བོད་ནང་ཆུ་བེད་འཛུགས་སྐྲུན་ཐོག་མ་རྩ་འཛུགས་འཇོག་སྐོར།

༄༅༎རྒྱ་ནག་གཞུང་གིས། བོད་ནང་ཆུ་བེད་འཛུགས་སྐྲུན་གྱི་ལས་དོན་རྨང་གཞིའི་ཐོག་ལོ་རེར་མ་རྩ་འཛུགས་འཇོག་ལྡབས་འགྱུར་མང་དུ་གཏོང་རྒྱུ་ཡིན་པ་བཤད་ཡོད་པ་རེད།

བོད་རང་སྐྱོང་ལྗོངས་ཟེར་བའི་ས་གནས་གཞུང་གིས། མ་འོངས་པའི་ལོ་བཅུའི་ནང་དུ་བོད་ཀྱི་ས་ཁུལ་ནང་དུ་ཆུ་བེད་འཛུགས་སྐྲུན་གྱི་ལས་གཞིའི་ཐོག་མ་དངུལ་འཛུགས་འཇོག་བྱེད་ཡ་ནི། ༢༠༡༠དང་བསྡུར་ན་ལྡབས་འགྱུར་མང་དུ་གཏོང་རྒྱུའི་འཆར་གཞི་ཡོད་པ་དང༌། བོད་རང་སྐྱོང་ལྗོངས་ཟེར་བའི་དམར་ཤོག་ཚོགས་པའི་དྲུང་ཆེ། ཀྲང་ཆིང་ལི་ཡིས། བོད་ཀྱི་ཆུའི་ཐོན་ཁུངས་ཕྱུག་པའི་ས་ཁུལ་ཞིག་ཡིན་པ་མ་ཟད། གློག་ཤུགས་ཆུ་མཛོད་ཀྱི་ཐོན་ཁུངས་གལ་ཆེ་ཞིག་ཡིན་པར་བརྟེན། བོད་ཀྱི་ཆུ་བེད་ཐོན་ཁུངས་ནི་བོད་འཛུགས་སྐྲུན་ཡར་རྒྱས་ཀྱི་གཙོ་བོའི་མཐུན་རྐྱེན་ཞིག་ཡིན་པར་སོང༌། བོད་ནང་ཆུའི་འཛུགས་སྐྲུན་གྱི་རྨང་གཞི་ལས་དོན་ལག་བསྟར་བྱ་དགོས་པ་ནི་ཁ་ཚ་དགོས་བཏུགས་ཀྱི་ལས་དོན་ཞིག་ཡིན་པ་བཤད་ཡོད་པ་རེད། བོད་རང་སྐྱོང་ལྗོངས་ཟེར་བའི་ཆུའི་ལས་དོན་ཚན་པས་བཤད་པར་གཞིགས་ན། བོད་ཀྱི་གྲོང་གསེབ་དང་འབྲོག་པ་མི་དམངས་ཚོར་ཆུ་ཤུགས་ཀྱི་གློག་མཁོ་འདོན་བྱེད་ཐུབ་པའི་ཆེད་དུ་བོད་ཀྱི་གལ་ཆེའི་གཙང་ཆུ་ཁག་ཅིག་གི་ཐོག་གཞི་རྒྱ་ཆེ་བའི་ཆུའི་འཛུགས་སྐྲུན་ལས་དོན་ལག་བསྟར་བྱ་རྒྱུའི་འཆར་གཞི་ཡོད་པ་མ་ཟད། ཕྱི་ལོ་༢༠༡༣ནང་ཚུད་ལ་གོང་གསལ་ཞིང་འབྲོག་ས་ཁུལ་དུ་འཐུང་ཆུ་མཁོ་འདོན་བྱ་རྒྱུའི་ཐག་གཅོད་བྱས་ཟིན་པ་ལྟར། ཞིང་འབྲོག་ས་ཁུལ་དེ་དག་ནང་འཐུང་ཆུའི་དཀའ་ངལ་དེ་ལོ་ལྔའི་ལས་དོན་འཆར་གཞིའི་ནང་ལེགས་གྲུབ་ཡོང་རྒྱུ་ཡིན་པ་བཤད་ཡོད་པ་རེད།