རྒྱ་གར་གྱི་ཚོགས་པ་གཉིས་ནས་བོད་སྐོར་རྒྱ་ནག་དང་གླེང་སློང་།

༄༅༎རྒྱ་གར་གྱི་སྦི་ཇེ་པི་དང་ཨར་ཨེསི་ཨེསི་ཚོགས་པ་གཉིས་ནས་བོད་དང་ས་མཚམས་ཀྱི་དཀའ་རྙོག་སྐོར་རྒྱ་ནག་དང་གླེང་སློང་གནང་ཡོད་པའི་གནས་ཚུལ་ཐོན་འདུག

དེ་ཡང་ཨར་ཨེསི་ཨེསི་ཞེས་པའི་རྒྱ་གར་གྱི་ཚོགས་པ་དང་ཆབ་སྲིད་ཚོགས་པ་སྦི་ཇེ་པི་གཉིས་ཀྱི་འཐུས་མི་ཁག་ཅིག་ཉེ་ཆར་རྒྱ་ནག་ནང་འཚམས་འདྲི་གཟིགས་བསྐོར་ཕེབས་ནས་ཕྱིར་འཁོར་གྱིས་ཨར་ཨེསི་ཨེསི་ཚོགས་པའི་འགན་འཛིན་རམ་མ་དལྦ་གྱིས་ཀྲ་ཡེམ་སེ་ཨོཕ་ཨིན་ཌི་ཡའི་གསར་འགྱུར་ལས་ཁུངས་སུ་གསུངས་པ་ཞིག་ལུང་འདྲེན་བྱས་པར་ལྟར་ན་རྒྱ་ནག་གི་འབྲེལ་ཡོད་དཔོན་རིགས་ཚོ་དང་མཇལ་འཕྲད་སྐབས་རྒྱལ་སྤྱིའི་ནང་གི་དཔལ་འབྱོར་ཉམས་རྒུད་འགྲོ་བཞིན་པའི་གནས་སྟངས་དང་འཇིགས་སྐུལ་དྲག་སྤྱོད་ཀྱི་ལས་འགུལ་སྤེལ་བཞིན་པའི་སྐོར་གནས་ཚུལ་སོགས་སེམས་འཚབ་འོས་པའི་གནད་དོན་སྤྱི་དང་ལྷག་པར་དུ་རྒྱ་དཀར་ནག་གི་རྩོད་རྙོག་ཅནགྱི་ས་མཚམས་དང་བོད་ཀྱི་གནད་དོན་བཅས་ཀྱི་ཐོག་ཀྱང་གླེང་སློང་བྱུང་ཡོད་འདུག

བོད་ཀྱི་གནད་དོན་ཐོག་གླེང་སློང་བྱས་པའི་སྐབས་རྒྱ་གར་གྱི་ཚོགས་པ་གཉིས་ཀྱི་འཐུས་མི་ཚོའི་ངོས་ནས་༸གོང་ས་ཏཱ་ལའི་བླ་མ་མཆོག་ནི་གུས་བརྩི་ཞུ་ཡུལ་ཞིག་ཡིན་ལུགས་གསུངས་པའི་སྐབས་རྒྱ་ནག་གི་ཕྱོགས་ནས་༸གོང་ས་མཆོག་ཆབ་སྲིད་འཁྲབ་གནང་མཁན་ཞིག་ཏུ་ངོས་འཛིན་བྱེད་ཀྱི་ཡོད་ལུགས་འགྲེལ་བརྗོད་གནང་འདུག

ཡང་གོང་ཞུས་མཇལ་འཕྲད་དེའི་སྐབས་རྒྱ་གར་དང་བལ་ཡུལ་ནང་གི་མའོའི་གྱེན་ལོག་ཤོག་ཁག་གི་གནད་དོན་སྐོར་བཀའ་མོལ་གནང་བའི་སྐབས་རྒྱ་ཕྱོགས་ནས་ཤོག་ཁག་དེ་དག་ནི་མའོའི་མིང་ཙམ་ཡོད་པ་ལས་མའོའི་ལྟ་བ་དང་རྩ་བ་ནས་འབྲེལ་བ་མེད་པ་ཞིག་རེད་ལ་ཚོགས་པ་དེ་དག་དང་རྒྱ་ནག་གུང་བྲན་ཚོགས་པ་གཉིས་འབྲེལ་བ་རྩ་བ་ནས་མེད་ལུགས་ལན་འདེབས་རྒྱབ་ཡོད་འདུག གང་ལྟར་ད་རེས་རྒྱ་གར་གྱི་ཚོགས་པ་གཉིས་ཀྱི་འཐུས་མི་རྒྱ་ནག་ནང་གཟིགས་བསྐོར་ཕེབས་པ་དེས་བཀའ་བསྡུར་ལྷུག་པོ་བྱུང་ཡོད་པར་ངོས་འཛིན་བྱེད་ཀྱི་ཡོད་ལུགས་གསུངས་འདུག