བལ་ཡུལ་གྱི་སྲིད་བློན་རྒྱ་ནག་ཏུ་འཚམས་གཟིགས་ཕེབས་འདུག

༄༅༎བལ་ཡུལ་གྱི་སྲིད་བློན་གསར་པ་མའོ་ཤོག་ཁག་གི་འགོ་ཁྲིད་ པར་ཅན་རྡ་ གཟའ་སྤེན་པའི་ཉིན་རྒྱ་ནག་ཏུ་པེ་ཅིང་ཨོ་ལིམ་པིག་རྩེད་འགྲན་མཇུག་སྡོམ་མཛད་སྒོའི་ཐོག་བཞུགས་རྒྱུར་བལ་ཡུལ་ནས་པེ་ཅིང་དུ་ཐོན་ཡོད་པ་རེད།

དེ་ནི་པར་ཅན་རྡ་བལ་ཡུལ་གྱི་སྲིད་བློན་དུ་འདེམས་ཐོན་བྱུང་བའི་རྗེས་ཕྱི་རྒྱལ་རྒྱལ་ཁབ་ཏུ་འཚམས་གཟིགས་སུ་བསྐྱོད་པ་ཐོག་མ་དེ་ཡིན་པ་དང༌། རྒྱ་ནག་ནང་འཚམས་གཟིགས་གནང་བའི་རིང་ རྒྱ་ནག་གི་སྲིད་འཛིན་ཧུའུ་ཇིན་ཐའོ་སོགས་དཔོན་རིགས་ཚོ་དང་མཇལ་མོལ་གནང་ནས་བལ་ཡུལ་ནང་འདས་པའི་ལོ་ངོ་བཅུ་གྲངས་རིང་ནང་འཁྲུག་གིས་རྐྱེན་པས་དཔལ་འབྱོར་གནས་སྟངས་ཧ་ཅང་ཉམས་ཉེས་ཕྱིན་ཡོད་པ་རྣམས་སླར་གསོ་ཡོང་རྒྱུའི་གནད་དོན་སོགས་ཀྱི་ཐོག་རྒྱ་ནག་གི་དཔོན་རིགས་དང་གྲོས་མོལ་གནང་རྒྱུ་དང་འབྲེལ། རྒྱ་ནག་གཞུང་གིས་བལ་ཡུལ་ནང་རང་དབང་ཚོང་འབྲེལ་འཛུགས་རྒྱུའི་ཐོག་རྒྱབ་སྐྱོར་ཡོངས་ཐབས་བྱ་རྒྱུ་སོགས་ཀྱི་སྐོར་གྲོས་མོལ་བྱ་རྒྱུའི་འཆར་གཞི་ཡོད་པ་རེད། པར་ཅན་རྡ་བལ་ཡུལ་གྱི་སྲིད་བློན་དུ་འོས་འདེམས་བྱུང་བའི་རྗེས་བརྙན་འཕྲིན་ཐོག་གསུང་བཤད་གནང་བའི་ནང་ བལ་ ཡུལ་གྱི་གཞུང་གསར་པས་བལ་ཡུལ་ནང་དཔལ་འབྱོར་འཕེལ་རྒྱས་དང༌། ཞི་བའི་ཐོག་ནས་བཟོ་ལས་ཐོན་སྐྱེད་སྐུལ་སྤེལ་བཏང་སྟེ་ ལས་ཤོར་མི་སྣའི་གནད་དོན་ཐག་གཅོད་བྱས་ནས་ མང་ཚོགས་ཚོར་འཚོ་བའི་མཁོ་འབྱེད་འདེངས་ངེས་མཁོ་འདོན་བྱ་ཐུབ་པའི་ཁས་ལེན་བྱ་རྒྱུ་ཡིན་ལུགས་བརྗོད་ཡོད་པ་རེད།