༸གོང་ས་མཆོག་ནས་གསུམ་བཅུའི་དུས་དྲན་ཉིན་གསུང་འཕྲིན།

༄༅༎༧སྤྱི་ནོར་གོང་ས་༧སྐྱབས་མགོན་ཆེན་པོ་མཆོག་གིས་གསུམ་བཅུའི་དུས་དྲན་ཐེངས་༥༢པའི་ཐོག་ཡོངས་ཁྱབ་ཏུ་བསྩལ་བའི་གསུང་འཕྲིན་ནང་༸གོང་ས་མཆོག་གི་ཆབ་སྲིད་ཀྱི་སྐུ་དབང་ཡོངས་རྗོགས་འོས་འདེམས་བྱས་པའི་འགོ་ཁྲིད་རྣམས་ལ་རྩིས་སྤྲོད་གནང་རྒྱུའི་ཐག་གནང་ཟིན་པའི་སྐོར་སོགས་གསལ་འདོན་གནང་ཡོད་པ་རེད་།

དེ་ཡང་ཁ་ས་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་༥༢པའི་ཐོག་བཞུགས་སྒར་རྡ་རམ་ས་ལར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་མི་རིགས་དང་རྒྱལ་བསྟན་ཆབ་སྲིད་ཀྱི་དོན་དུ་ལུས་སྲོག་དོར་བའི་དཔའ་བོ་དཔའ་མོ་རྣམས་ལ་རྗེས་དྲན་བསྔོ་སྨོན་དང་ད་ལྟའང་བཙན་འོག་ཏུ་སྡུག་སྦྱོང་མནར་གཅོད་མྱོང་བཞིན་པ་རྣམས་ལ་གདུང་སེམས་མཉམ་བསྐྱེད་ཀྱི་འཚམས་འདྲི་ཐུགས་གསོ་དང་འབྲེལ་བོད་རྒྱའི་དཀའ་རྙོག་སེལ་ཕྱོགས་ཐད་ ལས་དོན་གྱི་བྱུང་རིམ་དང་གྲུབ་འབྲས་ ད་ལྟའི་གནས་བབ་དང་གཞན་ཡང་ བཙན་བྱོལ་སྤྱི་ཚོགས་ནང་དམངས་གཙོ་འཕེལ་རིམ་བཅས་ཀྱི་སྐོར་༸གོང་ས་མཆོག་གིས་དགོངས་གཞི་ཞིབ་ཕྲ་གསལ་འདོན་གནང་ཡོད་པ་རེད་ཆབ་སྲིད་ཀྱི་སྐུ་དབང་བརྩི་སྤྲོད་གནང་རྒྱུའི་ཐད་༸གོང་ས་མཆོག་གིས་གསུང་འཕྲིན་ནང་གསལ་བར་གཞིགས་ན་ བཙན་བྱོལ་བོད་མིའི་སྤྱི་ཚོགས་ནང་དམངས་གཙོའི་འཕེལ་རིམ་ཡོངས་སུ་རྗོགས་པ་ཡོང་ཆེད་༸གོང་ས་མཆོག་གི་སྔ་རྗེས་དགོངས་གཞི་གསལ་འདོན་གནང་པ་བཞིན་ད་རེས་ཕྱི་ཟླ་༣པའི་ཚེས་༡༤ནས་འགོ་འཛུགས་བྱ་རྒྱུའི་སྐབས་བཅུ་བཞི་པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་དུས་བཅུ་གཅིག་པའི་ཐོག་འཕྲིན་ཡིག་གི་ལམ་ནས་བཅའ་ཁྲིམས་ཀྱི་གཙོས་ཁྲིམས་སྒྲིག་ཁག་ལ་གཞི་རྩའི་བསྐྱར་བཅོས་བྱ་དགོས་རྣམས་བྱེད་དགོས་པའི་ལམ་སྟོན་བྱས་ཏེ་ཆབ་སྲིད་ཀྱི་སྐུ་དབང་ཡོངས་རྗོགས་འོས་འདེམས་བྱས་པའི་འགོ་ཁྲིད་རྣམས་ལ་རྩིས་སྤྲོད་བྱ་རྒྱུའི་ཐག་གཅོད་ཟིན་པ་ཡིན་

ངོས་ཀྱིས་སྲིད་དབང་རྩིས་བྱ་རྒྱུའི་བསམ་ཚུལ་འདི་འགན་འཁུར་བྱེད་འདོད་མེད་པའམ་སེམས་ཤུགས་ཆག་པ་བོད་མིའི་བདེན་དོན་གྱི་འཐབ་རྩོད་བློས་བཏང་བ་བཅས་གཏན་ནས་མིན་པར་བོད་མི་རིགས་ཀྱི་འཕྲལ་ཕུགས་ཁེ་ཕན་ཁོ་ནའི་ཆེད་དུ་དམིགས་པ་ཞིག་ཡིན་པས་ཁྱེད་ཚོའི་རེ་སྐུལ་དང་ལེན་བྱ་ཐབས་མ་བྱུང་ཡང་བོད་མི་ཡོངས་ཀྱིས་ཇི་སྲིད་ངོས་ལ་ཡིད་ཆེས་བློས་འགེལ་ཡོད་པ་ དེ་སྲིད་དུ་ངོས་རང་བོད་ཀྱི་ཡུལ་མི་ཞིག་ཡིན་པས་རང་འགན་ངེས་པར་སྒྲུབ་རྒྱུར་བརྟེན་རིམ་བཞིན་གནད་དོན་འདིའི་དགག་དགོས་རྒྱུ་མཚན་རྣམས་གོ་རྟོགས་ཀྱིས་ངོས་ཀྱིས་ཐག་གཅོད་ལ་མོས་མཐུན་དང་ལེན་བྱེད་པའི་ཡིད་ཆེས་ཡོད་ཅེས་འབོད་སྐུལ་གནང་ཡོད་པ་རེད་