ཁམས་ཁུལ་དུ་ཉེན་རྟོག་པས་དུད་ཚང་རེ་རེ་བཞིན་བསྔོཌ་ཡོད་པ།

༄༅༎ཕྱི་ཟླ་བཞི་པའི་ཚེས་བཅུ་བཞི་གཡས་གཡོན་དུ་བོད་ཤར་ཕྱོགས་ཁམས་འབའ་ཐང་རྫོང་ཁོངས་སྤོ་གུར་གཤིས་ཤང་ཁོངས་སྒར་དུ་ལུང་པར་སྤྱི་བདེ་ཉེན་རྟོག་པ་དང་དྲག་ཆས་ཉེན་རྟོག་དམག་མི་གྲངས་བདུན་བཅུ་ཙམ་སླེབས་ཏེ་གྲོང་ཚོའི་ནང་གི་དུད་ཚང་རེ་རེ་བྱས་ཏེ་བསྔོག་བཤེར་བྱས་ཡོད་པ་དང་ཉུང་མཐར་བོད་མི་གྲངས་བརྒྱ་ཙམ་འཛིན་བཟུང་བྱས་མ་ཚར་བར་རྒྱ་དམག་གིས་ས་གནས་ནས་ཕྱིར་ཐོན་རྒྱུ་མིན་པའི་ཁ་གཏམ་ཡང་བཤད་ཡོད་ལུགས་བཙན་བྱོལ་བོད་གཞུང་གི་དྲྭ་རྒྱའི་ཐོག་གནས་ཚུལ་སྤེལ་འདུག

བོད་གཞུང་ལ་ཁུངས་ལྡན་གནས་ཚུལ་འབྱོར་བ་ལྟར་ན་ས་གནས་སུ་གནས་ཚུལ་དེ་ལྟར་ཐོན་དགོས་པའི་རྒྱུ་རྐྱེན་གཙོ་བོ་ནི་ད་ལོའི་ཕྱི་ཟླ་གསུམ་པའི་ཚེས་ཤར་དུ་སུས་བརྒྱབ་མིན་མི་ཤེས་པར་འབའ་ཐང་རྫོང་ཁོངས་སྤོ་གུར་གཤིས་ཤང་ཉེན་རྟོག་ལས་ཁུངས་སུ་འབར་གས་ཀྱི་དོན་རྐྱེན་ཞིག་བྱུང་ཡོད་པ་དང་དུས་ཚོད་དེའི་གཡས་གཡོན་དུ་ས་གནས་དེར་རྒྱ་སྐད་དང་བོད་ཡིག་གཉིས་ཐོག་རྒྱ་མི་བོད་ནས་མར་རྒྱུག།བོད་ཀྱི་བདག་པོ་བོད་མི་ཡིན།ཞེས་པ་སོགས་ཀྱི་འཕྲེད་དར་ཆེན་པོ་བཀལ་བ་སོགས་ཀྱི་གནས་ཚུལ་ཐོན་རྗེས་སྐད་ཡིག་གཉིས་ཀ་ཤེས་མཁན་གྱི་བོད་མི་བཞིར་དོགས་གཞི་བྱས་ཏེ་འཛིན་བཟུང་བྱེད་པར་ཡོང་སྐབས་བོད་མི་དེ་དག་ས་གནས་ནས་བྲོས་བྱོལ་དུ་འགྲོ་དགོས་བྱུང་ཡོད་འདུག སྤྱི་བདེ་ཉེན་རྟོག་པས་མུ་མཐུད་ཞིབ་འཇུག་བྱས་ཏེ་ས་གནས་སུ་ཡོད་པའི་སྐྱེས་པ་ཚང་མར་སུན་གཙེར་ཤུགས་ཆེ་བཟོས་སྟབས་སྐྱེས་པ་མང་པོ་ཞིག་རང་གནས་སུ་སྡོད་མ་ཐུབ་པར་ས་ཆ་གཞན་ལ་ཉེན་གཡོལ་དུ་བསྐྱོད་ཡོད་པར་བརྟེན་ས་གནས་དེར་ས་ཞིང་རྨོས་མ་ཐུབ་པར་ལུས་ཡོད་པའི་གནས་ཚུལ་ཐོན་ཡོད་རེད། ཕྱི་ཟླ་གསུམ་པའི་ནང་འབར་གས་ཀྱི་དོན་རྐྱེན་དང་ཕྱི་ཟླ་བཞི་པའི་ཚེས་བཅུ་བཞིའི་དོན་རྐྱེན་རྗེས་སུ་ས་གནས་ཀྱི་དྲག་ཆས་དམག་མི་དེ་ཚོས་ཡུལ་མིར་དམ་བསྒྲགས་ཀྱི་ལས་འགུལ་སྤེལ་ཡོད་འདུག ས་གནས་ཡུལ་མི་ཚོས་སྔོག་བཤེར་བྱེད་མཁན་གྱི་དམག་མི་ཚོར་ངོ་རྒོལ་གྱི་རྣམ་འགྱུར་ཤུགས་ཆེ་འདོན་བཞིན་ཡོད་པ་མ་ཟད་སྔ་ལོའི་ཕྱི་ཟླ་ལྔ་པའི་ནང་དུའང་རྒྱ་ནག་གཞུང་ནས་རྒྱལ་གཅེས་རིང་ལུགས་ཀྱི་སློབ་གསོའི་ལས་འགུལ་སྤེལ་མཁན་གྱི་ལས་བྱེད་ས་གནས་སུ་ཡོང་སྐབས་མང་ཚོགས་ནས་ངོ་རྒོལ་གྱི་རྣམ་འགྱུར་ཤུགས་ཆེ་བསྟན་ཡོད་པའི་གནས་ཚུལ་ཡང་ཐོན་མྱོང་ཡོད་ལུགས་འགྲེལ་བརྗོད་གནང་འདུག༎