གྲྭ་འཆི་མེད་དཔལ་ལྡན་འདས་གྲོངས་སུ་གྱུར་བ།

༄༅།།ཟླ་བ་གསུམ་པའི་ཚེས་༣༠ཉིན་ རྔ་པ་རྒྱལ་རོང་ཚོ་བདུན་ཀིརྟི་དགོན་པའི་དགེ་འདུན་པ་བསྟན་པ་དར་རྒྱས་དང་འཆི་མེད་དཔལ་ལྡན་ལགས་གཉིས་ཀྱིས་རྒྱ་གཞུང་གི་དྲག་གནོན་ལ་ངོ་རྒོལ་གྱིས་རང་ལུས་མེར་བསྲེགས་བཏང་རྗེས་ཚེས་ ༣༡ ཉིན་གྱི་ཞོགས་པའི་དུས་ཚོད་ ༥ཙམ་ལ་རྒྱ་གཞུང་འབྲེལ་མི་སྣས་ཀིརྟི་དགོན་པར་རུས་ཐལ་ཞིག་སྤྲད་དེ་འཆི་མེད་དཔལ་ལྡན་ལགས་འདས་གྲོངས་སུ་གྱུར་ཟིན་པ་བརྗོད་ཡོད་པ་རེད། དེ་རྗེས་དགོན་པའི་གྲྭ་མང་གིས་ཀུན་རིག་རྣམ་པར་སྣང་མཛད་ཀྱི་སྒོ་ནས་རྗེས་འཇུག་གི་ཆོ་ག་སྒྲུབ་བཞིན་ཡོད་པ་དང་། བསྟན་པ་དར་རྒྱས་ལགས་ཀྱང་ད་ལྟ་ སྨན་ཁང་དུ་ཡོད་ཀྱང་། མེར་བསྲེགས་ཚབས་ཆེན་ཐེབས་ཡོད་སྟབས་གསོན་ཐབས་ཀྱི་རེ་བ་བྲལ་ཡོད་ལུགས་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་ལགས་གཉིས་ཀྱིས་གནས་ཚུལ་སྤེལ་འདུག།  དེཉིན་བོད་ནང་གི་མཚན་མོའི་དུས་ཚོད་ ༩ཙམ་ལ་ས་གནས་གྱི་སེར་སྐྱ་མི་མང་བརྒྱ་ལྷག་ཁུལ་སྨན་ཁང་སྒོ་ཁར་འཛོམས་ཏེ། དགེ་འདུན་པ་གཉིས་ཤི་གསོན་གནས་ཚུལ་གང་བྱུང་ཡོད་ཀྱང་ཁོང་གཉིས་ཕྱིར་སྤྲོད་དགོས་པ་དང་། སྨན་ཁང་ནང་དུ་ལྟ་རུ་འགྲོ་དགོས་པའི་རེ་འདུན་བཏོན་ཏེ་ངུ་འབོད་ཞུ་སྐུལ་ཤུགས་ཆེ་བྱེད་སྐབས་མང་ཚོགས་ལ་གཅར་རྡུང་བྱས་ཏེ་མི་མང་པོར་རྨས་སྐྱོན་ཕོག་ཡོད་པ་མ་ཟད། མི་མང་པོ་ཞིག་འཇུ་བཟུང་གིས་བཀག་ཉར་བྱས་ཡོད་འདུག།