བོད་དུ་མེ་འཁོར་ལྕཌ་ལམ་བཟོས་པའི་དམིགས་ཡུལ་ཇི་ཡིན་སྐོར།

༄༅༎རང་བྱུང་གཏེར་གྱིས་ཕྱུག་པའི་བོད་གངས་ཅན་ལྗོངས་ནས་གཏེར་ཁ་ཕོན་ཆེ་རྒྱ་ནག་གི་བཟོ་གྲྭ་ཆེས་མང་པོའི་དགོས་མཁོ་འོར་འདྲེན་དང་ཕྱོགས་མཚུངས་བོད་ནང་བོད་མིར་དྲག་གནོན་ལ་དམིགས་ཏེ་རྒྱ་ནག་ནས་དམག་མི་ཕོན་ཆེ་འགྲུལ་བཞུད་སོགས་ཀྱི་ཆེད་རྒྱ་ནག་ནས་བོད་ཀྱི་རྒྱལ་ས་ལྷ་སར་བར་མེ་འཁོར་ལྕགས་ལམ་གསར་བཟོ་བྱས་པའི་གནད་དོན་འཁོད་པའི་རྒྱ་ནག་གི་མེ་འཁོར་བོད་ཀྱི་ཡིད་གདུང་ངམ་བྱུས་ཉེས་ཞེས་པའི་དེབ་ཅིག་བཙན་བྱོལ་བོད་གཞུང་ཕྱི་དྲིལ་ལྷན་ཁང་གི་ཁོར་ཡུག་དང་འཕེལ་རྒྱས་སྡེ་ཚན་གྱིས་འགྲེམས་སྤེལ་གནང་འདུག འདས་པའི་ལོ་ངོ་ལྔ་བཅུའི་རིང་རྒྱ་ནག་གཞུང་གིས་གོང་ཞུས་དམིགས་ཡུལ་དོན་འཁྱོལ་འབྱུང་ཐབས་སུ་ཕྱགས་རྒྱངས་རིང་པོའི་ངན་བྱུས་བཏིང་ཡོད་ཅིང་ཕྱི་ལོ་༡༩༦༡ལོར་རྒྱ་ནག་གི་ལན་ཀྲོའུ་ནས་བོད་ཀྱི་ཟི་ལིང་བར་མེ་འཁོར་ལྕགས་ལམ་བཏིང་སྟེ་འགྲུལ་བཞུད་ཐུབ་པ་བྱུང་བ་ནས་བཟུང་རྒྱ་ནག་གཞུང་གིས་བོད་ཀྱི་རྒྱལ་ས་ལྷ་ས་བར་མེ་འཁོར་ལྕགས་ལམ་འདིང་རྒྱུའི་འཆར་གཞི་ངེས་ཅན་བཀོད་པ་ཡིན་པ་རེད། བོད་ཀྱི་རྒྱལ་ས་ལྷ་ས་བར་མེ་འཁོར་ལྕགས་ལམ་བཏིང་པའི་དམིགས་ཡུལ་ནི་བོད་ཀྱི་གཏེར་ཁ་བསྔོག་འདོན་ཇི་ཐུབ་རྒྱ་ནག་ལ་འོར་འདྲེན་དང་རྒྱ་ནག་ནས་རྒྱ་མི་རིགས་ཕོན་ཆེ་བོད་ནང་གཞིས་སྤོས་བྱས་ཏེ་བོད་ཀྱི་ཡུལ་ནང་བོད་མི་རྣམས་གྲངས་ཉུང་མི་རིགས་ཅིག་ཏུ་འགྱུར་རྒྱུ་མ་ཟད་དགོས་གལ་བྱུང་ན་བོད་ནང་དྲག་གནོན་ཆེད་གུང་གྲན་ཏང་གི་དམག་མི་ཕོན་ཆེ་དུས་གཅིག་ཏུ་མེ་འཁོར་ནང་འོར་འདྲེན་ཐུབ་པའི་མཐུན་རྐྱེན་སྦྱོར་རྒྱུའི་དམིགས་ཡུལ་འགྲུབ་པ་ཡིན་སྐོར་གོང་ཞུས་རྒྱ་ནག་གི་མེ་འཁོར་བོད་ཀྱི་ཡིད་གདུང་ཞེས་པའི་དེབ་དེའི་ནང་བཀོད་ཡོད་པ་རེད། གོར་མོ་ནས་ལྷ་ས་བར་རི་ལིའི་ལྕགས་ལམ་བཏིང་ནས་མེ་འཁོར་འགྲུལ་བཞུད་འཛུགས་སྐྲུན་བྱས་པའི་ཁེ་ཕན་བོད་མི་རིགས་ལ་འཐོབ་ཀྱི་ཡོད་དམ་ཡང་ན་བོད་མི་རིགས་ཀྱི་གནས་སྟངས་སྔར་ལས་ཇེ་སྡུག་ཏུ་གཏོང་རྒྱུའི་རྒྱུ་རྐྱེན་དུ་འགྲོ་གཉིས་འབྱུང་འགྱུར་བལྟ་ཞིབ་བྱ་རྒྱུའི་གནད་དོན་ཞིག་ཏུ་འགྱུར་ཡོད་ལུགས་དེབ་དེའི་ནང་འགྲེལ་བརྗོད་གནང་ཡོད་སྐོར་བཙན་བྱོལ་བོད་གཞུང་གི་དྲ་རྒྱའི་ནང་བཀོད་གནང་འདུག