རྒྱ་ནག་ཏུ་བཅའ་ཞུགས་ཨ་རིའི་གཞུང་ཚབ་འོས་མི་མཚན་འདོན།

༄༅༎ཨ་མི་རི་ཀའི་ཚོང་དོན་དྲུང་ཆེ་སྐུ་ཞབས་གེ་རི་ལོཀ་ཨ་རི་གཞུང་གིས་རྒྱ་ནག་གཞུང་ཚབ་ཆེན་མོར་བསྐོ་གཞག་གནང་རྒྱུའི་མཚན་འདོན་གནང་པ་དེས་རྒྱལ་ཁབ་གཉིས་དབར་འབྲེལ་བ་ཡར་རྒྱས་གཏོང་རྒྱུར་ཕན་ནུས་ཡོང་རྒྱུ་ཡིན་པའི་སྐོར་རྒྱ་ནག་གཞུང་གིས་དགའ་བསུ་ཞུས་འདུག་༎ ད་ལྟའི་རྒྱ་ནག་ནང་ཨ་རིའི་གཞུང་ཚབ་ཆེན་མོ་བ་སྐུ་ཞབས་ཇོན་ཧན་སི་མེན་གྱིས་འབྱུང་འགྱུར་༢༠༡༢ལོའི་སྲིད་འཛིན་གྱི་འོས་བསྡུའི་ནང་ཞུགས་རྒྱུའི་རེ་འདུན་བཅངས་ཏེ་ཉེ་སྔོན་གཞུང་ཚབ་ཀྱི་ལས་ཁུར་ནས་དགོངས་ཞུ་གནང་ཏེ་ལས་མཚམས་བཞག་ཡོད་པ་རེད་  ད་རེས་ཨ་རི་གཞུང་གིས་རྒྱ་ནག་ནང་ཨ་རིའི་གཞུང་ཚབ་ཆེན་མོར་མཚན་འདོན་གནང་པའི་སྐུ་ཞབས་གེ་རི་ལོཀ་ཞུ་བ་ཁོང་མི་རྒྱུད་རྒྱ་རིགས་ཡིན་ཞིང་ ཆུང་དུས་ཨ་རིའི་སི་ཡ་ཀྲལ་གྲོང་ཁྱེར་རུ་འཚར་ལོངས་གནང་པ་དང་ རྗེས་སུ་སྙན་གྲགས་ཅན་གྱི་ཡེལ་གཙུག་ལག་སློབ་གྲ་ཆེན་མོ་ནས་སློབ་ཐོན་གནང་པ་དང་༢༠༠༩ནས་བཟུང་ཨ་རིའི་ཚོང་དོན་དྲུང་ཆེའི་ཐུགས་འགན་བཞེས་མུས་ཡིན་པ་རེད་ ཁོང་རྒྱ་ནག་ནང་དངོས་སུ་ཨ་རིའི་གཞུང་ཚབ་ཆེན་མོའི་ལས་ཁུར་མ་བཞེས་གོང་ཐོག་མར་གྲོས་ཚོགས་ནས་གཏན་འབེབས་གནང་དགོས་ཀྱི་ཡོད་པ་རེད་༎