༸གོང་ས་མཆོག་ཨོ་སི་ཁྲོ་ལི་ཡའི་ནང་ཆིབས་བསྒྱུར་བསྐྱང་རྒྱུ།

༄༅༎སང་ཉིན་ནས་བཟུང་དུས་ཡུན་ཉིན་གྲངས་༡༡རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨོ་སི་ཁྲོ་ལི་ཡའི་ནང་ཆིབས་བསྒྱུར་བསྐྱངས་གནང་མཛད་ཀྱི་ཡོད་པ་དང་། ༸གོང་ས་༸སྐྱབས་མགོན་ཆེན་པོ་མཆོག་ཨོ་སི་ཁྲོ་ལི་ཡའི་ནང་ཆིབས་བསྒྱུར་བསྐྱངས་རིང་ཨོ་སི་ཁྲོ་ལི་ཡའི་ཕྱོགས་གལ་ཚོགས་པའི་དབུ་ཁྲིད་ཀྲོ་ནི་ཨེ་སྦོཏ་མཆོག་ནས་གཟའ་འཁོར་རྗེས་མའི་གཟའ་མིག་དམར་ཉིན་༸གོང་ས་མཆོག་དང་མཇལ་འཕྲད་གནང་རྒྱུ་ཕྱིར་བསྒྲགས་གནང་ཡོད་པ་དང་།  དེ་བཞིན་༸གོང་ས་མཆོག་དང་ལྗང་ཁུ་ཚོགས་པའི་ཚོགས་གཙོ་སྦོབ་སྦ་རའོན་མཆོག་དང་། དེ་མིན་ཨོ་སི་ཁྲོ་ལི་ཡའི་ངལ་རྩོལ་ཚོགས་པ་དང་བཅིངས་བཀྲོལ་ཚོགས་པ་སོགས་སྲིད་དོན་ཚོགས་པའི་དཔོན་རིགས་དང་ གྲོས་ཚོགས་ཀྱི་འཐུས་མི་སོགས་སྲིད་དོན་མི་སྣ་མང་པོ་ཞིག་དང་མཇལ་འཕྲད་གནང་འཆར་ཡོད་ཀྱང་། ད་ལྟའི་ཆར་ཨོ་སི་ཁྲོ་ལི་ཡའི་སྲིད་བློན་ཇུ་ལི་ཡ་ཇི་ལའདྲ་མཆོག་ནས་ད་ལྟ་ཡང་༸གོང་ས་མཆོག་དང་མཇལ་འཕྲད་ཞུ་མིན་ཁ་གསལ་ཕྱིར་བསྒྲགས་གང་ཡང་གནང་མེད་པར་བརྟེན་ཨོ་སི་ཁྲོ་རི་ཡའི་ནང་ཡོད་པའི་བོད་དོན་རྒྱབ་སྐྱོར་ཚོགས་པས་ཨོ་སི་ཁྲོ་རི་ཡ་གཞུང་གི་དཔོན་རིགས་དང་༸གོང་ས་མཆོག་དབར་མཇལ་འཕྲད་གནང་རྒྱུར་རྒྱ་ནག་གཞུང་གིས་གནོན་ཤུགས་སྤྲོད་མིན་ལ་མ་ལྟོས་པར་ ཨོ་སི་ཁྲོ་ལི་ཡའི་སྲིད་བློན་ནས་༸གོང་ས་མཆོག་མཇལ་འཕྲད་གནང་དགོས་པ་དེ་རིང་གཟའ་ལྷག་པའི་ཉིན་འབོད་སྐུལ་ཞུས་ཡོད་པ་རེད༎