བོད་དོན་ཁ་ཡོད་ལག་ཡོད་ཀྱི་རྒྱབ་སྐྱོར་དགོས་པའི་འབོད་བསྐུལ།

༄༅།   །དེ་ཡང་རྒྱལ་སྤྱིའི་བོད་དོན་འབྲེལ་མཐུད་ལས་ཁང་གིས། རྒྱལ་སྤྱིའི་བོད་དོན་རྒྱབ་སྐྱོར་ལས་འགུལ་ཞེས་པའི་ལས་འགུལ་གྱི་བྱེད་སྒོ་ཞིག་གོ་སྒྲིག་གནང་བའི་ཁོངས་སུ། རྒྱ་གར་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་Dr. N.K Trikha ཡིས། རྒྱ་གར་གྱི་སྲིད་བློན་མཆོག་ལ་ཕྱག་བྲིས་ཤིག་ཕུལ་ཏེ། རྒྱ་ནག་གཞུང་གིས་བོད་མིའི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་བཏང་བའི་བྱ་སྤྱོད་ལ་རྒྱལ་སྤྱིའི་དབུ་ཁྲིད་ཚོས་སྐྱོན་བརྗོད་གནང་དགོས་པ་དང༌། ད་ལྟའི་བོད་ནང་གི་ཛ་དྲག་གི་གནས་སྟངས་ཐོག་ལ་རྒྱལ་སྤྱིའི་གཞུང་ཁག་གིས་ཁ་ཡོད་ལག་ཡོད་ཀྱི་རྒྱབ་སྐྱོར་གནང་རོགས་ཞེས་འབོད་སྐུལ་ཞུས་ཡོད་པས་མ་ཟད།  བོད་ནང་དུ་རང་ལུས་མེར་སྲེག་གཏོང་མཁན་གྱི་གྲངས་ཀ་ཇེ་མང་དུ་འགྲོ་བཞིན་པའི་ཛ་དྲག་གི་གནས་སྟངས་དེའི་བྱུང་རྐྱེན་ཞིབ་ཕྲ་བཀོད་གནང་ཡོད་པ་རེད།

འབོད་སྐུལ་གྱི་ཕྱག་བྲིས་དེ་ཕུལ་དགོས་པའི་དམིག་ཡུལ་གཙོ་བོ་ནི། འཛམ་གླིང་ནང་དུ་ཡོད་པའི་བོད་དོན་རྒྱབ་སྐྱོར་ཚོགས་པ་ཁག་གིས་སོ་སོའི་གཞུང་དང་ཕྱི་སྲིད་བློན་ཆེན་ཚོས་བོད་དོན་གྱི་ཐོག་ལ་ནུས་པ་ཐོན་པའི་རྒྱབ་སྐྱོར་གནང་སྐྱོང་ཡོང་བའི་འབོད་སྐུལ་ཞུ་རྒྱུ་དང༌། ལྷག་དོན་ཕྱི་ཟླ་དགུ་པའི་ཚེས་༡༠ནས་༢༨ བར་སུད་སི་གྲོང་ཁྱེར་Geneva དུ་ཚོགས་རྒྱུའི་རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་ཐོག་རྒྱལ་ཁབ་ཁག་གི་སྐུ་ཚབ་ཚོས། བོད་ནང་གི་ཛ་དྲག་གི་གནས་སྟངས་གླེང་སློང་གནང་རོགས་ཞེས་འབོད་སྐུལ་ཞུ་རྒྱུའི་ཆེད་དུ་ཡིན་པ་རེད། །