ལྷ་སར་ལོ་གསར་སྲུང་བརྩི་དགོས་པའི་བཙན་བཀའ་བཏང་བ།

༄༅།།འདི་གར་ཕྱི་ལོ་ ༢༠༡༢ ཟླ་ ༢ ཚེས་ ༡༨ ཉིན་ཁུངས་ལྡན་གནས་ཚུལ་འབྱོར་གསལ་ལྟར་ན།  ལྷ་སར་གྲོང་ཁྱེར་འབྲེལ་ཡོད་ཚན་པས་གྲོང་ཁྱེར་ཁྱབ་ཁོངས་ཀྱི་སྲིད་ཁྲིམས་ཚན་པའི་ལས་ཁུངས་ཁག་གཙོ་བོར་གྱུར་བའི་ལས་ཁུངས་ཁག་གི་ལས་བྱེད་དང་།  མང་ཚོགས་རྣམས་ལ་བོད་ཀྱི་ལོ་གསར་དགའ་གཏོང་ཆེད་ངེས་པར་ཞབས་གཞས་སྦྱང་སྟེ་འཁྲབ་སྟོན་བྱེད་དགོས་པའི་བཙན་བཀའ་བཏང་ཡོད་པ་མ་ཟད།  ལྷག་པར་དུ་ཁྲེང་ཀོན་ཆུས་ཁོངས་གཏོགས་ཀྱི་ཨུ་ཡོན་ལྷན་ཁང་སོ་སོ་ནས་ཐེམ་དུད་བརྒྱ་རེ་འདེམས་སྒྲུག་གིས་ཞབས་གཞས་འཁྲབ་རྒྱུར་སྐུལ་སློང་བྱེད་དགོས། གལ་ཏེ་འདེམས་སྒྲུག་ཟིན་པའི་ཁྱིམ་ཚང་སུ་ཞིག་ནས་འཁྲབ་སྟོན་ནང་མཉམ་ཞུགས་བྱེད་འདོད་མེད་པའམ་གཞོགས་འདེགས་བྱེད་འདོད་མེད་པའི་རྣམ་འགྱུར་བསྟན་ཚེ་དེ་དག་ལ་རྒྱུན་གཏན་ཨུ་ཡོན་ལྷན་ཁང་ནས་མཐུན་འགྱུར་དགོས་ངེས་རིགས་བཀག་འགོག་བྱ་རྒྱུ་དང་།  ངོ་བོ་རྩད་གཅོད་ཀྱིས་ཐག་གཅོད་ནན་པོ་བྱ་རྒྱུ་ཡིན་པའི་ནང་ཁུལ་བརྡ་ཐོ་བཏང་ཡོད་པ་ལྟར།  ལས་བྱེད་གཞོན་སྐྱེས་ཁག་དང་འདེམས་སྒྲུག་ཟིན་པའི་མང་ཚོགས་ཀྱི་ཞབས་གཞས་རིགས་ཆེད་སྦྱོང་གིས་ལྷ་སའི་ནང་ལོ་གསར་སྲུང་བརྩི་བྱེད་ཀྱི་ཡོད་པའི་རྣམ་པ་མཚོན་ཐབས་བྱ་རྒྱུ་ཡིན་འདུག།