བོད་མི་ཞིག་རྒྱ་མིའི་ཉེས་བརྡུང་འོག་འདས་གྲོངས་སུ་ཕྱིན་ཡོད་པ།

༄༅༎བོད་ཚྭ་བ་མཛོ་སྒར་རྫོང་ནང་བོད་རང་བཙན་གྱི་སྐད་འབོད་སྐྱོན་མཁན་བོད་མི་གསུམ་ནང་ནས་ལོ་གྲངས་ཉི་ཤུ་རྩ་བཞི་ཡིན་པའི་པད་མ་ཚེ་པ་ལགས་རྒྱ་མིའི་ཉེས་བརྡུང་འོག་འདས་གྲོངས་སུ་ཕྱིན་པའི་ཡིད་སྐྱོའི་གནས་ཚུལ་བྱུང་འདུག

ཕྱི་ཟླ་དང་པོའི་ཚེས་ཉི་ཤུ་ཉིན་བོད་ཆབ་མདོ་ཚྭ་བ་མཛོ་སྒང་རྫོང་དུ་བོད་མི་འཕྲིན་ལས་དངོས་གྲུབ་ལགས་དང་བུ་དབྱངས་དར་རྒྱས།པད་མ་ཚེ་པ་ལགས་བཅས་གསུམ་གྱིས་རས་དར་དཀར་པོའི་སྟེང་བོད་རྒྱལ་ཁབ་ཆེན་པོའི་རྒྱལ་དར་དང་བོད་རང་བཙན་ཡིན།བོད་མི་རྩམ་ཟན་ཚང་མ་ལོངས་ཤོག།རྒྱ་མིའི་འབུ་ཟན་ཚང་མ་ཕྱིར་རྒྱུག་ཅེས་མཛོ་སྒང་རྫོང་གི་ཁྲོམ་གཞུང་དུ་སྐད་འབོད་སྐྱོན་སྐབས་རྒྱ་མིའི་ཉེན་རྟོག་པས་འཛིན་བཟུང་བྱས་ནས་ཁོང་རྣམ་པར་ཉེས་རྡུང་ཚད་མེད་བཏང་འདུག རྒྱ་མིས་ཉེས་རྡུང་གཏོང་ཡུལ་མི་སྣ་གསུམ་པོ་དེ་ཚོའི་གྲངས་ནས་པད་མ་ཚེ་པ་ལགས་ཞུ་བ་དེ་ཉེས་རྡུང་འོག་འདས་གྲོངས་སུ་གྱུར་འདུག དེའི་སྐོར་མིང་འདོན་གནང་འདོད་མེད་པའི་འབྲེལ་ཡོད་མི་སྣ་ཞིག་གིས་གནས་ཚུལ་ངོ་སྤྲོད་གནང་ཡོད་པ་དང་ཕྱི་ཚེས་ཉི་ཤུ་གསུམ་ཉིན་མཛོ་སྒང་རྫོང་གི་ཉེན་རྟོག་པ་དང་རྒྱ་མིའི་དྲག་ཆས་དམག་མི།འགྲུལ་འཁོར་ཆུང་བ་བཅོ་ལྔ་དང་ཆེ་བ་གསུམ་བཅས་ཁྱོན་འགྲུལ་འཁོར་བཅོ་བརྒྱད་ཙམ་ཚྭ་བ་བུལ་ཐོག་ཁུལ་དུ་འབྱོར་ནས་སྐད་འབོད་སྐྱོན་མཁན་བོད་མི་གསུམ་པོའི་ཁྱིམ་དུ་བསྔོགས་བཤེར་བྱས་པ་སོགས་དམ་བསྒྲགས་ཤུགས་ཆེ་བྱས་ཡོད་ཅིང་བོད་རང་བཙན་གྱི་སྐད་འབོད་སྐྱོན་མཁན་འཕྲིན་ལས་དངོས་གྲུབ་དང་བུ་དབྱངས་དར་རྒྱས་གཉིས་ད་ཆ་ཆབ་མདོ་ཁུལ་གྱི་བཙོན་ཁང་ནང་བཙོན་འཇུག་བྱས་ཡོད་པའི་གནས་ཚུལ་འདུག