གླུ་བ་ཨ་མཆོག་ཕུལ་བྱུང་ཉེན་གཡོལ་དུ་འགྲོ་དགོས་བྱུང་བ།

༄༅༎བོད་ཀྱི་གླུ་པ་ཨ་མཆོག་ཕུལ་བྱུང་ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང༌། བཀའ་ཁྲི་བློ་བཟང་སེངྒེ་ལགས་གཉིས་ལ་བསྟོད་གླུའི་གླུ་གཞས་བླངས་པའི་རྐྱེན་གྱིས་ཉེ་ཆར་རྒྱ་ནག་གཞུང་གིས་འཛིན་བཟུང་བྱ་རྒྱུའི་བཀའ་རྒྱ་བཀྲམ་པའི་རྗེས་ད་ཆ་ཁོང་རི་ལ་ཉེན་གཡོལ་དུ་འགྲོ་དགོས་བྱུང་ཡོད་པ་རེད།

དེ་རིང་བོད་ཀྱི་བང་ཆེན་གསར་ཤོག་གི་དྲ་རྒྱའི་ཐོག་གནས་ཚུལ་སྤེལ་བར་གཞིགས་ན། གནས་ཚུལ་དེའི་སྐོར་རྒྱ་གར་ལྷོ་ཕྱོགས་མོན་གྷོ་ཊིར་བཞུགས་པ་སྐུ་ཞབས་འཇམ་དབྱངས་ལགས་དང་བསམ་གཏན་ལགས་གཉིས་ཀྱིས་ངོ་སྤྲོད་གནང་བྱུང་བ་བཀོད་ཡོད་པ་དང༌། ཁོང་གཉིས་ཀྱིས་གསུངས་པའི་ནང༌། བོད་ཀྱི་གླུ་པ་ཨ་མཆོག་ཕུལ་བྱུང་ལགས་ཀྱིས་ཉེ་ཆར་ཟི་ཁྲོན་ཞིང་ཆེན་གྱི་གྲན་རྡུ་གྲོང་ཁྱེར་ནས་ཁོང་གིས་ཆེད་བསྒྲིགས་བྱས་པའི་བརྙན་འཁོར་ཐེངས་ལྔ་པ་འདོན་སྤེལ་བྱས་པའི་རྗེས། རྒྱ་ནག་གཞུང་གིས་ཁོང་འཛིན་བཟུང་བྱ་དགོས་པའི་བཀའ་རྒྱ་བཀྲམ་པར་བརྟེན་ནས་རི་ལ་ཉེན་གཡོལ་དུ་འགྲོ་བ་བྱུང་བ་ཡིན་ཞིང༌། ཁོང་འཛིན་བཟུང་བྱ་དགོས་པའི་བཀའ་རྒྱ་བཀྲམ་དགོས་དོན་ནི། གླུ་པ་ཁོང་གིས་རྒྱལ་བ་རིན་པོ་ཆེ་དང་བཀའ་ཁྲི་བློ་བཟང་སེ་ངྒེ་ལགས་ལ་བསྟོད་གླུའི་ནང་དོན་མཚོན་པའི་གླུ་གཞས་དང༌། བོད་ནང་གི་ད་ལྟའི་དངོས་ཡོད་དཀའ་སྡུག་གི་གནས་སྟངས་སོགས་གླུའི་གཞས་ཀྱི་ནང་དོན་དུ་བཀོད་དེ་གླུ་བླངས་ཏེ་མི་དམངས་ལ་གསལ་འདོན་བྱས་ཡོད་པའི་སྐོར་ངོ་སྤྲོད་གནང་ཡོད་པ་རེད། གླུ་པ་ཨ་མཆོག་ཕུལ་བྱུང་ལགས་ནི། ཟི་ཁྲོན་ཞིང་ཆེན་གྱི་འབར་ཁམས་ཁུལ་ཁྱུང་མཆུ་རྫོང་གི་ཨ་མཆོག་ཡུལ་ཚོའི་ཨ་མཆོག་སྟོད་མ་སྡེ་བ་ནས་ཡིན་པ་དང༌། ཁོང་གི་ཕ་ཡི་མཚན་ལ་སྒྲོལ་མ་སྐྱབས་དང། མ་ཡི་མཚན་ལ་སྒྲོལ་མ་ཡིན་ཞིང༌། ཁོང་ནི་དགུང་ལོ་སུམ་ཅུ་སོ་གྲངས་ཤིག་ཡིན་པ་དང༌། ཁོང་གི་བརྩམས་པའི་གླུ་གཞས་ཀྱི་བརྙན་འཕྲིན་དེའི་མིང་ལ་ཁུལ་གྱི་ནོན་པའི་ང་ཚོ་ཞེས་འབོད་པ་དང༌། བརྙན་འཕྲིན་དེའི་ནང་དུ་གླུ་གཞས་ཁྱོན་རྣམ་གྲངས་བཅུ་གསུམ་ཡོད་པ་མ་ཟད། དེའི་ནང་གི་གླུ་གཞས་ཀྱི་ནང་དོན་ལ་རྒྱལ་པོ་རིན་པོ་ཆེ་དང་བཀའ་ཁྲི་གཉིས་ལ་བསྟོད་གླུ་ཕུལ་བ་ཙམ་མ་ཡིན་པར་སྐུ་པར་ཡང་དངོས་སུ་མཇལ་རྒྱུ་ཡོད་པ་ཡིན་པས། ད་ཆ་ཁོང་གི་ཚེ་སྲོག་ལ་ཉེན་ཁ་ཆེན་པོར་ལྷུངས་ཡོད་པའི་གནས་ཚུལ་བཀོད་བཞག།