རྒྱ་ནག་ནང་འཆམ་མཐུན་གྱི་སྤྱི་ཚོགས་སྐྲུན་རྒྱུའི་སྲིད་བྱུས་སྐོར།

༄༅༎བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་གཟའ་ཕུར་བའི་ཉིན་ཉི་ཧོང་གི་གྲོང་ཁྱེར་ཡོ་ཀོ་ཧ་མ་ནང་ཡོད་པའི་ཉི་ཧོང་གི་སློབ་གྲ་ཆེན་མོའི་སློབ་ཕྲུག་ཚོ་དང་སློབ་གསོའི་ཚན་ཁག་གི་མི་སྣ་དང་ལྷན་དུ་བགྲོ་གླེང་གནང་བའི་སྐབས་ ༧གོང་ས་མཆོག་ནས་རྒྱ་ནག་གི་སྲིད་འཛིན་ཧུའུ་ཇིང་ཐའོ་ཡིས་རྒྱ་ནག་ནང་འཆམ་མཐུན་གྱི་སྤྱི་ཚོགས་སྐྲུན་རྒྱུའི་སྲིད་བྱུས་དེར་བསྔགས་བརྗོད་གནང་ཡོད་པ་དང་འབྲེལ་ སྲིད་བྱུས་དེ་བཞིན་ཡིད་ཆེས་དང་ཡོངས་ཁྱབ་ཀྱི་ཐོག་ནས་ལག་བསྟར་གནང་དགོས་གལ་ཆེ་བ་བཀའ་སྩལ་ཡོད་པ་དང་  ༧གོང་ས་མཆོག་གིས་ རྒྱ་ནག་གཞུང་གིས་དྲག་གནོན་དང་རྡུང་རྡེག་འོག་འཆམ་མཐུན་གྱི་སྤྱི་ཚོགས་ཤིག་སྐྲུན་ཐབས་མེད་པ་གསལ་སྟོན་གནང་ཡོད་ཅིང་ ༧གོང་ས་མཆོག་ནས་ གལ་སྲིད་རྒྱ་ནག་གཞུང་དེ་བཞིན་མི་མང་གིས་བདམས་པའི་སྲིད་གཞུང་ཞིག་ཡིན་ཚེ་ངེས་པར་དུ་མི་མང་གི་རང་དབང་དང་མི་མང་གི་བསམ་བརྗོད་ལ་བརྩི་བཀུར་ཞུ་དགོས་ཀྱི་རེད་ཅེས་བཀའ་སྩལ་འདུག ཡང་བོད་ཀྱི་གནད་དོན་ཐོག་བཀའ་འདྲི་ཞུས་པར་༧གོང་ས་༧སྐྱབས་མགོན་ཆེན་པོ་མཆོག་ནས་བོད་ཀྱི་གནད་དོན་ཐོག་རྒྱ་མི་དང་བོད་མི་་དེ་བཞིན་རྒྱལ་སྤྱིའི་ཚོགས་སྡེའི་ཁྲིམས་རྩོད་སོགས་ཀྱིས་ལྟ་ཕྱོགས་མི་འདྲ་བ་རེ་འཛིན་གྱི་ཡོད་པ་དང་ ང་ཚོས་ལྟ་ཕྱོགས་དེ་ཚོར་ཞིབ་ནན་གྱིས་དབྱེ་ཞིབ་བྱས་ཚེ་སུས་དྲང་པོ་བཤད་ཀྱི་ཡོད་པ་དེ་གསལ་པོ་མཐོང་ཐུབ་ཀྱི་རེད་ཅེས་བཀའ་གནང་ཡོད་པ་དང་ ༧གོང་ས་མཆོག་ནས་མ་འོངས་བོད་ཀྱི་གནས་སྟངས་དེ་བཞིན་ བོད་མི་ཚོའི་ངོས་ནས་རྒྱ་ནག་གི་རྩ་ཁྲིམས་ནང་འཁོད་པ་བཞིན་རང་ཉིད་ཀྱི་རིག་གཞུང་དང་ཆོས་ལུགས་ལ་རང་དབང་ཐོག་ནས་དད་ཞེན་བྱེད་ཆོག་པའི་དེང་དུས་ཀྱི་བོད་ཅིག་ནང་འཚོ་གནས་བྱ་རྒྱུའི་འདོད་མོས་བྱེད་ཀྱི་ཡོད་པ་བཀའ་སྩལ་འདུག