བོད་རིགས་བེུད་རྩོམ་པ་པོ་འོད་ཟེར་གྱི་དྲ་གནས་ལ་གནོད་སྐྱོན་བཏང་བ།

༄༅༎རྒྱ་ནག་གི་རྒྱལ་ས་པེ་ཅིན་དུ་གནས་སྡོད་བོད་རིགས་བུད་མེད་འོད་ཟེར་ལགས་ནས་ཉེ་དུས་བོད་ནང་བྱུང་དང་འབྱུང་བཞིན་པའི་བོད་མིའི་སྒེར་ལངས་ཀྱི་གནས་ཚུལ་ཁག ཁོ་མོའི་ཆེད་འཛུགས་བྱས་པའི་དྲ་གནས་ཐོག་ཉིན་ལྟར་འདོན་སྤེལ་བྱེད་བཞིན་པ་ལྟར་ འོད་ཟེར་གྱིས་བེད་སྤྱོད་བྱེད་བཞིན་པའི་ སི་ཀའེབ་ ཞེས་པའི་འབྲེལ་མཐུད་བརྒྱུད་ལམ་གྱི་ཨང་རྟགས་གཞན་གྱིས་རྐུ་འཁྱེར་བྱས་ཡོད་པས་ ཁོ་མོ་དང་ཁོ་མོར་འབྲེལ་གཏུགས་ཡོད་མཁན་གྱི་མི་རྣམས་ཆབ་སྲིད་ཀྱི་ཐོག་ནས་ཉེན་ཁ་འཕྲད་ཡོད་ཚུལ་ཁོ་མོའི་ཁྱོ་ག་སྐུ་ཞབས་ཝཱང་ལིས་ཞོང་གིས་རོའུ་ཀྲར་གསར་ལས་ཁང་ལ་འགྲེལ་བརྗོད་བྱས་འདུག སི་ཀའེབ་ཞེས་པའི་དེང་རབས་ཀྱི་འཕྲུལ་རིག་དེ་ནི་གནས་འཕྲིན་དྲ་བ་བརྒྱུད་རིན་པ་སྤྲོད་མི་དགོས་པའི་ཐོག་ནས་ཁ་པར་གཏོང་ཆོག་པ་དང་ དེ་ནི་རྒྱ་ནག་ནང་སྲིད་དོན་གྱི་ལྟ་བ་མི་མཐུན་པའི་ཁྲོད་དུ་ཧ་ཅང་གི་དར་ཁྱབ་ཆེན་པོ་ཡོད་པ་རེད་ རྒྱུ་མཚན་ནི་གསང་མྱུལ་བས་སྟངས་འཛིན་བྱེད་ཐུབ་ཀྱི་མེད་ འོད་ཟེར་ལགས་ནས་ཟེར་ན་ ངའི་གསང་བའི་ཨང་གྲངས་བརྗེ་བོ་བརྒྱབ་འདུག་པས་ ང་རང་གནས་འཕྲིན་དྲ་བའི་སྟེང་འགྲོ་ཐུབ་ཀྱི་མི་འདུག རྐུ་འཁྱེར་བྱེད་མཁན་དེས་ངའི་གྲངས་ཐོག་ཏུ་ཡོད་པའི་མི་རྣམས་ལ་འབྲེལ་གཏུགས་བྱེད་ཀྱི་འདུག་ཟེར་ འོད་ཟེར་ལགས་ནས་ཉེ་དུས་བོད་ནང་བྱུང་དང་འབྱུང་བཞིན་པའི་བོད་མིའི་སྒེར་ལངས་ཀྱི་གནས་ཚུལ་རབ་དང་རིམ་པ་བཞིན་མོ་རང་གིས་གཙོ་གཉེར་བྱས་པའི་དྲ་གནས་ཐོག་འདོན་སྤེལ་བྱེད་བཞིན་པར་བརྟེན་ པེ་ཅིན་ཉེན་རྟོག་པས་ཁོ་མོར་བལྟ་རྟོག་ནན་པོ་བྱེད་ཀྱི་ཡོད་འདུག