བོད་ཀྱི་རྔ་པ་ཁུལ་དུ་དམ་བསྒྲགས་མུ་མཐུད་བྱེད་བཞིན་པ།

༄༅༎བོད་ཀྱི་ཨ་མདོ་རྔ་པ་ཁུལ་དུ་ཁྲིམས་གཅོད་དམ་བསྒྲཌ་ཀྱི་་གནས་ཚུལ་མུ་མཐུད་ནས་ཐོན་བཞིན་པ་ཤེས་རྟོགས་བྱུང་འདུག་། བོད་ནས་འདི་ག་རླུང་འཕྲིན་ཁང་ནས་གནས་ཚུལ་འབྱོར་དོན་ལྟར་ན་ བོད་ཀྱི་མདོ་སྨད་རྔ་པ་ཁུལ་གྱི་རྔ་བ་སྒོ་མང་དགོན་གྱི་ན་གཞོན་རྩོམ་པ་པོ་འབྲོག་རུ་ཚུལ་ཁྲིམས་ལགས་འབར་ཁམས་མི་དམངས་ཁྲིམས་ཁང་གིས་ ལོ་ངོ་བཞི་དང་ཟླ་བ་དྲུག་གི་བཙོན་འཇུག་གི་ཁྲིམས་ཐག་བཅད་པ་མ་ཟད་ ཁོང་གི་མ་རྒན་དང་སྤུན་མཆེད་རྒན་པ་གཉིས་ལ་ཁྲིམས་ཐག་གཅོད་རྒྱུའི་བརྡ་ཡིག་འབྱོར་རྗེས་འབར་ཁམས་བཀག་ཉར་ཁང་དུ་འགྲོ་དུས་ཁྲིམས་ཆོད་ཀྱི་ཡིག་ཆ་བསྟན་པ་ལས་ འབྲོག་རུ་ཚུལ་ཁྲིམས་དངོས་སུ་ཐུག་སྤྲད་ཀྱི་གོ་སྐབས་གནང་མེད་པ་རེད་འདུག་། ཉིན་ཤས་རྗེས་སུ་ཚུལ་ཁྲིམས་ལགས་འབར་ཁམས་བཀག་ཉར་ཁང་ནས་ཁྲིན་ཏུའི་གྲོང་ཁྱེར་ནང་བཙོན་འཇུག་བྱེད་རྒྱུ་ཡིན་པ་ཤེས་རྟོགས་བྱུང་འདུག་། འབྲོག་རུ་ཚུལ་ཁྲིམས་ལགས་ཕྱི་ལོ་༢༠༡༠་ཟླ་ ༥་ ཚེས་ ༢༤་ ཉིན་རྔ་བ་སྒོ་མང་དགོན་ནས་ཐེངས་གཉིས་འཛིན་བཟུང་བཀག་ཉར་བྱས་པའི་མི་སྣ་ཞིག་ཡིན་པ་རེད་འདུག་། དེ་བཞིན་རྔ་པ་རྗོང་གི་ཕྱུགས་ལས་གོང་མའི་ཆོས་རྒྱམ་ཚང་གི་ཆོས་རྒྱམ་ཞུས་པའི་བོད་རིགས་རང་ལོ་ ༣༣་ཙམ་ཡིན་པ་ཞིག་ཀྱང་ཕྱི་ཟླ་བཞི་པའི་ཟླ་དཀྱིལ་ཙམ་ནང་གར་སོང་ཆ་མེད་དུ་གྱུར་ཡོད་ཅིང་། ཉེ་སྔོན་ཁྲིན་ཏུ་གྲོང་ཁྱེར་གྱི་གསང་བའི་ལས་ཁུངས་ཀྱི་མི་སྣ་དང་ཉེན་རྟོག་པ་མཉམ་འབྲེལ་བྱས་ཏེ་རྗོང་ཐོག་ཏུ་ཡོད་པའི་ཁོང་གི་ཨ་མ་དང་ འབྲོག་ཁུལ་དུ་ཡོད་པའི་ཁོང་གི་ནང་ཁྱིམ་ལ་་བསྔོག་བཤེར་བྱས་ཡོད་ཅིང་། དེ་ནས་ནང་མི་རྣམས་ཀྱིས་ཁྲིན་ཏུར་བཀག་ཉར་བྱས་ཡོད་པ་ཤེས་རྟོགས་བྱུང་ཡོད་པ་དང་ རྔ་པ་ཀིརྟི་དགོན་པའི་གྲ་རྩོམ་པ་པོ་སྒོ་ཤེས་རབ་གློད་བཀྲོལ་མ་བཏང་བར་དུ་གར་སོང་ཆ་མེད་ཀྱི་གནས་སུ་གནས་ཡོད་པ་སོགས་གནས་ཚུལ་མང་པོ་ཡོང་གི་ཡོད་པའི་གནས་ཚུལ་ཤེས་རྟོགས་༎