རྒྱ་ནག་ནང་དགེ་རྒན་གྱི་གླ་ཕོག་ཉུང་དྲག་པར་ངོ་རྒོལ་བྱས་འདུག

༄༅༎ཨེ་ཨེཕ་པི་གསར་འགྱུར་བརྒྱུད་ལམ་ནས་གནས་ཚུལ་སྤེལ་བར་གཞིགས་ན་རྒྱ་ནག་ལྷོ་ཕྱོགས་ཀོང་དྲོང་ཞིང་ཆེན་གྱི་ཡང་ཇེང་གྲོང་ཁྱེར་དུ་ཁ་ས་རེས་གཟའ་ཟླ་བའི་ཉིན་ས་གནས་སྲིད་གཞུང་གི་ལས་ཁུངས་མདུན་སློབ་གྲྭའི་དགེ་རྒན་ཆིག་སྟོང་ལྷག་ཙམ་འདུ་འཛོམས་ཀྱིས་ངོ་རྒོལ་བྱས་ཡོད་འདུག ཨེ་ཨེཕ་པི་གསར་འགྱུར་ལས་ཁང་ནས་གནད་དོན་འདིའི་སྐོར་ཞལ་པར་ཐོག་ནས་འདྲི་བརྩད་བྱས་པའི་སྐབས་མིང་འདོན་བྱེད་འདོད་མེད་པའི་ས་གནས་དགེ་རྒན་ཞིག་གིས་གསུངས་ན་ང་ཚོའི་རྫོང་གི་དགེ་རྒན་ཚོར་རྫོང་སྡེ་གཞན་གྱི་དགེ་རྒན་ཚོ་ལས་གླ་ཕོག་སྤར་ཆ་ཉུང་བ་བཟོས་ཡོད་པ་དེས་རྐྱེན་གྱིས་ང་ཚོར་དཀའ་ངལ་འཕར་མ་ཞིག་འཕྲད་ཀྱི་ཡོད་སྟབས་ངོ་རྒོལ་གྱི་ལས་འགུལ་འདི་སྤེལ་བ་རེད་ལ་ང་ཚོར་ཐོབ་ཐང་འདྲ་མཉམ་དགོས་པའི་དགོས་འདུན་བཏོན་གྱི་ཡོད་ཅེས་འགྲེལ་བརྗོད་བྱས་འདུག དེ་དང་ཕྱོགས་མཚུངས་རྒྱ་ནག་གི་ས་ཁུལ་གཞན་མང་པོའི་ནང་དུའང་དགེ་རྒན་གྱི་གནད་དོན་འདིའི་ཐོག་ངོ་རྒོལ་གྱི་ལས་འགུལ་སྤེལ་ཡོད་འདུག ཡང་ལས་འགུལ་ནང་མཉམ་ཞུགས་མ་བྱེད་པའི་དགེ་རྒན་མང་པོས་དྲ་རྒྱའི་ནང་སོ་སོའི་བདེ་སྡུག་བཀོད་པ་སོགས་གང་ལྟར་དགེ་རྒན་ཚོར་གླ་ཕོག་ཆུང་དྲག་པ་དང་ཡང་ན་གླ་ཕོག་སྤར་རྒྱུར་འདྲ་མཉམ་མེད་པའི་སྐོར་གླེང་སློང་མང་པོ་བྱེད་བཞིན་ཡོད་པ་རེད། འོན་ཀྱང་ས་གནས་ཀྱི་ཉེན་རྟོག་ལས་ཁུངས་སུ་ཨེ་ཨེཕ་པི་གསར་ལས་ཁང་ནས་གནད་དོན་འདིའི་སྐོར་འདྲི་བརྩད་བྱས་པའི་སྐབས་གནད་དོན་འདིའི་སྐོར་ལན་འདེབས་བྱེད་འདོད་མེད་ཅེས་བཤད་ཡོད་པ་དང་རྫོང་སྡེའི་ཤེས་ཡོན་ཚན་པའི་འབྲེལ་ཡོད་ལ་འདྲི་པས་སྐབས་ལས་འགུལ་སྤེལ་ཡུལ་ས་གནས་སུ་འབྲེལ་ཡོད་མི་སྣ་ཆེད་གཉེར་བྱས་ཡོད་པ་དེ་དག་གིས་སློབ་གྲྭའི་གནས་ཚུལ་ཞིབ་བརྩད་བྱེད་ནས་རྙོག་ཁྲ་སེལ་གྱི་རེད་ཅེས་ལན་རྒྱབ་ཡོད་པ་གང་ལྟར་རྒྱ་ནག་ནང་ལོ་ལྟར་དགེ་རྒན་དང་ལས་བྱེད།བཟོ་གྲྭའི་ལས་མི་ཚོར་གླ་ཕོག་ཡག་པོ་མ་སྤྲད་པ་དང་སྐབས་རེ་ཟླ་བ་མང་པོའི་གླ་ཕོག་སྤྲོད་རྒྱུ་ནར་འགྱངས་བྱེད་པ་སོགས་ཀྱི་གནས་ཚུལ་ལྷག་གི་ཡོད་རེད་ལ་མུ་མཐུད་ནས་ས་གནས་གང་སར་ངོ་རྒོལ་གྱི་ལས་འགུལ་ཡར་བསྟུད་མར་ཡོང་བཞིན་ཡོད་པ་རེད༎