བོད་ས་ཡོངས་ལ་དམ་བསྒྲགས་སྲིད་ཇུས་མུ་མཐུད་གནས་པ།

༄༅༎བོད་ས་ཡོངས་ནང་རྒྱ་ནག་གཞུང་གིས་དུས་ཚེས་ངེས་མེད་བར་དམ་བསྒྲགས་ཀྱི་སྲིད་ཇུས་མུ་མཐུད་གནས་རྒྱུ་ཡིན་པ་རེད།

དེ་ཡང་ཕྱི་ཚེས་བཅུ་བཞི་ཉིན་འདི་ག་རླུང་འཕྲིན་ཁང་ལ་ཁུངས་ལྡན་གྱི་གནས་ཚུལ་མཁོ་སྤྲོད་བྱུང་བར་གཞིགས་ན་སྔ་ལོ་བོད་ས་ཡོངས་ལ་བོད་མི་ཚོས་རྒྱ་ནག་གཞུང་ལ་ངོ་རྒོལ་གྱི་ལས་འགུལ་རྒྱ་ཁྱབས་སྤེལ་བ་ནས་བཟུང་རྒྱ་ནག་གཞུང་གིས་བོད་ཆོལ་ཁ་གསུམ་ཁྱོན་ཡོངས་སུ་དྲག་གནོན་དང་དམ་བསྒྲགས་ཀྱི་སྲིད་ཇུས་ལག་བསྟར་བྱེད་བཞིན་ཡོད་ལ་ཞི་རྒོལ་གྱི་གནས་ཚུལ་བྱུང་ནས་ལོ་གཅིག་ལྷག་ཙམ་འགྲོ་ཡི་ཡོད་རུང་ད་ལྟའང་བོད་མི་ཚོར་བོད་ནང་ཕར་འགྲོ་ཚུར་འོང་གི་དཀའ་ངལ་ཆེན་པོ་བཟོ་བཞིན་པ་མ་ཟད་དོ་དམ་སྲུང་བྱ་སྐབས་བོད་མི་རྒྱ་སྐདད་མ་ཤེས་མཁན་ཚོས་རྒྱ་མིའི་དམག་མི་དང་གོ་བརྡ་མ་འཕྲོད་པའི་དབང་གིས་ཉེས་རྡུང་ཆེན་པོ་ཕོག་པ་དང་བཙོན་འཇུག་བྱེད་པ་སོགས་གང་ལྟར་བོད་མིའི་ཐོག་རང་སྣང་གང་དྲན་དང་ཁྲིམས་མེད་ལུང་མེད་ཀྱི་གདུག་རྩུབ་བྱེད་བཞིན་ཡོད་སྐོར་མིང་འདོན་གནང་འདོད་མེད་པའི་མི་སྣ་ཞིག་གིས་གནས་ཚུལ་ངོ་སྤྲོད་གནང་ཞིང་གོང་གསལ་གནས་ཚུལ་འབྱུང་ཁུངས་ཀྱིས་གསུངས་ན་རྒྱ་ནག་གཞུང་གི་དམག་མི་གཙོས་པའི་ལས་བྱེད་པ་རྣམས་ནས་བོད་མི་གནས་སྡོད་ཀྱི་ས་ཁུལ་ཁག་ཏུ་སྲུང་བྱ་དམ་པོའི་ལྟ་སྲུང་བྱེད་པ་དང་ཆབས་ཅིག་སློབ་གསོའི་ལས་འགུལ་རྒྱ་ཆེ་སྤེལ་གྱི་ཡོད་པ་རེད། ཉེ་ལམ་རྒྱ་ནག་གཞུང་གིས་སྔ་ལོ་བོད་མིའི་ཞི་རྒོལ་གྱི་ལས་འགུལ་ནང་ཐེ་གཏོགས་ཡོད་ལུགས་ཀྱི་འཛིན་བཟུང་བྱས་པའི་བོད་མི་ཁག་ལ་རིམ་པས་ཁྲིམས་བཤེར་བྱེད་འགོ་ཚུགས་སྟེ་སྲོག་ཐོག་གི་ཉེས་ཆད་འགེལ་བ་དང་ཡང་རེ་བཟུང་གློད་བཀྲོལ་བཏང་བའི་གནས་ཚུལ་ཡོད་ནའང་གཞི་རྩའི་བོད་ཆོལ་ཁ་གསུམ་ཁྱོན་ཡོངས་ལ་དམ་བསྒྲགས་ཀྱི་སྲིད་ཇུས་དེ་མུར་གནས་ཡོད་པ་རེད༎