ཏྲ་རམཔ་ཡིས་རྒྱ་ནག་གཅིག་གི་སྲིད་བྱུས་རྒྱུན་ཁྱོངས་ཁས་ལེན།

ཨ་རིའི་སྲིད་འཛིན་གྱིས་རྒྱ་ནག་གི་སྲིད་འཛིན་ཞི་ཅིན་ཕེང་དང་ཁ་པར་བརྒྱུད་བཀའ་མོལ་གནང་ཡོད་འདུག
དེ་ཡང་ཨ་རིའི་ཕོ་བྲང་དཀར་པོས་རེས་གཟའ་ཕུར་བུའི་མཚན་གུང་སྤེལ་བའི་གནས་ཚུལ་ནང་། ཨ་རིའི་སྲིད་འཛིན་ཌོ་ནལཌ་ཏྲ་རམཔ་(Donald Trump)་གྱིས་རེས་གཟའ་ཕུར་བའི་མཚན་གུང་དུ་རྒྱ་ནག་གི་སྲིད་འཛིན་ཞི་ཅིན་ཕེང་དང་མཉམ་དུ་ཁ་པར་གྱི་ལམ་ནས་བཀའ་མོལ་དུས་ཚོད་རིང་པོ་གནང་ཡོད་པ་དང་། བཀའ་མོལ་སྐབས་དབུ་ཁྲིད་རྣམ་པ་གཉིས་ཀས་གནད་དོན་མང་པོའི་ཐད་གླེང་ཡོད་པའི་མ་ཚད། ཞི་ཅིན་ཕེང་གི་རེ་འདུན་ལྟར་སྲིད་འཛིན་ཊོམ་མཆོག་གིས་རྒྱ་ནག་གཅིག་གི་སྲིད་བྱུས་ལ་བརྩི་བཀུར་བྱེད་རྒྱུར་མོས་མཐུན་གནང་འདུག
རྒྱ་ནག་དབུས་བརྙན་འཕྲིན་ཁང་གིས་གནས་ཚུལ་ནང་། སྲིད་འཛིན་ཞི་ཅིན་ཕེང་གིས་ཨ་རི་གཞུང་གིས་རྒྱ་ནག་གཅིག་གི་སྲིད་བྱུས་རྒྱུན་འཁྱོངས་གནང་བར་བསྟོད་བསྔགས་དང་འབྲེལ། རྒྱ་ནག་གཅིག་གི་རྩ་དོན་ནི་ཨ་རི་དང་རྒྱ་ནག་གི་འབྲེལ་བའི་ཆབ་སྲིད་རྨང་གཞི་ཡིན་པ་དང་། རྒྱ་ནག་གིས་ཨ་རི་དང་དཔུང་པ་མཉམ་གཤིབ་ཀྱིས་ཨ་རི་དང་རྒྱ་ནག་གི་འབྲེལ་བ་དེ་བདེ་ཐང་བརྟན་བརླིང་ངང་འཕེལ་རྒྱས་སུ་གཏོང་རྒྱུར་མོས་མཐུན་ཡོད་ཅེས་ནན་གྱིས་བརྗོད་ཡོད་ལུགས་བཀོད་འདུག
དེ་མིན་བཀའ་མོལ་སྐབས་ཞི་ཅིན་ཕེང་གིས་སྤྱི་ཚེས ༨ ཉིན་སྲིད་འཛིན་ཊོམ་གྱིས་འཚམས་འཕྲིན་སྤྲིངས་ནས་རྒྱ་ནག་ལུགས་རྙིང་ལོ་གསར་དུས་སྟོན་ལ་རྟེན་འབྲེལ་ཞུས་པར་ཐུགས་རྗེ་ཆེ་ཞུས་ཡོད་པ་རེད།
ཕོ་བྲང་དཀར་པོས་སྤེལ་བའི་གནས་ཚུལ་དང་རྒྱ་ནག་གཞུང་འབྲེལ་གྱིས་སྤེལ་བའི་གནས་ཚུལ་གཉིས་ཀའི་ནང་ཐེ་ཝན་སྐོར་གྱི་གནད་དོན་གླེང་མེད་པ་རེད།
ལོ་སྔོན་མའི་སྤྱི་ཟླ་༡༢་བའི་ནང་ཌོ་ནལཌ་ཏྲ་རམཔ་(Donald Trump)་སྲིད་འཛིན་དུ་འོས་ཐོབ་ཟིན་པའི་རྗེས་ཁོང་གིས་གིས་ཐེ་ཝན་གྱི་སྲིད་འཛིན་ཚེ་དབྱིན་ཝིན་དང་མཉམ་དུ་ཁ་པར་བཀའ་མོལ་གནང་བའི་མ་ཟད། གལ་ཏེ་རྒྱ་ནག་གིས་ཉོ་ཚོང་ཐད་བསམ་ཤེས་མི་བྱེད་ན་ང་ཚོས་རྒྱ་ནག་གཅིག་གི་སྲིད་བྱུས་ཀྱི་བཀག་རྒྱ་འཁུར་དོན་མེད་ཅེས་རྒྱ་ནག་གཅིག་གི་སྲིད་བྱུས་ལ་དོགས་འདྲི་གནང་ཡོད་པ་རེད།

གསར་འགོད་པ་སྟག་ལྷ་རྒྱལ།