༸གོང་ས་མཆོག་ཨ་མི་རི་ཀའི་རྒྱལ་སར་ཆིབས་བསྒྱུར།

༄༅༎བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཨ་རིའི་སྲིད་འཛིན་སྦ་རཀ་ཨོ་སྦ་མ་རྣམ་གཉིས་དབར་ཡུན་རིང་གོང་ནས་འཆར་འགོད་གནང་བའི་མཇལ་འཕྲད་དེ་གནང་ཕྱིར། དེ་རིང་༸གོང་ས་༸སྐྱབས་མགོན་ཆེན་པོ་མཆོག་འདི་ག་རྒྱལ་ས་ལྦ་ཤིང་ཀྲོན་དུ་ཞབས་སོར་འཁོད་གནང་མཛད་རྒྱུ་ཡིན་པ་རེད།

ཨ་རིའི་སྲིད་འཛིན་མཆོག་གིས་༸གོང་ས་མཆོག་མཇལ་འཕྲད་ཞུས་གནང་ཡག་དེ་རྒྱ་ནག་གིས་བོད་ཐོག་དམ་བསྒྲགས་བྱེད་བཞིན་པའི་གནད་དོན་ལ་རྒྱལ་སྤྱི་ནས་ཐུགས་སྣང་མུ་མཐུད་ཡོང་རྒྱུར་དགོས་ངེས་ཅན་ཞིག་ཆགས་ཡོད་པ་རེད།

སྲིད་འཛིན་ཨོ་སྦ་མ་མཆོག་གི་གཞུང་སྲིད་འཛིན་སྐྱོང་གི་ངོས་ནས་༸གོང་ས་༸སྐྱབས་མགོན་ཆེན་པོ་མཆོག་ཆོས་ཕྱོགས་ཀྱི་དབུ་འཁྲིད་ཅིག་ལ་ངོས་འཛིན་ཞུས་པའི་ཐོག་ནས་མཇལ་འཕྲད་ཞུ་རྒྱུ་ཡིན་སྐོར་གསུངས་ཏེ། སྲིད་འཛིན་ལས་ཁུངས་ཕོ་བྲང་དཀར་པོའི་ནུབ་ངོས་ཚོགས་ཁང་ནང་མཇལ་འཕྲད་ཞུས་གནང་རྒྱུ་ཡིན་པའི་གསལ་བསྒྲགས་གནང་འདུག།

རྒྱ་གར་ནས་ཨ་རིའི་ཕྱོགས་སུ་ཕེབས་ཐོན་མ་གནང་གོང་ ༸གོང་ས་མཆོག་གི་ཆིབས་ཞབས་ལ་བཅར་བའི་དཔལ་ལྡན་སྐུ་སྒེར་དྲུང་ཆེ་སྟག་ལྷ་བསྟན་འཛིན་ལགས་ཀྱིས་ཕ་རེན་སི་གསར་ལས་ཁང་ལ། དབུ་ཁྲིད་རྣམ་གཉིས་དབར་མཇལ་འཕྲད་གནང་གི་ཡོད་པ་དེ་ནི་གནད་དོན་གལ་ཆེ་ཞིག་ཡིན་པ་དང༌། ཨ་རིའི་སྲིད་འཛིན་མཆོག་གིས་༸གོང་ས་མཆོག་དང་མཇལ་འཕྲད་ཞུས་གནང་ཡག་དེ་ནི་རྒྱལ་སྤྱིའི་སྤྱི་ཚོགས་ནས་

བོད་དོན་ཐོག་དོ་སྣང་གནང་གི་ཡོད་པའི་རྣམ་འགྱུར་གསལ་པོ་ཞིག་མཚོན་ཐུབ་རྒྱུ་ཡིན་པ་མ་ཟད། བོད་ཀྱི་དཀའ་རྙོག་སེལ་ཐབས་སུ་རྒྱ་ནག་གི་ངོས་ནས་འཁུར་མཉམ་ལེན་བྱེད་དགོས་པའི་བརྡ་ལན་ཤུགས་ཆེ་ཞིག་ཀྱང་གནང་ཐུབ་རྒྱུ་ཡིན་སྐོར་གསུངས་བཞག།

ཁ་ས་འདི་ག་རྒྱལ་ས་ལྦ་ཤིང་ཀྲོན་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དམིགས་བསལ་སྐུ་ཚབ་བཀའ་ཟུར་རྒྱ་རི་བློ་གྲོས་རྒྱལ་མཚན་རིན་པོ་ཆེ་ནས་གསར་འགོད་ལྷན་ཚོགས་ཤིག་གི་ཐོག། ཨ་རིའི་སྲིད་འཛིན་དང་༸གོང་ས་མཆོག་རྣམ་གཉིས་དབར་ནང་མོལ་མཇལ་འཕྲད་གནང་རྒྱུ་ཡིན་པ་ལས། མཇལ་འཕྲད་གྲུབ་མཚམས་ཟུང་འབྲེལ་གསར་འགོད་གསལ་བསྒྲགས་གནང་རྒྱུའི་མཛད་འཆར་རིགས་ཕལ་ཆེར་མེད་པའི་སྐོར་གསུངས་ཏེ། དབུ་ཁྲིད་རྣམ་གཉིས་དབར་གྱི་མཇལ་འཕྲད་དེ་ཕྱིར་བསྒྲགས་མ་གནང་བ་ཡིན་ནའང༌།  བོད་དོན་ལ་རྒྱབ་སྐྱོར་དང༌། འགྲོ་བ་མིའི་ཐོབ་ཐང་གོང་འཕེལ་གཏོང་ཕྱོགས་ཐད་ཨ་མི་རི་ཀས་འགན་འཁུར་བཞེས་ཀྱི་ཡོད་པའི་རྣམ་པ་ཤུགས་ཆེ་རུ་འགྲོ་རྒྱུར་དགེ་མཚན་ཡོད་སྐོར་འགྲེལ་བརྗོད་གནང་བཞག།