རྔ་པ་ཀིརྟི་དགོན་པའི་ཆེད་མཆོད་འབུལ།

༄༅༎དེ་རིང་ཕྱི་ཟླ་ ༤ ཚེས་ ༢༦ ཉིན་བཞུགས་སྒར་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་ བོད་ཀྱི་བླ་ན་མེད་པའི་དབུ་འཁྲིད་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དབུ་ཞུགས་ཐོག་ཛ་དྲག་དང་དཀའ་སྡུག་ཆེ་ཆེར་འོག་གནས་བཞིན་པའི་མདོ་སྨད་རྔ་པ་ཀིརྟི་དགོན་པའི་དགེ་འདུན་པ་ཚོའི་ཆེད་མཆོད་འབུལ་ཐུགས་སྨོན་གསོལ་འདེབས་རྒྱ་ཆེ་ཞིག་གནང་འདུག།

བཙན་བྱོལ་བོད་གཞུང་གི་དྲ་རྒྱའི་ཐོག་འདིའི་སྐོར་གནས་ཚུལ་སྤེལ་བ་ཞིག་གི་ནང་ ད་རེས་ཀྱི་མཆོད་འབུལ་གསོལ་འདེབས་དེ་ནི་ ཕྱི་ལོ་ ༢༠༠༨ ལོར་བོད་ཁྱོན་ཡོངས་ཀྱི་ནང་ས་བྱི་ཞི་རྒོལ་ཆེན་མོའི་ལས་འགུལ་སྤེལ་ཏེ་ལོ་གསུམ་འཁོར་བའི་དུས་དྲན་དང་ དེ་བཞིན་མདོ་སྨད་རྔ་པ་ཀིརྟི་དགོན་པའི་དགེ་འདུན་པ་རང་ལུས་མེར་བསྲེགས་བཏང་སྟེ་སྐུ་སྲོག་དོར་མཁན་ཕུན་ཚོགས་ལགས་ཀྱི་ཞེ་དགུའི་དུས་ཚིགས་སྔ་བསྣུར་གྱི་སྲུང་བརྩི་ཞུ་རྒྱུས་གཙོས་ བོད་བསྟན་པ་ཆབ་སྲིད་ཀྱི་དོན་དུ་སྐུ་གཤེགས་ཕོ་མོ་ཡོངས་དང་ ད་ལྟ་རྒྱ་མིའི་བཙན་འོག་ཏུ་མནར་གཅོད་མྱོང་བཞིན་པ་རྣམས་ཀྱི་ཆེད་དམིགས་པ་ཞིག་ཡིན་པ་བཀོད་འདུག།

ཐེངས་འདིའི་མཆོད་འབུལ་འདི་བཞུགས་སྒར་རྡ་རམ་ས་ལའི་ཁུལ་གནས་རྔ་པ་མི་དམངས་ཡོངས་དང་ དེ་བཞིན་ཚོགས་པ་སྐྱིད་སྡུག་ཐོུང་ནས་གོ་བསྒྲིགས་ཞུས་པ་ཞིག་ཡིན་ཞིང་ མཆོད་འབུལ་གསོལ་འདེབས་དེའི་ཐོག་གཞན་ཡང་ ཀིརྟི་རིན་པོ་ཆེ་དང་ རྣམ་རྒྱལ་གྲྭ་ཚང་གི་མཁན་པོ་ཁྲུམ་རྟོག་རིན་པོ་ཆེ་ བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེ་མཆོག་དབུས་ བཙན་བྱོལ་བོད་གཞུང་གི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་ དྲུང་ཆེ་ལས་བྱེད་རྣམ་པ་ བཞུགས་སྒར་ཁུལ་གནས་རིས་མེད་ཆོས་སྡེ་ཁག་གི་དགེ་བཙུན་སོགས་ཁྱོན་བསྡོམས་མི་གྲངས་ ༢༠༠༠ སྐོར་ཚོགས་ཞུགས་གནང་ཡོད་འདུག།