ཕྲུ་གུ་དམར་མཆོད་ཕུལ་བའི་དོགས་གཞི་དང་འཇུ་བཟུང་།

བལ་ཡུལ་ནང་ཕྲུ་གུ་ལོ་བཅུ་ལ་སོན་པ་ཞིག་བསད་ནས་དམར་མཆོད་ཕུལ་བའི་དོགས་གཞིའི་འོག་མི་བཅུ་གཅིག་འཇུ་བཟུང་བྱས་འདུག
དེ་ཡང་འདི་ཚེས་༢༦རེས་གཟའ་ཉི་མའི་ཉིན་བལ་ཡུལ་ནས་ཧྥ་རན་སུའི་གསར་ལས་ཁང་AFPགིས་གནས་ཚུལ་སྤེལ་དོན། བལ་ཡུལ་ལྷོ་ནུབ་ཀྱི་གྲོང་གསེབ་ཅིག་ཏུ་རང་ལོ་བཅུ་ལ་སོན་པའི་ན་གཞོན་ཇི་ཝན་ཀོ་ཧར་Jivan Koharགར་སོང་ཆ་མེད་དུ་གྱུར་བའི་ཕུང་པོ་རེས་གཟའ་པ་སངས་ཉིན་ནྭ་ཝལ་པ་ར་སི་Nawalparasiརྫོང་གི་ཀུ་དྷི་ཡ་Kudiyaགྲོང་གསེབ་ཀྱི་ཤིང་ནགས་ནང་ནས་བརྙེད་ཡོད་པ་དང་། ཁོ་བོའི་མིད་པ་གྲིས་བཅད་ནས་བསད་ཡོད་སྐོར་ཉེན་རྟོག་པའི་དཔོན་རིགས་ནལ་པ་ར་སདྷ་ཨུ་པ་དྷ་ཡས་Nal Prasad Upadhayayaའགྲེལ་བརྗོད་གནང་འདུག བུ་དེ་གསོད་མཁན་རྩད་གཅོད་བྱས་པའི་སྐབས་ གྲོང་གསེབ་དེའི་ཕ་རྒན་ཞིག་གིས་ཁོ་པའི་བུ་ནད་པ་ཡིན་པ་དང་། རང་གི་བུ་དྲག་བསྐྱེད་ཡོང་ཐབས་སུ་གྲོང་གསེབ་ཀྱི་ལྷ་འདྲེ་གསོལ་མཁན་བླ་མས་སློབ་སྟོན་གནང་བ་བཞིན་ལོ་༡༠ལ་སོན་པའི་བུ་ཇི་ཝན་ཀོ་ཧར་ཟེར་བར་ཁ་ཟས་རྔན་པ་སྤྲད་པ་དང་། དེ་རྗེས་བལ་སྒོར་ལྔ་བཅུ་སྤྲོད་རྒྱུའི་ཁས་ལེན་བྱས་ནས་བསླུ་བྲིད་བྱས་ཏེ་ས་ཆ་ཁུག་སྐྱོག་ཞིག་ཏུ་འཁྲིད་ནས་མིད་པ་བཅད་ནས་བསད་དེ་དམར་མཆོད་ཕུལ་རྗེས་བུ་དེའི་ཕུང་པོ་ཤིང་ནགས་ནང་གཡུགས་བཞག་པ་ཡིན་ཞེས་ཕ་རྒན་དེས་ངོས་ལེན་བྱས་ཡོད་འདུག སྐབས་དེར་ཁ་པར་རོགས་པ་བྱེད་མཁན་སྐྱེས་པ་བདུན་དང་། བེུད་བཞི་བཅས་ཁྱོན་བཅུ་གཅིག་འཛིན་བཟུང་གིས་ནག་ཉེས་བཙུགས་ཟིན་ལུགས་ཉེན་སྲུང་འགན་འཛིན་ཨུ་པ་དྷ་ཡ་ཡ་ཡིས་གསུངས་པ་ཧྥ་རན་སུའི་གསར་ལས་ཁང་ལ་འགྲེལ་བརྗོད་གནང་ཡོད་འདུག
བལ་ཡུལ་གྱི་མི་འབོར་ས་ཡ་༢༨ནས་བརྒྱ་ཆ་༨༠ལྷག་ཧིན་རྡུ་པ་དང་། ཁོང་ཚོས་ར་དང་། མ་ཧེ། ཁྱིམ་བྱ་སོགས་དམར་མཆོད་ཕུལ་སྲོལ་དོར་མེད་པ་རེད། འཛིན་བཟུང་བྱས་པའི་མི་གཅིག་གིས་ནག་ཉེས་ངོས་ལེན་དང་སྦྲགས་བུ་ནད་པ་དེར་ལྷ་འདྲེ་ཞུགས་ཡོད་པས་དམར་མཆོད་མ་གཏོགས་དེ་མིན་བཅོས་ཐབས་མེད་ལུགས་ངོས་ལེན་བྱས་ཡོད་ལུགས་ཧི་མ་ལ་ཡའི་དུས་བབ་(The Himalayan Times)ཞེས་པས་ལུང་འདྲེན་བྱས་འདུག

གསར་འགོད་པ་ཀརྨ་རྒྱ་མཚོ།