲུབ་མཆོག་དང་བཀའ་ཁྲི་ཟུར་པ་སྐུ་ངོ་འཇུ་ཆེན་ཐུབ་བསྟན་རྣམ་རྒྱལ་མཆོག་རྣམ་གཉིས་ཀྱི་གསར་འགོད་ལྷན་ཚོགས་ཤིག་གནང་ཡོད་པ་རེད། སྐབས་དེར་ཉི་ཧོང་གི་གསར་འགོད་པ་ཞིག་ནས་ཏེང་ཞའོ་ཕིང་གིས་བོད་ལ་རང་བཙན་མ་གཏོགས་གནད་དོན་གཞན་ག་འདྲ་ཞིག་རུང་གྲོས་མོལ་བྱེད་ཆོག་པའི་གཏམ་བཤད་དེ་བདེན་པ་མིན་ཚུལ་གྱི་གནས་ཚུལ་ལ་བཅར་འདྲི་བྱས་པར་སྐུ་ངོ་རྒྱལ་ལོ་དོན་གྲུབ་མཆོག་ནས་རྒྱ་ནག་གི་འཐབ་ཕྱོགས་གཅིག་གྱུར་ལས་ཁང་གི་གཙོ་འཛིན་གཞོན་པས་དངོས་ཀྱི་གནས་ཚུལ་ལ་འཁྱོག་བཤད་བྱས་པར་ཧང་སངས་ཀྱི་ཚོར་སྣང་དང་ཆབས་ཅིག་གནས་ཚུལ་ངོ་མ་ཇི་ཡིན་སྐོར་དཔང་རྟགས་ར་སྤྲོད་ཀྱི་ལན་འདེབས་དང་གསལ་བཤད་འདི་ལྟར་ངོ་སྤྲོད་གནང་འདུག