ཡེ་ཤུའི་བླ་ཆེན་གྱིས་སི་རི་ཡའི་གཞུང་ལ་རེ་འདུན།

༄༅༎ཡེ་ཤུའི་བླ་ཆེན་གྱིས་སི་རི་ཡའི་གཞུང་ལ་མི་མང་གི་དགོས་འདུན་བསྒྲུབ་དགོས་པའི་སྐུལ་དེད་གནང་ཡོད་པའི་གནས་ཚུལ་ཐོན་འདུག
ཡེ་ཤུའི་བླ་ཆེན་གྱི་གདན་ས་ཆེན་མོ་ རོམ་ནས་རོའི་ཊརྶེ་གསར་ལས་ཁང་སོགས་ཀྱིས་གནས་ཚུལ་སྤེལ་བར་གཞིགས་ན། རེས་གཟའ་ཉི་མའི་ཉིན་བླ་ཆེན་པོཔ་བྭེ་ནེ་ཌིཀྚེ་(Pope Benedict) མཆོག་གིས་སི་རི་ཡའི་གཞུང་ལ་མི་མང་གི་ཁྲིམས་མཐུན་དགོས་འདུན་ཁག་ངོས་ལེན་གྱིས་རྒྱལ་ཡོངས་སུ་འགྲིག་འཇགས་ཀྱི་གྲོས་མོལ་འགོ་འཛུགས་ཀྱིས་དྲག་གནོན་མཚམས་འཇོག་དགོས་པའི་སྐུལ་དེད་གནང་འདུག སྔ་ལོ་ཕྱི་ཟླ་གསུམ་པའི་མིང་མང་གིས་གཞུང་ལ་ངོ་རྒོལ་འགོ་བཙུགས་ནས་བཟུང་ད་བར་ཡུལ་མི་ལྔ་སྟོང་ལྷག་གི་ཚེ་སྲོག་ཤོར་ཡོད་ཀྱང་གཞུང་གིས་ཉིས་སྟོང་ཙམ་ལས་བསད་མེད་ལུགས་འགྲེལ་བརྗོད་བྱེད་བཞིན་པ་རེད། རེས་གཟའ་ཉི་མའི་ཉིན་བླ་ཆེན་པོཔ་བྭེ་ནེ་ཌིཀྚེ་མཆོག་གིས་ དད་ལྡན་གནས་སྐོར་བ་ཚོར་བདུན་རེའི་མཛལ་ཁ་གནང་བའི་སྐབས་ སི་རི་ཡའི་དབུ་ཁྲིད་རྣམ་པས་ནང་འཁྲུགས་ཀྱི་འཐབ་རྩོད་ཐད་རྒྱ་སྤྱིའི་སྤྱི་ཚོགས་ཀྱིས་བློ་འཚབ་ཆེན་པོ་གནང་བཞིན་པ་དེར་ངེས་པར་དུ་བསམ་ཤེས་ཀྱིས་མི་མང་གི་ཁྲིམས་མཐུན་དགོས་འདུན་ཁག་བསྒྲུབས་ཐབས་བྱ་དགོས་ཀྱི་རེད་ཅེས་གསུངས་གནང་འདུག།