སྐྱབས་རྗེ་བླ་མ་༧ཐུབ་བསྟན་བཟོད་པ་རིན་པོ་ཆེ་མཆོག་དགོངས་པ་རྫོགས་འདུག

འཛམ་གླིང་ཤར་ནུབ་སྤྱི་དང་ཁྱད་པར་དུ་ནུབ་ཕྱོགས་ཡུལ་གྲུ་ཁག་གི་ནང་། བོད་བརྒྱུད་ནང་བསྟན་གྱི་ཆོས་ལུགས་དང་། ལྷག་པར་དུ་རི་བོ་དགེ་ལུགས་པའི་བསྟན་པ་འཛིན་སྐྱོང་སྤེལ་གསུམ་ལ་བྱས་རྗེས་དང་ཤུགས་རྐྱེན་འབུར་ཐོན་ཡོད་པ། སྐྱབས་རྗེ་བླ་མ་༧ཐུབ་བསྟན་བཟོད་པ་རིན་པོ་མཆོག སྤྱི་ཟླ་༤པའི་ཚེས་༡༣ཉིན་བལ་ཡུལ་དུ་ཞོགས་པ་ཆུ་ཚོད་༩དང་ཕྱེད་ཀར་དགུང་ལོ་༧༨ཐོག་དགོངས་པ་རྫོགས་ཡོད་འདུག དེའི་ཐད་བཟོད་པ་རིན་པོ་ཆེའི་ཆོས་ཚོགས་ཐེག་ཆེན་འཛིན་སྐྱོང་ཚོགས་པས་གསལ་བསྒྲགས་སྤེལ་བའི་ནང་། བླ་མ་བཟོད་པ་རིན་པོ་མཆོག་ཉིན་ཤས་སྔོན་བལ་བོད་ས་མཚམས་ཀྱི་བཙུམ་ས་གནས་སུ་ཆིབས་བསྒྱུར་གནང་སྐབས། ལ་དུག་གང་འཚམས་ཕོག་ནས་ལྗགས་དབུགས་ཧལ་བའི་རྐྱེན་གྱིས་འཕྲལ་དུ་ས་དམའ་སར་བབས་ཏེ་སྨན་པ་བསྟེན་གཏུག་གནང་ཡོད་ནའང་། ཕན་ཐོགས་མ་བྱུང་བར་ལྗགས་དབུགས་ཡལ་ཏེ་ཐུགས་དམ་དུ་བཞུགས་ཡོད་པར་བརྟེན། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ནས་ལམ་སྟོན་ཕེབས་པ་བཞིན། ད་ཆ་བླ་མ་རྒྱུད་པ་རྣམས་ཀྱིས་སྒྲོལ་མ་ཙིཏྟཱ་མ་ཎིའི་བླ་མའི་རྣལ་འབྱོར་གྱི་སྒོ་ནས་དགོངས་རྫོགས་མཆོད་འབུལ་གནང་བཞིན་པ་འཁོད་འདུག

