གསེར་རྟ་རྫོང་ཐོག་ཏུ་བོད་རང་བཙན་གྱི་སྐད་འབོད་བྱས་པ།

༄༅༎བོད་དཀར་མཛེས་ཁུལ་གསེར་རྟ་རྫོང་ཐོག་ཏུ་བོད་རང་བཙན་གྱི་སྐད་འབོད་བྱས་ཡོད་པའི་གནས་ཚུལ་ཐོན་འདུག
བོད་མི་མང་སྤྱི་འཐུས་ཟུར་པ་གསེར་རྟ་ཚུལ་ཁྲིམས་འོད་ཟེར་ནས་གནས་ཚུལ་མཁོ་སྤྲོད་བྱས་པ་ལྟར་ན། ཕྱི་ཚེས་༡༦་ཉིན་གྱི་ཉིན་གུང་ གསེར་རྟ་རྫོང་ཐོག་ཏུ་གྲྭ་པ་གཉིས་ནས་རླུང་རྟ་གཏོར་བཞིན་བོད་རང་བཙན་གྱི་སྐད་འབོད་བྱས་པར་བརྟེན། ཉེན་རྟོག་པས་འཛིན་བཟུང་གིས་གཅར་རྡུག་དྲག་པོ་བཏང་སྟབས། མི་མང་རྣམས་མ་བཟོད་པར་ཁོང་ཁྲོ་ལངས་ནས་ཉེན་རྟོག་པ་དང་འཐབ་ནས་གྲྭ་པ་གཉིས་པོ་ཚུར་འཕྲོག་པ་དང་ དེ་ནས་བོད་རང་དབང་༸གོང་ས་མཆོག་བོད་ནང་གདན་འདྲེན་ཞུ་དགོས་སོགས་ཀྱི་སྐད་འབོད་བྱས་ཡོད་འདུག
འོན་ཀྱང་གྲྭ་པ་དེ་གཉིས་ཀྱི་མིང་དང་ལོ་རྒྱུས་སོགས་ཞིབ་ཕྲ་ཤེས་རྟོག་མ་བྱུང་ཞེས་གསུངས་འདུག།