ར་ཤི་ཡས་འཇོར་ཇེ་ཡའི་ཐོག་རྒྱ་ནག་ནས་རྒྱབ་སྐྱོར་ཡོང་ཐབས།

༄༅༎ཨ་མི་རི་ཀས་གཙོས་ཡུ་རོབ་ཡུལ་གྲུ་ཁག་ནས་ར་ཤི་ཡས་ཉེ་ཆར་རྩོད་རྙོག་ཅན་ལྷོ་ཨོ་སེ་དྲེ་ཡ་དང༌། ཨ་ཁ་ཛ་ཡེ་མངའ་སྡེ་གཉིས་རང་བཙན་རྒྱལ་ཁབ་ཏུ་ངོས་འཛིན་བྱས་པ་དེར་སྐྱོན་བརྗོད་ཤུགས་ཆེ་བྱས་དང་བྱེད་བཞིན་ཡོད་ཙང་གནད་དོན་འདིའི་ཐོག་ད་ཆ་ར་ཤི་ཡར་ཁེར་རྐྱང་ལྟབུ་ལུས་རྒྱུའི་ཉེན་ཁ་མཐོང་ནས་རྒྱ་ནག་ནས་རྒྱབ་སྐྱོར་ཡོང་ཐབས་བྱེད་བཞིན་ཡོད་འདུག། དེ་ཡང་དེ་རིང་རེས་གཟའ་ལྷག་པའི་ཉིན་ར་ཤི་ཡའི་སྲིད་འཛིན་མཆོག་ཏ་ཇ་ཀི་སི་ཏན་ནང་ཚོགས་འདུ་ཞིག་ཏུ་ཕེབས་པའི་ཞོར་ལ་རྒྱ་ནག་གི་སྲིད་འཛིན་ཧུའུ་ཇིན་ཏའོ་དང་མཇལ་འཕྲད་གནང་གི་ཡོད་པ་དང༌། སྐབས་དེར་རྒྱ་ནག་ནས་རྒྱབ་སྐྱོར་ཡོང་ཐབས་སུ་བཀའ་མོལ་གནང་འཆར་ཡོད་འདུག།

དེའི་གོང་ར་ཤི་ཡས་འཇར་མན་གྱི་སྲིད་བློན་མཆོག་དང་བཀའ་མོལ་ཞུས་ཡོད་ཀྱང་འཇར་མན་ངོས་ནས་ནུབ་ཕྱོགས་རྒྱལ་ཁབ་གཞན་མཚུངས་ར་ཤི་ཡའི་བྱ་སྤྱོད་ལ་རྒྱབ་སྐྱོར་གནང་རྒྱུའི་ཚབ་ཏུ་ངོ་རྒོལ་གནང་ཡོད་པ་དང་དེ་དང་ཕྱོགས་མཚུངས་ཕེ་རན་སིའི་ངོས་ནས་ཀྱང་ར་ཤི་ཡའི་བྱ་སྤྱོད་དེ་ནི་རྒྱལ་སྤྱིའི་ཁྲིམས་དང་མི་མཐུན་པ་རེད་ལ་དེར་ཡུ་རོབ་མཐུན་ཚོགས་ནས་ངོས་ལེན་བྱེད་ཐབས་མེད་པ་ཞིག་རེད་ཅེས་གསུངས་ནས་གང་ལྟར་ཡུ་རོབ་རྒྱལ་ཁབ་ཚོས་ར་ཤི་ཡས་རྩོད་རྙོག་ཅན་གྱི་ལྷོ་ཨོ་སེ་དྲེ་ཡ་དང་། ཨ་ཁ་ཛ་ཡེ་གཉིས་རང་བཙན་ཡིན་པར་ངོས་ལེན་བྱས་པ་དེར་ངོ་རྒོལ་མཐའ་ཅིག་ཏུ་བྱེད་བཞིན་ཡོད་པ་རེད། ར་ཤི་ཡའི་ངོས་ནས་གོང་ཞུས་མངའ་སྡེ་དེ་གཉིས་སུ་སྲུང་སྐྱོབ་ཆེད་དམག་དཔུང་ད་ལྟའང་འགྲེམས་འཇོག་བྱེད་བཞིན་ཡོད་པ་རེད། མངའ་སྡེ་དེ་གཉིས་དེ་སྔ་ཨུ་རུ་སུ་ཁ་ཐོར་ཕྱིན་པའི་སྐབས་རྩོད་གཞི་ཅན་ཞིག་ཡིན་ནའང་འཇོར་ཇེ་ཡའི་མངའ་ཁོངས་སུ་ཆགས་པ་ཞིག་ཡིན་པ་རེད། ཡིན་ནའང་ཁུལ་དེའི་ནང་གི་མི་མང་བརྒྱ་ཆ་མང་བས་རང་བཙན་ལོགས་སུ་དགོས་འདུན་བཏོན་པ་དེར་ར་ཤི་ཡས་རྒྱབ་སྐྱོར་བྱས་པ་ཞིག་ཡིན་པ་རེད།