ཨོ་སེ་ཊེ་ལི་ཡའི་གྲོས་ཚོགས་ནང་བོད་དོན་གླེང་ཡོད་པ།

༄༅༎ཨོ་སེ་ཀྲེ་ལི་ཡའི་གྲོས་ཚོགས་ནང་། ཕྱི་སྲིད་བློན་ཆེན་སྦོབ་ཀར་མཆོག་གིས་བོད་ནང་གི་ཛ་དྲག་གནས་སྟངས་ཐོག་རྟོག་ཞིབ་སླད་གཞུང་ཚབ་པ་གཏོང་གནང་རྒྱུ་ཡིན་ཞེས་གསུངས་པ་མ་ཟད། མ་འོངས་པར་གྲོས་ཚོགས་ཀྱི་སྐུ་ཚབ་ཚོགས་ཆུང་ཞིག་ཀྱང་བོད་ནང་ཕེབས་ཆོག་པའི་རྒྱ་ནག་གཞུང་ལ་ཆོག་མཆན་ཞུ་རྒྱུ་ཡིན་ཞེས་གསུངས་ཡོད་པ་རེད། འོན་ཀྱང་རྒྱ་ནག་གུང་བྲན་ཚོགས་པས་བདག་གཉེར་བྱེད་པའི་གྷོ་ལ་བྷལ་ ཀྲ་ཡེམ་སེ་ཞེས་པའི་གསར་ཤོག་ནང་། བོད་ནང་བྱུང་བའི་གནས་ཚུལ་དེ་དག་རྒྱ་ནག་ནང་གི་གནད་དོན་ཞིག་ཡིན་སྟབས་དེར་ཨོ་སེ་ཀྲེ་ལི་ཡའི་ཐེ་བྱུས་བྱེད་ན་འགྲིགས་ཀྱི་མེད་ལུགས་དཔྱད་གཏམ་སྤེལ་ཡོད་འདུག དེ་ཡང་མིན་ཛུ་གཙུག་ལག་སློབ་གཉེར་ཁང་གི་སློབ་དཔོན་ཝུ་ ཆུ་ཀིས། སྦོབ་ ཀར་གྱིས། གནས་ཚུལ་དེ་ཨོ་སེ་ཀྲེ་ལི་ཡའི་ནང་གི་ཆབ་སྲིད་ཤིག་རེད་བསམ་གྱི་ཡོད་ཀྱི་རེད། ཀེ་ལྦན་ རུདྲ་ལས་གནས་ནས་འཁྱུར་ཏེ་ད་ཆ་ཁོ་པ་ཕྱི་སྲིད་བློན་ཆེན་གསར་པ་ཆགས་པའི་རྗེས་རྒྱ་ནག་ལ་འགྲོ་བ་མིའི་ཐོབ་ཐང་གི་རྙོག་ཁྲ་བཤད་ནས་ཨ་རི་དང་འབྲེལ་བ་བཟོ་རྒྱུའི་ཐབས་བྱུས་ཤིག་རེད་ཅེས་གང་ལྟར་བོད་ནང་གི་གནད་དོན་དེ་ཨོ་སེ་ཀྲེ་ལི་ཡའི་གནད་དོན་མ་རེད་ལ་ཨོ་སེ་ཀྲེ་ལི་ཡས་རྒྱ་ནག་གི་ནང་སྲིད་ལ་ཐེ་བྱུས་བྱེད་རྒྱུའི་ཐོབ་ཐང་ཡོད་མ་རེད་ཅེས་འགྲེལ་བརྗོད་བྱེད་འདུག དམིགས་བསལ་རྒྱ་ནག་གི་ཕྱི་སྲིད་ལས་ཁུངས་ནས་ཀྱང་། ཨོ་ས་ཀྲེ་ལི་ཡའི་དང་འབྲེལ་ལམ་བཟང་ཕྱོགས་སུ་བསྐྱོད་ཐབས་བྱ་རྒྱུ་ནི་ང་ཚོའི་སྲིད་བྱུས་རེད། ཡིན་ནའང་བོད་ཀྱི་གནད་དོན་དེ་རྒྱ་ནག་གི་ནང་གི་གནད་དོན་ཞིག་ཡིན་པ་དང་། དེར་ཐེ་བྱུས་སུས་བྱེད་པ་ཡིན་ནའང་དེར་ང་ཚོས་ངོ་རྒོལ་ཡོད་པའང་གསལ་པོ་བཟོ་རྒྱུ་ཡིན་ཞེས་གཏམ་བཤད་སྤེལ་ཡོད་པ་རེད།།