ཁམས་གསེར་རྟ་ཁུལ་དུ་བོད་མི་ཞིག་གིས་རྒྱ་ནག་གཞུང་ལ་ངོ་རྒོལ།

༄༅༎བོད་ཀྱི་ཁམས་གསེར་རྟ་ཁུལ་ནས་བོད་མི་ཞིག་གིས་འདི་གའི་རླུང་འཕྲིན་ཁང་གི་གཏམ་གླེང་ཞལ་དཔར་གྱི་ལེན་ཚན་ནང་འགྲེལ་བརྗོད་གནང་དོན་ལྟར་ན་ བདུན་སྔོན་མའི་རེས་གཟའ་པ་སངས་ཕྱི་ཟླ་ལྔ་པའི་ཚེས་༧ཉིན་བོད་རིགས་དགེ་འདུན་པ་བསོད་ནམས་རྡོ་རྗེ་ཞུ་བ་ཞིག་གིས་ཉིན་རྒྱབ་ཀྱི་ཕྱག་ཚོད་གསུམ་པའི་ཐོག་གསེར་རྡ་རྫོང་ཐོག་ཏུ་ངོ་རྒོལ་སྐད་འབོད་བྱས་ཡོད་ཅིང་། ཁོང་གིས་སྐད་འབོད་བྱས་པ་མ་ཟད་ ཡིག་ཆ་ཞིག་ཀྱང་འགྲེམས་བཀྲམ་གནང་འདུག་། ཡིག་ཆ་འགྲེམས་སྤེལ་བྱས་པའི་ནང་༸གོང་ས་༸སྐྱབས་ཆེན་པོ་མཆོག་བོད་ནང་གདན་འདྲེན་ཞུ་དགོས་པ་དང་ ཁྲིམས་ལུགས་ཀྱི་རང་དབང་དགོས་པ་སོགས་བཀོད་ཡོད་པ་རེད་འདུག་། དེ་ཡང་བོད་ནས་བོད་མི་དེ་ཉིད་ཀྱིས་འགྲེལ་བརྗོད་གནང་དོན་ལ་། ཁོང་གིས་མུ་མཐུད་ནས་འགྲེལ་བརྗོད་གནང་དོན་ལྟར་ན་ འདི་ལོའི་སུམ་བཅུ་དུས་ཚིགས་ནས་བཟུང་གསེར་རྟ་ཁུལ་དུ་རྒྱ་ནག་གིས་དམ་བསྒྲགས་ཤུགས་ཆེ་ཡོད་པ་དང་ བོད་མི་ངོ་རྒོལ་བ་བསོད་ནམས་རྡོ་རྗེ་ལགས་ས་ཁུལ་དུ་འདུ་འཛོམས་གནང་བའི་བོད་མི་རྣམས་ཀྱིས་སྐྱོབ་ཐབས་བྱས་ཡོད་ཀྱང་ཞི་བའི་གྱོན་ཆས་གྱོན་པའི་ཉེན་རྟོག་དམག་མིས་མཐའ་མ་འཛིན་བཟུང་བྱས་ཡོད་པ་རེད་འདུག་། བོད་རིགས་དགེ་འདུན་པ་ངོ་རྒོལ་གནང་མཁན་ནི་ གསེར་རྟ་མཆོད་རྟེན་ཤང་ནས་ཡིན་པ་དང་ གསེར་རྟ་རྫོང་གི་ཁྱབ་ཁོངས་དགོན་པ་ཆུང་ཞིག་གི་དགེ་འདུན་པ་ཡིན་པ་བཅས་ཀྱི་གནས་ཚུལ་ངོ་སྤྲོད་གནང་འདུག།