རྒྱ་ནག་གི་སློབ་གྲྭའི་ནང་ཕག་པའི་རིམས་ནད་ཐོན་པ།

༄༅༎དེ་རིང་རེས་གཟའ་ཉི་མའི་ཉིན་རྒྱ་ནག་གཞུང་གིས་ཤིན་ཧ་གསར་ཤོག་ཐོག་ལ་རྒྱ་ནག་གི་ལྷོ་ནུབ་ཀྲོང་ཆིང་གི་སློབ་གྲྭ་ཁག་གསུམ་ནང་དུ་དེ་རིང་སྔ་དྲོའི་ཚོུད་དགུ་པའི་བར་ཏུ་H1N1ནད་འབུ་འགོས་ཁྱབ་ཟིན་པའི་ནད་པ་ཉི་ཤུ་རྩ་བདུན་བྱུང་ཡོད་པའི་གནས་ཚུལ་སྤེལ་ཡོད་པ་རེད།

ཀྲོང་ཆིང་ས་གནས་འཕྲོད་བསྟེན་དཔོན་རིགས་ནས་གསུངས་ན་H1N1འགོས་ནད་དེ་ནི་འགོས་ཁྱབ་ཟིན་པའི་ནད་པ་ཉི་ཤུ་རྩ་བདུན་ནང་ནས་ནད་པ་བཅོ་ལྔ་ནི་ལྷོ་ནུབ་ཕེང་དྲུ་མཐོ་རིམ་སློབ་གྲྭ་ཡིན་པ་དང་དེ་ནས་དགུ་ནི་ཏ་ཛུ་ས་གནས་ཀྱི་ཤི་ཁྲན་དམའ་རིམ་སློབ་གྲྭ་དང་དེ་འཕྲོས་ཀྱི་ནད་པ་གསུམ་ཀྲོང་ཤན་ས་གནས་ཀྱི་ཤིན་ལི་དམའ་རིམ་སློབ་གྲྭ་བཅས་གསུམ་ཡིན་པ་བཤད་ཡོད་ཅིང་ནད་གཞི་ཛ་དྲག་པོ་མེད་པ་དང་ད་ལྟའི་ཆར་ནད་པ་རྐྱེན་འདས་སུ་ཕྱིན་པའི་གནས་ཚུལ་བྱུང་མེད་པ་བཤད་ཡོད་པ་རེད། ད་ལྟའི་ཆར་ཤི་ཁྲན་དམའ་རིམ་སློབ་གྲྭ་སྒོ་རྒྱབ་པ་དང་ཞི་ལིང་དམའ་རིམ་སློབ་གྲྭའི་ནང་གི་ནད་པ་ཐོན་ཡུལ་གྱི་འཛིན་གྲྭ་རྣམས་གནས་སྐབས་སློབ་ཁྲིད་མཚམས་འཇོག་བྱས་པ་དང་མཐོ་རིམ་སློབ་གྲྭ་དེའི་ནང་གི་ནད་པ་རྣམས་ཟུར་ཏུ་བལྟ་རྟོགས་འོག་བཞག་ཡོད་ཅིང་ད་དུང་དེ་རིང་བར་དུ་རྒྱ་ནག་གི་བྱང་ཕྱོགས་ཧེ་སྦེ་ཞིང་ཆེན་གྱི་ལང་ཕང་གྲོང་ཁྱེར་གྱི་མཐོ་རིམ་སློབ་གྲྭ་ཁག་བཞིའི་ནང་མི་དྲུག་ཅུ་རེ་བདུན་གྱིས་H1N1ནད་འབུ་འགོས་ཁྱབ་ཟིན་པའི་ནད་པ་དང་འབྲེལ་གཏུགས་བྱུང་ཡོད་པ་ཤེས་རྟོགས་བྱུང་བ་བཤད་ཡོད་པ་རེད། H1N1ཟེར་བའི་འགོད་ནད་དེ་ནི་ད་དུང་རྒྱ་ནག་གི་ས་ཁུལ་གཞན་དག་གི་སློབ་གྲྭ་ཁག་ནང་འགོས་ཁྱབ་ཕྱིན་ཡོད་པའི་གནས་ཚུལ་ཐོན་ཡོད་ཅིང་དེ་ནི་རྒྱ་ནག་གི་ཧེ་ནན་དང་ཟི་ཁྲོན་ ཧྲན་ཤི་ ཧྲན་ཏུང་ ཧུ་ནན་ ཅང་སུ་ཞིང་ཆེན་དང་ད་དུང་ཀུང་ཤི་ཀྲུང་རང་སྐྱོང་ས་ཁུལ་སོགས་ཡིན་ཞིང་རེས་གཟའ་པ་སངས་ཉིན་རྒྱ་ནག་འཕྲོད་བསྟེན་ལྷན་ཁང་གིས་རྒྱ་ནག་ནང་དུ་འགོད་ནད་དེ་འགོས་ཁྱབ་ཟིན་པའི་ནད་པ་ནི་བཞི་སྟོང་ལྔ་བརྒྱ་ཙམ་བྱུང་ཡོད་པ་དང་དེའི་ནང་ནས་ནད་པ་གསུམ་སྟོང་ལྷག་དྲག་སྐྱེས་བྱུང་སྟེ་རྒྱ་ནག་ནང་འགོས་ནད་དེ་རྐྱེན་པས་ནད་པ་འདས་གྲོངས་ཕྱིན་པ་བྱུང་མེད་ཅེས་བཤད་ཡོད་པ་རེད།