རྡུལ་ཕྲན་ཉེན་ཁའི་ཐོག་ཉི་ཧོང་དང་རྒྱ་ནག་ལྷོ་ཀོ་རི་ཡ་མཇལ་བ།

༄༅༎ཉི་ཧོང་དང་རྒྱ་ནག་ལྷོ་ཀོ་རི་ཡ་ཡུལ་གྲུ་གསུམ་གྱི་ཕྱི་སྲིད་བློན་ཆེན་དབར་གཟའ་སྤེན་པའི་ཉིན་ཉི་ཧོང་ནང་མཇལ་འཕྲད་གནང་ཏེ་རྡུལ་ཕྲ་རབ་ཀྱི་ཉེན་ཚབས་ལས་གཡོལ་ཐབས་ཀྱི་གནད་དོན་སྐོར་ལ་བཀའ་སྡུར་གནང་རྒྱུ་ཡིན་པ་རེད།

ད་རེས་ཉི་ཧོང་ནང་ས་ཡོམ་གྱི་གནོད་འཚེ་ཚབས་ཆེ་ཕོག་ནས་དེས་རྐྱེན་པས་རྡུལ་ཕྲན་གྱི་གློག་ཁང་ལ་འབར་གས་བྱུང་ཏེ་རྡུལ་ཕྲ་རབ་ཀྱི་དུག་རླངས་ཕྱིར་ཐོན་ནས་ཉི་ཧོང་དང་དེའི་ཁྱིམ་ཚེས་ཡུལ་གྲུའི་མི་མང་ཚོའི་བདེ་ཐང་ལ་གནོད་ཚབས་བཟོ་གཞི་ཆགས་པའི་གནས་ཚུལ་བྱུང་རྗེས་   ཡུལ་གྲུ་གསུམ་གྱི་དཔོན་རིགས་རྣམ་པ་ཚོས་ད་རེས་ཉི་ཧོང་ནང་ལྷན་འཛོམས་ཀྱིས་གནད་དོན་དེའི་ཐོག་བཟང་ཕྱོགས་ཀྱི་ཐབས་ལམ་འཛིན་རྒྱུ་གཙོ་བོར་འཛིན་ནས་བཀའ་མོལ་གནང་ཡོད་པ་དང་ ཉི་ཧོང་གི་ཕྱི་སྲིད་བློན་ཆེན་ཀྲ་ཀེ་ཨ་ཀི་མ་ཚུ་མོ་ཏོ་གིས་རྒྱ་ནག་གི་ཕྱི་སྲིད་བློན་ཆེན་ཡང་ཇལ་གྲེ་དང་ལྷོ་ཀོ་རི་ཡའི་ཕྱི་སྲིད་བློན་ཆེན་ཀིམ་སང་ཧལྦན་རྣམ་གཉིས་ལ་ཉི་ཧོང་གི་རྡུལ་ཕྲན་གློག་ཁང་ལ་ས་ཡོམ་གྱི་གནོད་འཚེ་ཕོག་ནས་འབར་གས་བྱུང་བའི་རྗེས་རྡུལ་ཕྲ་རབ་ཀྱི་དུག་རླངས་ཕྱིར་ཐོན་རྒྱུར་འགོག་ཐབས་ཀྱི་ཐབས་ལམ་འཛིན་པ་ཁག་ངོ་སྤྲོད་གནང་ཡོད་པ་དང་འབྲེལ་དཔོན་རིགས་རྣམ་པ་ཚོའི་དབར་བྱང་ཀོ་རི་ཡའི་རྡུལ་ཕྲན་གྱི་ལས་འཆར་འཚམས་འཇོག་ཡོང་རྒྱུར་ཡུལ་གྲུ་དྲུག་གི་ལྷན་ཚོགས་བསྐྱར་དུ་ཚུགས་རྒྱུའི་གནད་དོན་ཐོག་ལ་ཡང་བཀའ་བསྡུར་གནང་ཡོད་ཅིང་ དཔོན་རིགས་རྣམ་པ་གསུམ་དབར་ཕྱི་ཟླ་ལྔ་པའི་ཟླ་མཇུག་ཙམ་དུ་སླར་ཡང་བྱང་ཀོ་རི་ཡའི་རྡུལ་ཕྲན་གོ་མཚོན་ལས་འཆར་མཚམས་འཇོག་ཡོང་རྒྱུའི་གནད་དོན་ཐོག་བསྐྱར་དུ་གྲོས་མོལ་གནང་རྒྱུའི་ཐག་གཅོད་ཡང་བྱུང་ཡོད་པ་རེད།