༸གོང་ས་མཆོག་ནས་གྲོས་མོལ་གྱི་ལམ་གལ་ཆེ་ཞེས་བཀའ་སྩལ།

༄༅༎༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་གྲོས་མོལ་གྱི་ལམ་ནས་དཀའ་རྙོག་སེལ་ཐབས་བྱེད་དགོས་རྒྱུ་གལ་ཆེན་པོ་ཡིན་པའི་བཀའ་གནང་འདུག།

བོད་ཀྱི་བླ་ན་མེད་པའི་དབུ་འཁྲིད་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་འཇར་མ་ནི་ཁུལ་གྱི་ཁ་ས་ཉིན་མཐའ་མའི་མཛད་རིམ་ཁོངས་སུ་མང་ཚོགས་ཉིས་ཁྲི་ལྔ་སྟོང་བརྒལ་བའི་འདུ་འཛུགས་ཤིག་ཐོག་གསུངས་བཤད་གནང་བའི་ནང་། དུས་རབས་ཉི་ཤུ་ཐམ་པ་དེ་བཞིན་དམག་འཁྲུག་གི་དུས་ཚོད་ཅིག་ཆགས་ཡོད་པ་རེད། ཡིན་ནའང་དུས་རབས་ཉི་ཤུ་རྩ་གཅིག་པ་འདི་བཞིན་དཀའ་རྙོག་ག་འདྲ་ཞིག་ཡིན་རུང་ཞི་བའི་གྲོས་མོལ་གྱི་བརྒྱུད་ནས་སེལ་ཐབས་བྱེད་དགོས་རྒྱུ་ཧ་ཅང་གལ་ཆེན་པོ་རེད་ལ་དེ་ནི་འཛམ་གླིང་ནང་ཞི་བདེ་སྐྲུན་ཐབས་ཀྱི་ཐབས་ལམ་ཡག་ཤོས་ཤིག་ཀྱང་རེད་ཅེས་བཀའ་གནང་འདུག།

ཡང་༸གོང་ས་མཆོག་ནས། ཚོགས་ཁང་དེའི་ནང་མང་ཚོགས་མང་པོས་བོད་ཀྱི་རྒྱལ་དར་མང་པོ་འཁྱེར་བ་གཟིགས་རྒྱུ་ཡོད་པ་དེ་ནི་རྒྱ་ནག་ལ་ངོ་རྒོལ་ཡིན་པར་མཚོན་གྱི་ཡོད་མ་རེད་ལ་དེ་བས་ཁ་བྲལ་གྱི་ལས་འགུལ་ཡིན་པར་ཡང་མཚོན་གྱི་ཡོད་མ་རེད། ང་ཚོས་རྒྱ་ནག་གི་སྐར་མ་ལྔ་ལྡན་གྱི་རྒྱལ་དར་ལའང་གུས་བརྩི་དང་རྒྱབ་སྐྱོར་ཞུ་གི་ཡོད་ཅེས་གསུངས་པ་དང༌། ཆབས་ཅིག་ཉེ་ཆར་རྒྱ་ནག་ནང་ས་ཡོམ་གྱི་གོད་ཆགས་འོག་མི་གྲངས་སྟོང་ཕྲག་མང་པོའི་ཚེ་སྲོག་ཤོར་བ་དང༌། དོ་ཕོག་ཐེབས་པའི་མི་མང་ཚོར་གདུང་སེམས་མཉམ་སྐྱེད་དང༌། ཐུགས་སྨོན་གནང་དགོས་ལུགས་བཀའ་གནང་འདུག།

༸གོང་ས་མཆོག་ཁུལ་དེར་ཕེབས་པའི་སྐབས་རྒྱ་ནག་གཞུང་ཚབ་ཁང་ནས་དགག་ཆ་བྱེད་མིན་ལ་མ་ལྟོས་པར་འཇར་མན་གྱི་དཔལ་འབྱོར་ཡར་རྒྱས་ལས་དོན་ཚན་པའི་བློན་ཆེན་མཆོག་དང༌། གཞན་ཡང་གྲོས་ཚོགས་ཀྱི་ཚོགས་གཙོ་དང་། གྲོས་ཚོགས་འཐུས་མི་སོགས་གནད་ཡོད་མི་སྣ་ཁག་ཅིག་མཇལ་འཕྲད་གནང་ཡོད་པ་མ་ཟད་ འཇར་མན་ངོས་ནས་མུ་མཐུད་ནས་རྒྱ་ནག་དང༌། བོད་པའི་སྐུ་ཚབ་དབར་མཇལ་འཕྲད་ཀྱིས་གྲོས་མོལ་གནང་རྒྱུར་གནོན་ཤུགས་སྤྲོད་གནང་གི་ཡིན་ཞེས་གསུངས་ཡོད་པ་རེད།