བླ་མ་བཟོད་པ་རིན་པོ་ཆེ་མཆོག་ལ་འཛམ་གླིང་ཤར་ནུབ་གང་སར་རི་བོ་དགེ་ལྡན་པའི་ཆོས་བརྒྱུད་འཛིན་པའི་ཆོས་ཚོགས་དང་། བཙུན་དགོན། དགོན་པ་བཅས་ཧ་ཅང་མང་པོ་ཡོད་པ་མ་ཟད། ལྷག་པར་ཁོང་གི་གསུང་རྩོམ་དེབ་ཧ་ཅང་མང་པོ་ཞིག་སྐད་ཡིག་སྣ་ཚོགས་ཀྱི་ནང་ཕབ་བསྒྱུར་ཞུས་ཡོད་པ་རེད།
བླ་མ་ཐུབ་བསྟན་བཟོད་པ་རིན་པོ་ཆེ་མཆོག་ནི། སྤྱི་ལོ་༡༩༤༦ལོར་བོད་དང་ས་མཚམས་ཀྱི་བལ་བོའི་ནང་གི་ཤར་ཁུམ་བུའི་ས་གནས་སུ་འཁྲུངས་ཤིང་། སྐུ་ན་ཆུང་དུས་ནས་བོད་ནང་སློབ་སྦྱོང་དུ་ཕེབས་ཡོད་པ་མ་ཟད། སྤྱི་ལོ་༡༩༧༤ཙམ་ནས་ནུབ་ཕྱོགས་སུ་ཆིབས་བསྒྱུར་དང་ཆོས་འཆད་སྤེལ་གྱིས། ཐེག་ཆེན་འཛིན་སྐྱོང་ཚོགས་པ་དང་དགའ་ལྡན་ཆོས་ཚོགས་སོགས་བཙུགས་ཏེ་འགན་འཛིན་དུ་བཞུགས་པའི་ཡན་ལག་ཏུ། ཨེ་ཤེ་ཡ་དང་ཡོ་རོབ། བྱང་ཨ་མི་རི་ཀ་བཅས་རྒྱལ་ཁབ་༣༧ནང་རི་བོ་དགེ་ལྡན་པའི་ཆོས་བརྒྱུད་འཛིན་པའི་ཆོས་ཚོགས་དང་དགོན་སྡེ་བརྒྱ་དང་ལྔ་བཅུ་ལྷག་ཡོད་པ་རེད།
བླ་མ་ཐུབ་བསྟན་བཟོད་པ་རིན་པོ་ཆེ་མཆོག་གིས་བར་ལམ་སྤྱི་ལོ་༢༠༢༢སྤྱི་ཟླ་༡༡པའི་ཚེས་༢ཉིན་བཞུགས་སྒར་ཕོ་བྲང་དུ། བོད་མིའི་དབུ་ཁྲིད་༧གོང་ས་མཆོག་ལ་གཟིམ་ཆུང་མཇལ་ཁ་ཞུས་ཡོད་པ་དང་། སྐབས་དེར་རིན་པོ་ཆེ་མཆོག་ནས་ལོ་མང་རིང་བླ་མ་བཟོད་པ་རིན་པོ་ཆེའི་རྒན་དམ་པ་ཐུབ་བསྟན་ཡེ་ཤེས་ལགས་ནས། ཕྱི་རྒྱལ་ཡུལ་གྲུ་ཁག་ཏུ་ནང་ཆོས་ཁྱབ་སྤེལ་གྱི་དཀའ་ལས་བརྒྱབས་པར་༧གོང་ས་མཆོག་ཧ་ཅང་གིས་ཐུགས་དགྱེས་ཚོར་ཆེན་པོ་གནང་གི་འདུག་ཅེས་འགྲེལ་བརྗོད་གནང་གི་འདུག
གཞན་ཡང་བླ་མ་ཐུབ་བསྟན་བཟོད་པ་རིན་པོ་ཆེར་ཐུགས་རྒྱུས་ཆེ་བའི་ཚེ་རིང་མཆེད་ལྔའི་སྐུ་རྟེན་མཁའ་འགྲོ་ལགས་ནས་ཀྱང་། རིན་པོ་ཆེའི་སློབ་ཚོགས་ལ་འཆི་བ་མི་རྟག་པ་སྒོམ་པ་དང་ལམ་རིམ་བློ་སྦྱོང་སོགས་གང་ཐུབ་ཉམས་ལེན་གྱིས་བླ་མའི་ཐུགས་དགོངས་རྫོགས་པ་ཞིག་བྱ་དགོས་པའི་ལམ་སྟོན་ལྟར་གནང་གི་ཡོད་པ་ཐེག་ཆེན་འཛིན་སྐྱོང་ལྷན་ཚོགས་ཀྱི་གསལ་བསྒྲགས་སུ་འཁོད་འདུག།

གསར་འགོད་པ། བློ་བྷེ།
རྩོམ་སྒྲིག་པ། བཀྲ་ཤིས་དབང་ཕྱུག
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།