ཨི་ཇིཔ་ཡུལ་གྲུའི་ནང་ཕག་པ་སྟོང་ཕྲག་མང་པོ་བསད་ཡོད་པ།

༄༅༎འཛམ་གླིང་འཕྲོད་བསྟེན་ལྷན་ཁང་གིས་རེས་གཟའ་ཕུར་བུའི་ཉིན་གསལ་བསྒྲགས་ཤིག་འགྲེམས་སྤེལ་གནང་སྟེ་དེང་སྐབས་འཛམ་གླིང་ནང་ཕག་པའི་རིམས་ནད་ཅེས་ཐ་སྙད་བཏགས་པ་དེར་ཁག་ཅིག་གིས་ཕག་པ་རྩ་མེད་བཟོ་རྒྱུའི་བྱ་སྤྱོད་སྤེལ་བཞིན་པར་བརྟེན་བྱ་སྤྱོད་དེ་འགོག་ཐབས་སུ་རིམས་ནད་དེར་ཨེཆ་བན་ཨེན་བན་རིམ་པ་ལྔ་པ་ཞེས་མིང་བསྒྱུར་གནང་རྒྱུ་ཡིན་ཞེས་གསུངས་ཡོད་པ་རེད།

དེང་སྐབས་དར་ཁྱབ་འགྲོ་བཞིན་པའི་རིམས་ནད་དེ་ཡི་མིང་ལ་ཕག་པའི་རིམས་ནད་ཅེས་ཐ་སྙད་ཅིག་བཏགས་པ་ལས་རིམས་ནད་དེ་ནི་ཕག་པ་ནས་འགོས་ཁྱབ་བྱུང་བ་ཡིན་པའི་དཔངས་རྟགས་མེད་ཅིང་ད་ལྟ་བར་རིམས་ནད་དེ་འགོས་ཁྱབ་བྱུང་བའི་ནད་པ་རྣམས་ཕག་པ་དང་འབྲེལ་བ་རྩ་བ་ནས་མེད་པ་ཤ་སྟག་ཡིན་ནའང་རེས་གཟའ་ཕུར་བུའི་ཉིན་ཨི་ཇིཔ་ཡུལ་གྲུའི་ནང་རིམས་ནད་དེ་སྔོན་འགོག་ཆེད་དུ་ཕག་པ་སྟོང་ཕྲག་མང་པོ་སྡེབ་བསད་བཏང་བའི་བྱ་སྤྱོད་འགོ་བཙུགས་ཡོད་པར་བརྟེན་རེས་གཟའ་ཕུར་བུའི་ཉིན་འཛམ་གླིང་འཕྲོད་བསྟེན་ལྷན་ཁང་གིས་རིམས་ནད་དེའི་མིང་བརྗེ་བསྒྱུར་བྱ་རྒྱུའི་གསལ་བསྒྲགས་གནང་ཡོད་པ་རེད།

འཛིམ་གླིང་འཕྲོད་བསྟེན་ལྷན་ཁང་གི་མགྲིན་ཚབ་པ་ཌིཀ་ཐོམ་སོན་གྱིས་གསུངས་པར་སོ་ནམ་ཐོན་སྐྱེས་བཟོ་གྲྭ་དང་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཟ་འབྲུའི་ལས་ཁུངས་ལ་ཕག་པའི་རིམས་ནད་ཅེས་བཏགས་པའི་ཕག་པའི་མིང་གི་ཐ་སྙད་དེ་མི་དམངས་ཚོས་གོ་ནོར་ཐེབས་པ་དང་བེད་སྤྱོག་ལོག་པར་བཏང་སྟེ་ཕག་པ་མང་པོ་སྡེབ་བསད་བཏང་བ་དང་ཕག་པའི་ཐོན་སྐྱེས་ཚོང་ལས་ལ་གནོད་འཚེ་བཟོ་རྒྱུའི་ཉེན་ཁ་གཟིགས་ཀྱི་ཡོད་པའི་སྐོར་གསུངས་ཡོད་པ་རེད༎