སྤྱི་འཐུས་ཚོགས་གཙོ་མཆོག་ཀུ་ལུ་མུ་ནཱ་ལེར་ཕེབས་འདུག

དབུས་བོད་མིའི་སྒྲིག་འཛུགས་ཀྱི་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་རྣམ་གཉིས་ཀུ་ལུ་སྤང་དགོན་རི་ཁྲོད་དགོན་པའི་སློབ་གྲྭ་གསར་འཛུགས་ཀྱི་དབུ་འབྱེད་མཛད་སྒོར་ཕེབས་འདུག
དེའང་རྒྱ་གར་བྱང་ཕྱོགས་ཧི་མཱ་ཅལ་མངའ་སྡེའི་ཁོངས་སུ་གཏོགས་པའི་ཀུ་ལུ་མུ་ནཱ་ལེར་རྟེན་གཞི་བྱས་པའི་སྤང་དགོན་རི་ཁྲོད་དགོན་པའི་སློབ་གྲྭ་གསར་འཛུགས་ཀྱི་དབུ་འབྱེད་མཛད་སྒོ་གནང་ཡུལ་དུ། ས་གནས་མི་མང་དང་ཚོགས་པ་ཁག་གིས་ཁོང་རྣམ་གཉིས་ལ་ཕེབས་བསུ་གཟབ་རྒྱས་ཞུས་ཡོད་པ་རེད།  
དབུ་འབྱེད་མཛད་སྒོའི་སྐུ་མགྲོན་གཙོ་བོ་སྐྱབས་རྗེ་ཡང་སྲིད་འཇིགས་མེད་བསྟན་འཛིན་འགྱུར་མེད་རིན་པོ་ཆེ་མཆོག་དང་། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་ལགས། ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་ལགས། མངའ་སྡེའི་གྲོས་ཚོགས་འཐུས་མི་དབང་སྤྲུལ་རིན་པོ་ཆེ་མཆོག། ཀུ་ལུ་ས་གནས་འགོ་འཛིན། གཞུང་དང་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་འཐུས་མི་རྣམ་པ། མི་མང་བཅས་ལྷན་འཛོམས་ཀྱིས་ཐོག་མར་སྤང་དགོན་རི་ཁྲོད་དགོན་པ་དང་སློབ་གྲྭའི་འགན་འཛིན་མཁན་པོ་བསམ་གཏན་ཚེ་རིང་ལགས་ཀྱིས་ཕེབས་བསུའི་གསུང་བཤད་དང་འབྲེལ་སྤང་དགོན་རི་ཁྲོད་དགོན་པའི་ལོ་རྒྱུས་དང་། སྤང་དགོན་རི་ཁྲོད་དགོན་པའི་སློབ་གྲྭ་གསར་འཛུགས་གནང་དགོས་དོན་སྐོར་ངོ་སྤྲོད་གནང་བའི་རྗེས་ཆོས་རིག་བཀའ་བློན་གྱིས་སྐྱབས་རྗེ་ཐུབ་བསྟན་འོད་ཟེར་ཞིང་གཤེགས་དམ་པ་དེས་སྐུ་ཚེའི་རིང་བོད་བརྒྱུད་ནང་བསྟན་མི་ཉམས་རྒྱུན་འཛིན་དང་། སྤང་དགོན་རི་ཁྲོད་དགོན་པ་རྒྱ་སྐྱེད་སོགས་ཀྱི་སླད་ཐུགས་འཁུར་ཧ་ཅང་ཆེན་པོ་མཛད་པར་ཆེ་བསྟོད་དང་། ཡང་སྲིད་འཇིགས་མེད་བསྟན་འཛིན་འགྱུར་མེད་རིན་པོ་ཆེ་མཆོག་གིས་ཀྱང་བོད་བརྒྱུད་ནང་བསྟན་གྱི་གཞུང་ལུགས་ཁག་ལ་གསན་བསམ་སློབ་གཉེར་གནང་སྟེ་སྐུ་གོང་མའི་མཛད་རྗེས་ཁག་མུ་མཐུད་སྐྱོང་བཞིན་པར་མངགས་བརྗོད་་གནང་བ་མ་ཟད། སློབ་གྲྭ་གསར་འཛུགས་ཀྱིས་གཞོན་སྐྱེས་རྣམས་ལ་ཤེས་ཡོན་གྱི་མཐུན་རྐྱེན་བསྐྲུན་ཕྱོགས་ཀྱི་ཐད། ཆོས་རིག་ལས་ཁུངས་ནས་མཐུན་འགྱུར་རོགས་རམ་གང་ཐུབ་གནང་རྒྱུའི་སྐོར་སོགས་གསུངས་འདུག

གསར་འགོད་པ་ཕྲེང་རིང་བསྟན་ནོར།