རྒྱ་ནག་ནང་ཨ་རིའི་གློག་བརྙན་འཁྲབ་མཁན་ཞིག་ལ་སྐྱོན་བརྗོད།

༄༅༎ཤེ་རོན་ སོ་ཀྲོན་གྱིས། རྒྱ་ནག་གཞུང་ནས་བོད་ཐོག་ནོར་འཁྲུལ་གྱི་སྲིད་བྱུས་འཛིན་པ་དེའི་ལས་ངན་འཁོར་ཏེ་ས་ཡོམ་རྒྱབ་པ་ཡིན་སྲིད་པའི་སྐོར་གསུངས་པར་རྒྱ་ནག་ནས་སྐྱོན་བརྗོད་བྱས་འདུག།

ཨ་མི་རི་ཀའི་སྙན་གྲགས་ཅན་གྱི་གློག་བརྙན་འཁྲབ་མཁན་ཤེ་རོན་ སོ་ཀྲོན་གྱིས་ཉེ་ཆར་ཀེན་སེ་གློག་བརྙན་དུས་སྟོན་སྐབས་དགོངས་ཚུལ་གསུངས་པའི་གནད་དོན་ཞིག་དེང་སང་ཡོངས་གྲགས་ཆེ་བས་གློག་རྡུལ་དྲ་རྒྱའི་ཡུ་ཀྲུབ་ཞེས་པའི་བརྙན་པར་ནང་དྲིལ་བསྒྲགས་བྱེད་བཞིན་ཡོད་པ་དེའི་ནང༌། ཁོ་མོས། བོད་ནང་རྒྱ་ནག་གཞུང་ནས་བོད་མི་ཚོའི་ཐོག་འཛིན་པའི་ནོར་འཁྲུལ་གྱི་སྲིད་བྱུས་དེར་ང་རང་དགའ་པོ་མེད་ལ་རྒྱ་ནག་ནང་ཨོ་ལིམ་ཕིག་རྩེད་འགྲན་ཚུགས་པའི་སྐབས་ང་ཚོས་ག་རེ་བྱེད་དགོས་ཀྱི་རེད་བསམ་པའི་བློ་འཚབ་ཞིག་ཡོང་གི་འདུག། དེ་འདྲའི་གནས་སྟངས་འོག་གནས་ཚུལ་འདི་འདྲ་ཞིག་བྱུང་བ་རེད་ཅེས་རྒྱ་ནག་ནང་ས་ཡོམ་གྱི་གོད་ཆགས་ཕོག་པའི་དཔེ་མཚོན་དུ་གལ་སྲིད་སོ་སོས་མི་གཞན་ཞིག་ལ་ཡག་པོ་མ་བྱས་པ་ཡིན་ན་སོ་སོ་རང་ཉིད་ལའང་ཡག་པོ་ཡོང་གི་མེད་པ་ཡིན་དུས་ཕལ་ཆེར་འདི་ལས་འབྲས་འཁོར་བ་ཞིག་མིན་ནམ་བསམ་པ་བྱུང་ཞེས་གང་ལྟར་ཁོང་རང་ཉིད་༸གོང་ས་མཆོག་དང་ཐུགས་འདྲིས་ཆེན་པོ་ཡོད་མཁན་ཞིག་ཡིན་དུས་རྒྱ་ནག་གཞུང་ནས་བོད་མིའི་ཐོག་དྲག་གནོན་བྱེད་སྟངས་ལའང་ཐུགས་འཚབ་ཡོད་ལུགས་གསུངས་ཡོད་པ་བཅས་ལ་བརྟེན་ ད་ཆ་རྒྱ་ནག་ནང་ཡོད་པའི་གློག་བརྙན་འགྲེམས་སྤེལ་བྱེད་མཁན་གྱི་ཚོང་ལས་ཚན་པ་དང་། དེ་བཞིན་ཚོང་ཟོག་ཐོག་ནས་ཁོ་མོའི་པར་རིས་ཡོད་པའི་དྲིལ་བསྒྲགས་ཚུན་ཆད་རྒྱ་ནག་ནང་ཁྱབ་སྤེལ་བྱེད་རྒྱུ་མིན་ལུགས་རྒྱ་ནག་གི་གསར་འགྱུར་བརྒྱུད་ལམ་ཁག་ནང་བཀོད་ཐོན་བྱུང་འདུག། དེ་དང་ཕྱོགས་མཚུངས་གློག་རྡུལ་དྲ་རྒྱའི་ཐོག་ནས་ཁོང་གི་དགོངས་ཚུལ་གསུངས་པ་དེ་དག་ལ་ངོ་རྒོལ་གྱི་རྣམ་འགྱུར་བསྟེན་པ་དང་། ཁོང་རང་ཉིད་ནས་དེའི་ཐོག་དགོངས་སེལ་ཞུ་དགོས་ལུགས་སོགས་གླེང་སློང་བྱས་ནས་རྒྱ་རིགས་ཚོས་ངོ་རྒོལ་གྱི་རྣམ་འགྱུར་བསྟེན་རྒྱུ་འགོ་ཚུགས་ཡོད་པ་རེད།