ཧོང་ཀོང་ནང་དོགས་གཞི་ཡོད་པའི་མི་བཅུ་ལ་བརྟག་དཔྱད།

༄༅༎ཁ་ས་ཧོང་ཀོང་གི་འཕྲོད་བསྟེན་ལས་བྱེད་པ་ཚོས་ཨེཇ་༡ཨེན་༡ཞེས་པའི་ཆམ་རིམས་འགོས་པའི་དོགས་གཞི་བྱེད་སའི་ནད་པ་བཅུ་ལ་བརྟག་དཔྱད་གནང་བཞིན་ཡོད་པའི་སྐོར་གསུངས་འདུག

འཕྲོད་བསྟེན་སྲུང་སྐྱོབ་ལྟེ་གནས་ཁང་གི་འགན་འཛིན་ཐོ་མ་སེ་ཚང་གིས་རིམས་ནད་འགོས་ཁྱབ་ཕྱིན་པའི་ས་གནས་ཁག་ལ་འགྲུལ་བཞུད་བྱས་ནས་ཧོང་ཀོང་ནང་ཕྱིར་ལོག་བྱས་པའི་མི་འགའ་ཤས་ལ་ཆམ་རིམས་ལྟ་བུའི་ནད་རྟགས་ཐོན་པའི་མི་གྲངས་བཅོ་ལྔ་ལ་བརྟག་དཔྱད་བྱས་རྗེས་ནད་པ་ལྔ་ལ་ནད་རྟགས་ཐོན་མེད་པ་དང་དེ་མིན་བཅུ་ལ་བརྟག་དཔྱད་མུ་མཐུད་བྱེད་བཞིན་ཡོད་སྐོར་གསར་འགོད་པར་འགྲེལ་བརྗོད་གནང་བཞག རེས་གཟའ་པ་སངས་ཉིན་ཧོང་ཀོང་ནང་གནས་སྡོད་བྱེད་མཁན་མེཀ་སི་ཀོའི་ཡུལ་མི་ལོ་གྲངས་ཉི་ཤུ་རྩ་ལྔ་བྱས་པ་ཞིག་ལ་ཨེཇ་༡ཨེན་༡ཆམ་ནད་ཀྱི་ནད་རྟགས་ཐོན་ཡོད་པ་དེ་ནི་ཨེ་ཤེ་ཡའི་ནང་རིམས་ནད་འགོས་ཁྱབ་བྱུང་བའི་གནས་ཚུལ་ཐོག་མ་དེ་ཡིན་པ་དང་ཁ་ས་བར་མི་དེའི་གནས་སྟངས་བརྟན་པོ་ཡོད་པའི་སྐོར་འཕྲོད་བསྟེན་སྲུང་སྐྱོབ་ལྟེ་གནས་ཁང་གི་འགན་འཛིན་ཐོ་མ་སེ་ཚང་གིས་གསུངས་འདུག

མེཀ་སི་ཀོའི་ཡུལ་མི་ནད་པ་དེ་གནས་སྡོད་བྱེད་སའི་མགྲོན་ཁང་གི་ལས་བྱེད་པ་དང་འགྲུལ་པ་སུམ་བརྒྱ་ཙམ་ཡོད་པ་དེ་རྣམས་ཉིན་བདུན་རིང་ཟུར་བཀག་བྱས་ཡོད་ནའང་མགྲོན་ཁང་ལ་ཕྱིར་ལོག་མ་བྱས་པའི་འགྲུལ་པ་ལྔ་བཅུ་ཙམ་ཡོད་པ་དེ་ཚོ་ད་ཆ་ག་བར་ཡོད་མེད་རྩད་གཅོད་བྱེད་བཞིན་ཡོད་པ་དང་ཁོང་ཚོ་ཧོང་ཀོང་ནས་ཕྱིར་ཐོན་བྱེད་མ་ཐུབ་པའི་ཆེད་དུ་ཕྱི་མི་གཞིས་ཆགས་ལས་ཁུངས་ཀྱི་ལས་བྱེད་པ་ཚོར་ཁོང་ཚོའི་མིང་ཐོ་སྤྲད་ཡོད་པའི་སྐོར་འཕྲོད་བསྟེན་འགན་འཛིན་ཚང་གིས་འགྲེལ་བརྗོད་གནང་འདུག།