ཨེ་ཤེ་ཡ་དང་ཞི་བདེ་རྒྱ་མཚོའི་ཁུལ་བདེ་འཇགས་ལྷན་ཚོགས།

༄༅༎ཨ་རིའི་སྲུང་སྐྱོབ་དྲུང་ཆེ་རོའོ་སྦཏ་གེཏ་སི་ཡིས་དེ་རིང་གཟའ་སྤེན་པའི་ཉིན། ལྷོ་རྒྱ་ནག་རྒྱ་མཚོའི་མངའ་ཁུལ་ཡུལ་གྲུ་ཁག་གིས་གླིང་ཕྲན་དེའི་བདག་དབང་གི་གནད་དོན་དེ། ཞི་བའི་ཐབས་ལམ་གྱི་ཐོག་ནས་ཐག་གཅོད་ཡོང་ཐབས་མ་བྱེད་པ་ཡིན་ན། མངའ་ཁུལ་དེའི་ནང་དྲག་པོའི་གདོང་ཐུག་ཡོང་སྲིད་པའི་ཉེན་བརྡ་བཏང་གནང་ཡོད་པ་རེད།

ཨ་རིའི་སྲུང་སྐྱོབ་དྲུང་ཆེ་སྐུ་ཞབས་རོའོ་སྦཏ་གེཏ་སི་ཡིས། དེང་སྐབས་སིང་ག་པོར་ནང་ཚོགས་བཞིན་པའི་ཨེ་ཤེ་ཡ་དང་བཞི་བདེ་རྒྱ་མཚོའི་མངའ་ཁུལ་བདེ་འཇགས་ལྷན་ཚོགས་ཀྱི་ཐོག་གསུངས་ན། ལྷོ་རྒྱ་ནག་རྒྱ་མཚོའི་གླིང་ཕྲན་གྱི་བདག་དབང་གནད་དོན་ཐོག མངའ་ཁུལ་དེའི་ཡུལ་ཁག་དབར་ཕན་ཚུན་རྩོད་གླེང་གི་གནད་དོན་དེའི་ཐོག་སེམས་འཚབ་བྱ་དགོས་པ་ཞིག་ཆགས་ཀྱི་ཡོད་པ་དང་། གླིང་ཕྲན་གྱི་བདག་དབང་གནད་དོན་ཐོག་ཁྲིམས་ཐོག་ནས་ཐག་གཅོད་ཐུབ་པའི་གཞི་རྩ་མེད་པར་བརྟེན། གླིང་ཕྲན་གྱི་མངའ་ཁུལ་ཡུལ་ཁག་དབར་ཕན་ཚུན་གྲོས་མཐུན་མ་བྱུང་བ་ཡིན་ན། ལྷོ་རྒྱ་ནག་རྒྱ་མཚོའི་གླིང་ཕྲན་ཁུལ་དུ་དྲག་ཟིང་ཡོང་རྒྱུའི་ཉེན་ཚབས་ཆེན་པོ་ཡོད་པ་གསུངས་འདུག  

ལྷོ་རྒྱ་ནག་རྒྱ་མཚོའི་གླིང་ཕྲན་གྱི་ས་ཁོངས་བདག་དབང་ཡོད་ཟེར་མཁན་གྱི་རྒྱལ་ཁབ་རྒྱ་ནག་དང་ ཐེ་དབན།  འབར་མ། མ་ལ་ཤི་ཡ།  བེག་ནམ་བཅས་ཀྱི་ས་ཁོངས་དང་འབྲེལ་ཡོད་པར་བརྟེན།  ཡུལ་གྲུ་དེ་དག་གིས་རྒྱུན་དུ་ནས་གླིང་ཕྲན་དེའི་བདག་དབང་ལ་རྩོད་གླེང་ཡོད་པ་དང་། ལྷག་པར་དུ་གླིང་ཕྲན་དེའི་ནང་རང་འབྱུང་གི་ཐོན་ཁུངས་ཕུན་གསུམ་ཚོགས་པ་ཡོད་པར་བརྟེན་ནས།  བདག་དབང་རྩོད་གླེང་གི་གནད་དོན་དེ་དེང་སྐབས་དེ་བས་ཤུགས་ཆེ་རུ་འགྲོ་བཞིན་ཡོད་པ་རེད། དེར་བརྟེན་ད་རེས་ཨ་རིའི་སྲུང་སྐྱོབ་དྲུང་ཆེ་མཆོག་ནས། ལྷོ་རྒྱ་ནག་རྒྱ་མཚོའི་གླིང་ཕྲན་གྱི་བདག་དབང་ཡོད་ཟེར་མཁན་གྱི་ཡུལ་གྲུ་དེ་དག་གིས། ཕྱི་ལོ་༢༠༠༢ལོར་ལྷོ་ཤར་ཨི་ཤི་ཡའི་མཐུན་ཕྱོགས་ཡུལ་ཁག་གི་ལྷན་ཚོགས་དང་། རྒྱ་ནག་བཅས་དབར་བཞག་པའི་ཆིངས་ཡིག་གཞིར་ཟུང་ཞི་བའི་ཐོག་ནས་གླིང་ཕྲན་དེའི་བདག་དབང་གནད་དོན་ཐག་གཅོད་ཡོང་ཐབས་གནང་དགོས་པའི་འབོད་སྐུལ་གནང་ཡོད་པ་རེད་།