རྒྱ་ནག་གཞུང་གིས་ཆབ་མདོ་ཀརྨ་དགོན་པའི་ནང་དམ་བསྒྲགས།

༄༅༎ཁ་ས་གནས་ཚུལ་རྒྱུས་ཡོད་བོད་མི་ཞིག་གིས་འདི་ག་རླུང་འཕྲིན་ཁང་དུ་གནས་ཚུལ་ངོ་སྤྲོད་གནང་དོན་ལྟར་ན། དེང་སྐབས་ཆབ་མདོ་ཀརྨ་དགོན་པའི་དགེ་འདུན་པ་མང་པོ་ཞིག་རྒྱ་ནག་གཞུང་གི་གནོན་ཤུགས་འོག་དགོན་པའི་ནང་སྡོད་མ་ཐུབ་པར་ས་ཕྱོགས་གཞན་སོ་སོར་འགྲོ་དགོས་བྱུང་བཞིན་ཡོད་པ་དང་། དེ་ལྟར་ཡོང་དགོས་པའི་རྒྱུ་མཚན་ནི་ རྒྱ་ནག་གཞུང་གིས་དགོན་པའི་ནང་ཁ་བྲལ་བར་ངོ་རྒོལ་བྱ་དགོས་པའི་བཙན་གནོན་གྱི་སློབ་གསོ་དང་གནོན་ཤུགས་ཆེན་པོའི་འོག་དགོན་པ་སྒོ་བརྒྱབ་རྒྱུའི་ཉེན་ཁའི་འོག་གནས་ཡོད་པའི་སྐོར་གནས་ཚུལ་ངོ་སྤྲོད་གནང་མཁན་བོད་མི་བཀྲིས་ལགས་ཀྱིས་གསུངས་འདུག དེ་བཞིན་ཁོང་གིས་གནས་ཚུལ་མུ་མཐུད་ནས་ངོ་སྤྲོད་གནང་བའི་ནང་།  དགོན་པའི་ནང་ཁ་བྲལ་ལ་ངོ་རྒོལ་གྱི་སློབ་གསོའི་ལས་འགུལ་ནང་བཞུགས་འདོད་མེད་པར་དགོན་པ་ནས་ཕྱིར་ཐོན་མཁན་གྱི་དགེ་འདུན་པ་རྣམས་ལ།  རྒྱ་ནག་གི་འབྲེལ་ཡོད་ལས་བྱེད་ཚོས་ཉེན་བརྡ་བཏང་ཡོད་པའི་གནས་ཚུལ་འདུག།