བལ་ཡུལ་ཆེས་མཐོའི་ཁྲིམས་ཁང་ནས་བོད་མི་གསུམ་གློད་འགྲོལ།

༄༅༎བལ་ཡུལ་ནང་དུ་གནས་སྡོད་བོད་མིས་རྒྱ་ནག་གཞུང་ལ་ངོ་རྒོལ་ལས་འགུལ་སྤེལ་བའི་ནག་ཉེས་ཉེས་འཛུགས་ཀྱིས་བལ་པོའི་གཞུང་གིས་དོ་དམ་བཀག་ཉར་བྱས་པའི་ཁོངས་ནས་བོད་མི་གསུམ་བལ་པོའི་ཆེས་མཐོའི་ཁྲིམས་ཁང་གིས་གློད་བཀྲོལ་གཏོང་དགོས་པའི་བཀའ་ཁྱབ་གནང་ཡོད་པ་རེད།

བལ་པོའི་ཆེས་མཐོའི་ཁྲིམས་ཁང་གིས་རེས་གཟའ་ཟླ་བའི་ཉིན་བོད་མི་གསུམ་པོ་གློད་བཀྲོལ་གཏོང་དགོས་པའི་བཀའ་ཁྱབ་ནང་གསལ། བོད་མི་གསུམ་པོ་དེ་རྣམས་ཀྱིས་སྤྱི་ཚོགས་ཀྱི་བདེ་འཇགས་ལ་ཉེན་ཁ་བཟོ་བའི་ཁུངས་བསྐྱེལ་དཔང་རྟགས་གང་ཡང་མེད་པ་དང། བལ་ཡུལ་གཞུང་གིས་འཕྲལ་དུ་བོད་མི་གསུམ་པོ་གློད་བཀྲོལ་གཏོང་དགོས་ཞེས་བཀོད་ཡོད་ཅིང། ཉེ་ཆར་ཕྱི་ཟླ་གསུམ་པའི་ནང་བོད་མི་ཚོས་རྒྱ་ནག་གཞུང་ལ་ངོ་རྒོལ་ལས་འགུལ་སྤེལ་ཏེ། བལ་ཡུལ་རྒྱལ་སའི་ནང་དུ་ཡོད་པའི་རྒྱ་ནག་གི་ཐོངས་མཆན་ལག་འཁྱེར་སྤྲོད་སའི་ལས་ཁུངས་མདུན་དུ་རྣོ་ངར་ཆེ་བའི་ལས་འགུལ་སྤེལ་ཐབས་བྱས་པར་བརྟེན་བལ་པོའི་ཉེན རྟོག་པས་བོད་མི་ཉི་ཤུ་རྩ་གྲངས་ཞིག་འཛིན་བཟུང་བྱས་པའི་ཁོངས་སུ་བོད་མི་གསུམ་པོ་ཡང་འཛིན་བཟུང་བྱས་ཡོད་པ་རེད། སྐབས་དེ་དུས་བལ་པོའི་གཞུང་གིས་བོད་མི་༢༣དེ་དག་ནི་བལ་པོའི་སྤྱི་ཚོགས་ཀྱི་བདེ་འཇགས་ཀྱི་ཁྲིམས་ལུགས་འབྲུ་དོན་འོག་ཉིན་གྲངས་༩༠ བཙོན་ཁང་དུ་དོ་དམ་བཀག་ཉར་བྱེད་རྒྱུའི་བཀའ་ཁྱབ་བཏང་ཡོད་པ་དང། དེར་བརྟེན་བོད་མི་ཚོས་བལ་པོའི་གཞུང་གི་ཐག་གཅོད་དེར་གདོང་ལེན་བྱེད་རྒྱུའི་ཆེད་དུ་ཁྲིམས་ཁང་དུ་ཁོང་ཚོས་སྤྱི་ཚོགས་ཀྱི་བདེ་འཇགས་ལ་ཉེན་ཁ་བཟོ་བའི་ལས་དོན་སྤེལ་མེད་པའི་ཞུ་གཏུགས་བྱས་པར་བརྟེན་ནས། ཆེས་མཐོའི་ཁྲིམས་ཁང་ནས་བོད་མི་གསུམ་པོ་དེ་དག་གིས་སྤྱི་ཚོགས་བདེ་འཇགས་ལ་ཉེན་ཀ་བཟོ་རྒྱུའི་ཁུངས་བསྐྱེལ་དཔངས་རྟགས་མེད་པ་འགྲེལ་བརྗོད་གནང་སྟེ། བལ་པོའི་གཞུང་ལ་བོད་མི་གསུམ་པོ་འཕྲལ་དུ་གློད་བཀྲོལ་གཏོང་དགོས་པའི་བཀའ་ཁྱབ་བཏང་བ་བཞིན་གློད་བཀྲོལ་ཐོབ་ཡོད་ཀྱང། ད་དུང་བོད་མི་ཉི་ཤུ་མུ་མཐུད་བལ་པོའི་བཙོན་ཁང་དུ་དོ་དམ་བཀག་ཉར་འོག་གནས་བཞིན་ཡོད་པ་རེད།