ཞེ་ཆེན་རབ་འབྱམས་རིན་པོ་ཆེ་ཡིས་སྔ་འགྱུར་རྙིང་མའི་སྨོན་ལམ་ཚོགས་པའི་ཚོགས་གཙོའི་ཐུགས་འགན་བཞེས་གཏན་འཁེལ་འདུག

དེ་ཡང་གནས་མཆོག་རྡོ་རྗེ་གདན་གྱི་བྱང་ཆུབ་མཆོད་རྟེན་ཆེན་མོའི་དྲུང་དུ། འདི་ལོའི་རྒྱལ་ཡོངས་སྔ་འགྱུར་རྙིང་མའི་སྨོན་ལམ་ཆེན་མོ་ཐེངས་༣༤པ་དེ་བཞིན་ཕྱི་ཟླ་༡ཚེས་༢༢ནས་ཚེས་ ༣༡བར་འཚོགས་ཡོད་པ་ལྟར། སྔ་འགྱུར་རྙིང་མའི་སྨོན་ལམ་ཆེན་མོའི་འགན་འཛིན་ལྷན་ཚོགས་བསྐོང་ཚོགས་གནང་འབྲས་སུ། སྔ་འགྱུར་རྙིང་མའི་སྨོན་ལམ་ཚོགས་པའི་ཚོགས་གཙོ་རེས་མོས་གནང་གི་ཡོད་པ་ལྟར། ༧སྐྱབས་རྗེ་ཞེ་ཆེན་རབ་འབྱམས་འཇིགས་མེད་ཆོས་ཀྱི་སེང་གེ་རིན་པོ་ཆེ་མཆོག་གིས་མ་འོངས་ལོ་གསུམ་གྱི་རིང་། སྨོན་ལམ་ཚོགས་པའི་ཚོགས་གཙོའི་ཐུགས་འགན་བཞེས་གནང་རྒྱུ་ཡིན་པ་དཔལ་སྔ་འགྱུར་རྙིང་མའི་སྨོན་ལམ་གྱི་རྒྱལ་བའི་བརྟན་བཞུགས་གོ་སྒྲིག་ཚོགས་ཆུང་གི་འགན་འཁུར་བ་སློབ་དཔོན་ཀརྨ་ཚེ་རིང་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་ཞལ་པར་ཐོག་ངོ་སྤྲོད་གནང་བྱུང་།
ཕྱི་ལོ་༢༠༡༨ལོ་ནས་སྔ་འགྱུར་རྙིང་མའི་དབུ་འཛིན་སུ་བཞུགས་ཐད་གོ་བསྡུར་བྱུང་བར་རྙིང་མའི་མ་དགོན་དྲུག་ནས་རེས་མོས་གནང་རྒྱུ་ཐག་གཅོད་གནང་ཡོད་ནའང་། ༢༠༢༠ལོའི་རྙིང་མའི་སྨོན་ལམ་ཆེན་མོའི་སྐབས། ཞེ་ཆེན་རབ་འབྱམས་འཇིགས་མེད་ཆོས་ཀྱི་སེང་གེ་མཆོག་ལ་སྔ་འགྱུར་རྙིང་མའི་དབུ་འཛིན་ཁྲི་རབས་བརྒྱད་པར་གསོལ་འདེབས་ཞུས་ཀྱང་། བསྟན་འགྲོའི་བདེ་རྩར་དགོངས་བཞེས་ཀྱིས་ཞལ་བཞེས་གནང་མེད་པར་བརྟེན། རྙིང་མའི་དབུ་འཛིན་གྱི་མཚན་གནས་འདོགས་མི་དགོས་པར་སྔ་འགྱུར་རྙིང་མའི་བསྟན་དོན་དང་འབྲེལ་བའི་གནད་དོན་རྣམས་རྙིང་མ་སྤྱི་ལ་ཁྱབ་པའི་སྨོན་ལམ་ཆེན་མོའི་སྒྲིག་འཛུགས་ཀྱིས་ཐུགས་འགན་བཞེས་རྒྱུར་ཐག་གཅོད་བྱུང་ཞིང་། སྔ་འགྱུར་རྙིང་མའི་སྨོན་ལམ་ཚོགས་པའི་ཚོགས་གཙོའི་ཐུགས་འགན་༧སྐྱབས་རྗེ་རི་མགོ་སྤྲུལ་སྐུ་མཆོག་གིས་བཞེས་གནང་ཡོད་པ་རེད།།

གསར་འགོད་པ། བཀྲ་ཤིས་དབང་ཕྱུག
རྩོམ་སྒྲིག་པ། རིག་ལྡན་སྒྲོལ་མ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།