རྒྱ་ནག་གཞུང་གིས་བོད་ནང་མུ་མཐུད་དམ་བསྒྲགས་བྱེད་པ།

༄༅༎ད་ལོ་ཕྱི་ཟླ་གསུམ་པའི་ནང་བོད་ས་ཡོངས་སུ་རྒྱ་ནག་གཞུང་གི་དབང་བསྒྱུར་ལ་ངོ་རྒོལ་གྱི་ཞི་བའི་ངོ་རྒོལ་བྱུང་བའི་རྗེས་དེང་སྐབས་རྒྱ་ནག་གཞུང་གི་འབྲེལ་ཡོད་ལས་ཁང་ཁག་གིས་བོད་ཀྱི་ས་ཁུལ་ཁག་ནང་དམ་བསྒྲགས་ཤུགས་ཆེ་བྱེད་བཞིན་པའི་ཁར་ལྷག་པར་དུ་དགོན་སྡེ་ཁག་ནང་དམ་བསྒྲགས་ཤུགས་ཆེ་བྱེད་བཞིན་ཡིན་པ་ལྟར་མདོ་སྟོད་སྨར་ཁམས་འོད་ཟེར་དགོན་པའི་དགེ་འདུན་པ་ཚོར་རྒྱ་ནག་གཞུང་གི་ཉེན་རྟོག་པས་དོན་ཚན་བཞིའི་ཐོག་དྲི་རྩད་བྱས་ནས་དམ་བསྒྲགས་ཤུགས་ཆེ་བྱེད་བཞིན་ཡོད་པའི་སྐོར་འདི་ག་རླུང་འཕྲིན་ཁང་ལ་མིང་འབོད་གནང་འདོད་མེད་པའི་ས་གནས་མི་སྣ་ཞིག་གིས་གནས་ཚུལ་གནང་དོན་ལྟར་ན་འོད་ཟེར་དགོན་པའི་དགེ་འདུན་རྒན་གྲས་ཚོ་ལ་རྒྱ་ནག་གཞུང་གི་འབྲེལ་ཡོད་ཚན་པའི་དཔོན་རིགས་ཀྱིས་དགེ་འདུན་པ་ཚོས་ཕྱི་ཕྱོགས་སུ་ས་གནས་ཀྱི་གནས་ཚུལ་ཁྱབ་སྤེལ་བྱས་པ་དང་དེ་བཞིན་དགེ་འདུན་པ་ཚོ་དང་སྨར་ཁམས་ནང་ད་ལོ་ཕྱི་ཟླ་གསུམ་པའི་ཚེས་བཞི་ཉིན་བྱུང་བའི་འབར་རྫས་ཀྱི་དོན་རྐྱེན་ཁག་དང་འབྲེལ་བ་ཡོད་ཚུལ་དང་དེ་མིན་ད་ལོ་ཕྱི་ཟླ་གསུམ་པའི་ནང་བོད་ས་ཡོངས་སུ་བོད་མི་ཚོས་རྒྱ་ནག་གཞུང་གི་དབང་བསྒྱུར་ལ་ཞི་བའི་ངོ་རྒོལ་བྱེད་པའི་སྐབས་རྒྱ་ནག་ཉེན་རྟོག་པས་བོད་མི་ཚོའི་ཐོག་དྲག་གནོན་བྱས་ནས་བོད་མི་མང་པོའི་ཚེ་སྲོག་ཤོར་ཡོད་པ་ཚོའི་ཆེད་ཆོས་ཕྱོགས་ཀྱི་ཞབས་རིམ་ཁག་གྲུབ་ཡོད་པ་ཉེས་བཙུགས་བྱས་ནས་དགེ་འདུན་པ་ཚོར་དྲི་རྩད་བྱས་ནས་འོད་ཟེར་དགོན་པར་དམ་བསྒྲགས་ཆེན་པོ་བྱེད་བཞིན་ཡིན་པ་འགྲེལ་བརྗོད་གནང་ཡོད་པ་དང་ད་དུང་གནས་ཚུལ་ངོ་སྤྲོད་གནང་མཁན་དེས་གསུང་བར་རྒྱ་ནག་གཞུང་གི་ཉེན་རྟོག་མི་སྣ་ཚོ་ཉིན་ལྟར་འོད་ཟེར་དགོན་པའི་ནང་ལ་ཡོང་ནས་དགེ་འདུན་པ་རྒན་གྲས་ཚོར་དྲི་རྩད་བྱེད་བཞིན་པ་མ་ཟད་དགེ་འདུན་པ་ཁག་ཅིག་ཆབ་མདོ་དང་ཁག་ཅིག་ལྷ་སར་ཁྲིད་འགྲོ་གི་ཡོད་པ་སོགས་ཀྱི་དཀའ་ངལ་ཆེན་པོ་བཟོ་བཞིན་ཡོད་འདུག