བོད་ཀྱི་ཞིང་འབྲོག་ས་ཁུལ་ནང་སློབ་སྦྱོང་མཐུན་རྐྱེན་གྱི་དཀའ་ངལ།

༄༅༎རྒྱ་ནག་གིས་བོད་མིའི་ཆེད་དུ་བོད་ཀྱི་ས་ཁུལ་ནང་མཐུན་རྐྱེན་གཞི་རྒྱ་ཆེན་པོ་ཕུལ་གྱི་ཡོད་པའི་གནས་ཚུལ་དྲིལ་བསྒྲགས་བྱེད་བཞིན་པ་ཡིན་རུང་བོད་ཀྱི་ཞིང་འབྲོག་ས་ཁུལ་ནང་སློབ་སྦྱོང་གི་མཐུན་རྐྱེན་ཐོག་དཀའ་ངལ་ཆེན་པོ་ཡོད་པ་ཤེས་རྟོགས་བྱུང་འདུག

དེ་ཡང་བོད་ནས་གནས་ཚུལ་ངོ་སྤྲོད་གནང་མཁན་གྱིས་ངོ་སྤྲོད་གནང་དོན་ལྟར་ན་བོད་ཀྱི་ཞིང་འབྲོག་ས་ཁུལ་ནང་སློབ་ཆུང་རེ་ཙམ་ལས་མེད་པ་དང་སློབ་ཆུང་དེའི་ནང་དགེ་རྒན་ཡང་ཚད་དང་ལྡན་པ་མེད་པ་དང་སློབ་གྲྭའི་འགོ་འདིན་བ་མང་པོ་རྒྱ་རིགས་ཡིན་པ་དང་སློབ་གྲྭའི་སློབ་གཞིའི་ནང་སྐད་ཡིག་གཙོ་བོ་རྒྱ་ཡིག་སློབ་འཁྲིད་བྱེད་དགོས་པ་སོགས་ཀྱི་དཀའ་ངལ་འཕྲད་བཞིན་པ་རེད་འདུག དེར་བརྟེན་བོད་ཀྱི་ཞིང་འབྲོག་ས་ཁུལ་ནས་བོད་རིགས་སློབ་ཕྲུག་མང་པོ་ལྷ་ས་སོགས་གྲོང་ཁྱེར་ནང་སློབ་གསོ་ཚད་ལྡན་ཐོན་པའི་ཆེད་དུ་གཏོང་དུས་དམིགས་བསལ་གྱི་འགྲོ་སོང་སོགས་ཀྱི་ཐད་དཀའ་ངལ་འཕྲད་ཀྱི་ཡོད་པ་རེད་འདུག

དེ་ཡང་བོད་ནང་བོད་མི་ཞིག་གིས་ངོ་སྤྲོད་གནང་དོན་ལ་བོད་ཀྱི་ཞིང་འབྲོག་ས་ཁུལ་ནས་གྲོང་ཁྱེར་ཁག་ཏུ་སློབ་གྲྭར་ཡོང་མཁན་རྣམས་ལ་སློབ་ཡོན་ལས་གཞན་དམིགས་བསལ་གྱི་རོགས་རམ་མེད་ཅིང་སློབ་ཕྲུག་གི་སྒྲིག་ཆས་དེབ་ཆས་སོགས་དགོས་མཁོ་མང་པོ་ཕ་མ་རང་ཉིད་ཀྱི་འགྲོ་སོང་གཏོང་དགོས་དུས་ཆ་བསྙོམས་བྱས་པ་ཡིན་ན་ཕ་མ་སོ་སོས་སློབ་ཟླ་རེར་རྒྱ་སྒོར་དྲུག་བརྒྱ་ནས་བརྒྱད་བརྒྱ་འཕར་མ་འགྲོ་སོང་གཏོང་དགོས་ཀྱི་ཡོད་པ་རེད་འདུག འོན་ཀྱང་རྒྱ་ནག་གི་དྲིལ་བསྒྲགས་ནང་བོད་རིགས་སློབ་ཕྲུག་རྣམས་དང་མཐའ་ན་མཐོ་སློབ་ཐོན་ནས་ལས་མེད་རྣམས་ལ་ཡང་རྒྱ་ནག་གི་དངུལ་ཁང་གིས་དམིགས་བསལ་གྱི་མ་དངུལ་བུ་ལོན་དུ་གཏོང་གི་ཡོད་པ་སོགས་དྲིལ་བསྒྲགས་བྱེད་བཞིན་པ་བཅས་ཀྱི་གནས་ཚུལ་ཐོན་འདུག།